Cəlil Xəlilov: “Şəhid ailələrinin, müharibə veteranlarının, əlillərin sosial problemlərinin həlli dövlətin daim diqqət mərkəzindədir”
Məlum olduğu kimi, Prezident Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında sərəncam imzalayıb.
Bu gün dövlətimiz tərəfindən Vətən uğrunda şəhid olmuş hərbi qulluqçuların ailələrinin sosial vəziyyətinin yaxşılaşdırılması istiqamətində müvafiq işlər görülür. Onlara birdəfəlik müavinət verilir, şəhid ailələri mənzil və ya avtomobillə təmin olunurlar.
Əmək və Əhalinin Sosial Müdafiəsi Nazirliyindən media nümayəndələrinə verilən məlumata görə, sərəncamla cari ildə əlavə olaraq minimum 300 mənzil alınmaqla, il ərzində Qarabağ müharibəsi əlilləri və şəhid ailələrinə verilən mənzillərin sayı 500-ü ötəcək.
Son 20 il ərzində şəhid ailələrinə, müharibə əlillərinə 5500-dən çox fərdi ev və mənzil, müharibə əlillərinə 6 mindən çox minik avtomobili verilib.
Respublika Veteranlar Təşkilatının sədr müavini, ehtiyatda olan polkovnik Cəlil Xəlilov bildirdi ki, şəhid ailələrinin, müharibə veteranlarının, əlillərin sosial problemlərinin həlli dövlətin daim diqqət mərkəzindədir. Prezident İlham Əliyevin bu təbəqələrdən olan insanların sosial rifah halının yaxşılaşdırılması məqsədilə ardıcıl imzaladığı fərman və sərəncamlar, dövlət başçısının tapşırığı əsasında hazırlanan mühüm sosial proqramlar onların etibarlı sosial müdafiə sisteminin formalaşmasına, hərtərəfli dövlət qayğısı ilə əhatə olunmalarına şərait yaradıb. Bu tədbirlər sırasında Qarabağ müharibəsi əlilləri və şəhid ailələrinin yeni mənzillərlə təminatı mühüm yer tutur”.
Həmsöhbətimizin sözlərinə görə, şəhid ailələri digər ailələrdən seçilməlidirlər. Vətən uğrunda canını qurban verənlərin ailələri başqa ailələrdən daha yaxşı yaşamalıdırlar. Onların heç bir sosial sıxıntısı olmamalıdır: “Sevindirici haldır ki, şəhid ailələrinə dövlət tərəfindən göstərilən diqqət artır. Onlara xüsusi münasibət bəslənir”.
C.Xəlilov onu da vurğuladı ki, şəhid ailələrinə birdəfəlik yardım verilir. Eyni zamanda, onların mənzil problemi də həll olunur. Şəhid ailələrinin sosial problemlərinin həll olunması sevindirici və qürurvericidir.
Günel CƏLİLOVA
