Məlahət Mürşüdlü: “Bu fənnin orta məktəblərdə tədrisi acınacaqlı vəziyyətdədir”
Son zamanlar coğrafiya fənninin I, III ixtisas qruplarına salınması aktuallaşıb. Bir sıra coğrafiya mütəxəssisləri təklif edirlər ki, coğrafiya fənni qəbul imtahanlarına salınarsa, bunun çox müsbət əhəmiyyəti ola bilər. Mütəxəssislərin vurğuladığına görə, ali məktəblərin I, III qruplarında elə ixtisaslar var ki, orada təhsil alan tələbələrin, mütləq mənada, coğrafiyanı bilməsi vacibdir.
Tanınmış təhsil eksperti Məlahət Mürşüdlü “Bakı-Xəbər”ə bildirdi ki, ümumiyyətlə, tarix və coğrafiya fənlərinin qəbul imtahanlarına salınması çox vacibdir. M.Mürşüdlünün sözlərinə görə, coğrafiya fənninin I və III ixtisas qruplarına əlavə edilməsi vacib olsa da, bunu yaxın 1-2 ildə reallaşdırmaq çətindir. O, bu çətinliyi orta məktəblərdə coğrafiya fənninin zəif tədris edilməsi ilə əlaqələndirir. M.Mürşüdlünün bildirdiyinə görə, başqa fənlərlə müqayisədə orta ümumtəhsil məktəblərində coğrafiya fənninə çox az saat ayrılır. “Sözsüz ki, fənlər var ki, onların öyrənilməsi daha çox əhəmiyyət kəsb edir. Onlardan biri də coğrafiya fənnidir. Coğrafiyya fənninin qəbul imtahanlarına salınmasına tərəfdaram. Lakin bir məqamı qeyd edim ki, orta məktəblərdə coğrafiya fənninin tədrisinə çox az saat ayrılır. Elə siniflər var ki, orada həftədə 1, bəzi siniflərdə isə 2 dəfə keçirilir. Əgər biz günümüz üçün çox əhəmiyyətli olan coğrafiya fənnini qəbul imtahanlarına salmaq istəyiriksə, onda orta ümumtəhsil məktəblərinin tədris proqramlarında, tədris planlarında, dərsliklərində dəyişikliklər etməliyik. Bu istiqamətdə ciddi islahata ehtiyac var. Coğrafiya fənninin qəbul imtahanlarına salınması üçün orta məktəblərdə zəmin hazırlanmalıdır. Coğrafiya fənninin orta məktəblərdə əhəmiyyətli bir fənn kimi öyrədilməsi, tədris edilməsi çox vacibdir ki, biz onu yekun qiymətləndirmə kimi qəbul imtahanlarına salaq”. M.Mürşüdlünün sözlərinə görə, orta məktəblərdə coğrafiya fənninin tədris saatları artırılmalıdır və bu fənn şagirdlərə yüksək səviyyədə keçilməlidir ki, şagirdlər bu fənni öyrənmək üçün repititor yanına getməsinlər. “Bilirsiniz, məktəblərdə bu fənnin tədris keyfiyyətini qaldırmayınca, onu qəbul imtahanlarına salmaq olmaz. Çünki bu fənn növbəti qəbul imtahanına salınarsa, abituriyentlər repititor yanına gedəcəklər. Çünki mövcud məktəb prorqamı, planı abituriyentə istədiyi səviyyədə bu fənni öyrənmək imkanı vermir. Coğrafiya fənninin orta məktəblərdə tədrisi acınacaqlı vəziyyətdədir, əvvəlcə bunu düzəltməliyik. Mən bir müəllim kimi, bir vətəndaş kimi bu fənnin tədris səviyəsindən razı deyiləm, keyfiyyəti yüksəltmək lazımdır. Orta məktəblərdə coğrafiya fənninin tədris keyfiyyətinin yüksəlməsinə nail olduqdan sonra biz qəbul imtahanlarında bu fənni I, III ixtisas qruplarına əlavə edə bilərik” - deyə M.Mürşüdlü bildirdi.
İradə SARIYEVA
