Fatimə Hacıbəyli: “Çox təəssüf ki, gənclər arasında beynəlmiləl ailə qurmağa meyl var” “Azərbaycanda yaşayan əcnəbilərin xeyli qismi bizim qızlarla Azərbaycan vətəndaşlığı almaq üçün nikaha girirlər”
Vaxtilə Azərbaycanda nəinki əcnəbilərlə, eləcə də qeyri-millətlərlə nikaha daxil olunması elə də geniş yayılmamışdı. Ölkəmizdə kişilərin başqa xalqların qızları ilə evlənməsi halları mövcud olsa da, qızlarımızın qeyri-azərbaycanılarla ailə qurması nadir hadisə idi. Lakin son illər Azərbaycanda əcnəbilərlə nikaha daxil olanların sayında artım var.
Dövlət Statistika Komitəsindən mətbuata daxil olan məlumata görə, bu il Azərbaycan vətəndaşları ilə əcnəbilər arasında 1813 nikah qeydə alınıb. Məlumatlara görə, onlardan 949-u Azərbaycan vətəndaşı olan qadınlarla xarici ölkə vətəndaşı olan kişilər arasında, 864-ü isə Azərbaycan vətəndaşı olan kişilərlə xarici ölkə vətəndaşı olan qadınlar arasında bağlanmış nikahlardır. Komitədən verilən məlumata görə, Azərbaycan vətəndaşı olan qadınlar əsasən Türkiyə, Rusiya Federasiyası və Gürcüstan vətəndaşları ilə, kişilər isə əsasən Rusiya Federasiyası, Gürcüstan və Ukrayna vətəndaşları ilə nikah bağlayıblar.
Əcnəbilərlə nikah bağlayan Azərbaycan vətəndaşı qadınların sayının kişilərdən üstün olması bəzi ekspertlər tərəfindən birmənalı qarşılanmır. Onlar hesab edirlər ki, qızlarımızın əncəbilərlə ailə həyatı qurması mental baxımdan daha ağrılıdır.
“Vəfa” Sosial İctimai Birliyinin sədri Fatimə Hacıbəyli mövzu ilə əlaqədar “Bakı-Xəbər”ə bildirdi ki, ümumiyyətlə, Azərbaycan qadınlarının əcnəbi vətəndaşlarla, digər millətlərin nümayəndələri ilə ailə qurması ilk növbədə genefondumuza zərbə vurur. Bundan başqa, o hesab edir ki, qadınlarımızın əcnəbi vətəndaşlarla evlənməsi sonrakı mərhələlərdə bəzən o qadınların insan alveri qurbanlarına çevrilməsi risqini artırır. İndiyə qədər əcnəbilərlə rəsmi nikaha daxil olan azərbaycanlı qadınların sonradan insan alveri qurbanına çevrilməsi faktlarının olduğunu deyən F.Hacıbəylinin sözlərinə görə, onlar burada nikaha daxil olub ailə qurduğu kişinin vətəninə getdikdə görürlər ki, ondan başqa kişinin daha 2-3 arvadı var. O hesab edir ki, bu kimi hallar mövcud olduğundan, qızlarımızın qeyri-azərbaycanlılarla evlənməsi bir çox hallarda uğurlu nəticə vermir. Bununla belə, F.Hacıbəyli qeyd etdi ki, bir neçə il əvvəllə müqayisədə son illər əcnəbi vətəndaşlarla nikaha daxil olan vətəndaşlarımızın sayı azalıb. “Əvvəlki illərdə əcnəbilərlə nikaha girənlərin sayı daha çox idi. Təsəvvür edin ki, son illər əcnəbilərlə nikaha girənlərin sayında müəyyən qədər azalma müşahidə edilir. 2009-cu ildə Azərbaycan vətəndaşı olan 1720 qız əcnəbilərlə nikaha girmişdi, amma bu il 1000-ə yaxın qız əcnəbiyə ərə gedib. 2011-ci ildə 2696 nəfər Azərbaycan vətəndaşı olan xanım əcnəbi kişi ilə nikaha girib. 2013-cü ildə Azərbaycan vətəndaşları ilə xarici ölkələrdən olan şəxslər arasında 2480 nikah bağlanıb. Ümumiyyətlə, illər üzrə müqayisə etdikdə əcnəbilərlə nikaha girənlərin sayının azalması diqqəti cəlb edir. Amma bu o demək deyil ki, bu rəqmlər bizi narahat etməməlidir. Nəzərə alaq ki, Azərbaycanda yaşayan əcnəbilərin xeyli bir qismi bizim qızlarla Azərbaycan vətəndaşlığı almaq üçün nikaha girir. Onlar zənn edirlər ki, azərbaycanlılarla nikaha girməklə ölkəmizdə vətəndaşlıq almağa nail olacaqlar.
Bizi narahat edən odur ki, Azərbaycanda ailə həyatı quran müasir gənclər əcnəbilərlə nikaha pis baxmırlar, onlar hesab edirlər ki, sevgi varsa, evlənmək də qaçılmazdır. Çox təəssüf ki, gənclər arasında beynəlmiləl ailə qurmağa meyl var. İstər qızlar, istərsə də oğlanlar bu addımı atmaqdan çəkinmirlər. Əvvəllər yenə də valideyn qınağı, qohum-qonşu töhməti nəzərə alınırdı, amma bu gün elə deyil. Bəzən bu cür nikahlarla bağlı müxtəlif hesabatlarda elə rəqəmlərə rast gəlirik ki, doğrudan da təəccüblənirik. Xaricdə təhsil alan qızların arasında da əcnəbilərlə nikaha girən azərbaycanlılar var. Özü də qeyri-azərbaycanlılarla nikaha girənlər arasında qızlar oğlanlardan bir neçə dəfə çoxluq təşkil edir. Statistik, sosioloji təhlil apararaq deyirik ki, əvvəlki illərlə müqayisədə bu rəqəm azalıb, amma bu bizdə arxayınçılıq yaratmamalıdır”.
O qeyd etdi ki, bəziləri əcnəbilərlə nikaha daxil olmağa iqtisadi problemlərinin həlli kimi baxır. Müsahibimiz hesab edir ki, qızlarımızın əcnəbilərlə nikaha maraq göstərməsində sosial şəbəkələrin də rolu az deyil. Qurum rəhbərinin sözlərinə görə, son illər mülki vətəndaşlar arasında əlaqələrin genişlənməsi və ölkəmizin beynəlxalq aləmə inteqrasiyası bu cür nikahların sayının artmasına səbəb olur.
İradə SARIYEVA
