Sevda Sultanova: “Təsadüfi adamların dietoloq kimi xidmət göstərməsinin qarşısı alınmasa…”
Hər bir insan xarici görünüşünün daha yaxşı olmasına xüsusi önəm verir. Bəzən gözəl xarici görünüşə sağlamlığı bahasına nail olan insanlarla da rastlaşırıq. Son zamanlar insanlar gözəlliyi artıq çəkidən azad olmaqda, arıqlamaqda görürlər. Sözsüz ki, sağlam arıqlama yolunu seçənlər çox azdır.
Arıqlamaq istəyən insanların yaş statistikasına baxsaq görərik ki, onlar arasında gənc xanımlar xüsusi üstünlük təşkil edir. Düzdür, bu sırada orta yaşlı və yaşlı insanlar da var, amma gənclərlə müqayisədə onların sayı elə də çox deyil.
Bu gün sağlam arıqlamağın yolunu hər kəs bir cür görür. Bəziləri dietoloqlara müraciət edir, digərləri idmanla məşğul olur, eləcə də kolorili qidalanmadan imtina edirlər.
Hazırda paytaxtımızda dəbdə olan və özünün ən populyar dövrünü yaşayan peşə sahibləri dietoloqlardır ki, onların təklif etdiyi xidmətlərlə həm sosial şəbəkələrdə, həm də yerli TV-lərdə tanış ola bilirik. Yəni bu sahə ilə məşğul olanların sayı çoxdur, amma keyfiyyətli xidmət göstərənlər isə çox azdır.
Adını dietoloq qoyan bəzi şəxslər onlara müraciət edənlərə sırf “pul bankı” kimi baxır və bahalı xidmət təklif edirlər, nəticədə isə insanların sağlamlığı təhlükə altına düşür. Bəzi dietoloqlar pəhriz qaydaları ilə yanaşı, müştərilərə dərman da yazırlar.
Hətta bəzi mütəxəssislər hesab edirlər ki, ölkəmizdə müəyyən adamlar var ki, onlar “dietoloq biznesi” açıblar. Bu gün Azərbaycanda müxtəlif mərkəzlər, kabinetlər var ki, orada dietoloq xidmətləri göstərilir. Həmin xidmətlərdən isə xeyir görəndən çox, zərər çəkən var.
Həkim-terapevt Sevda Sultanova “Bakı-Xəbər”ə bildirdi ki, bu gün özünü “dietoloq” adlandıranların heç də hamısının göstərdiyi xidmət keyfiyyətli deyil. “Onlar müştərilərə müxtəlif qarışıqlar verir, bəzi idman hərəkətləri etməyi təklif edirlər. Təəssüf ki, bəzən onlara müraciət edənlərə mənşəyi bilinməyən, xaricdən gətirilən “arıqlatma dərmanı”ı da təyin edirlər. Bilirsiniz, onlar əvvəlcə insanların psixoloji vəziyyətini öyrənirlər, sonra onlara müalicələr, prosedurlar təyin edirlər. Təbii ki, artıq çəkidən əziyyət çəkən insanların, xüsusən də gənclərin psixoloji durumu çox zəifdir və köklük onlarda kompleks yaratdığı üçün, “dietoloq”un dediklərinə əməl edirlər. Ölkəmizdə peşəkar dietoloqlar çox azdır və bu sahədə ciddi islahatlara ehtiyac var. Düşünürəm ki, bu gün psixoloji xidmət sahəsində baş verən qanuni nizamlama bu sahəyə də sirayət etməlidir. Təsadüfi adamların dietoloq kimi xidmət göstərməsinin qarşısı alınmasa, bunun daha çox fəsadları olacaq”.
S.Sultanova vurğuladı ki, insanların hamısının orqanizmi, sağlamlıq durumu, psixoloji vəziyyəti eyni deyil. Onun sözlərinə görə, pəhriz təyin edən dietoloq insan orqanizmində hansı mikroelementlərin çatmadığını, hansı səbəbdən sürətli çəki artımının getdiyini müəyyən etməlidir ki, sonradan bunun fəsadları olmasın.
İradə SARIYEVA
