Yeni il bayramı və Dünya Azərbaycanlılarının Həmrəyliyi gününə az müddət qalıb. Yeni il bayramı münasibətilə paytaxtın bir sıra ərazilərində bayram yarmarkalarına start verilib. Məlumat üçün bildirək ki, bayram yarmarkaları əsasən şəhərdə, metrostansiyaların qarşısında quraşdırılıb.
Hazırda Nəsimi rayonu ərazisində 6, Nərimanov rayonu ərazisində 5, Yasamal rayonu ərazisində 3, Binəqədi rayonunda 2, Nizami rayonunda 6, Xətai rayonunda 1 olmaqla, ümumilikdə, 12 ərazidə 23 bayram çadırı qurulub.
Çadırlarda əsasən yeni il hədiyyələri və meyvə-tərəvəz məhsulları satılır. Qeyd edək ki, yarmarkaların təşkil edilməsində əsas məqsəd bayram ərəfəsində küçələrdə pərakəndə satışın qarşısını almaq və bazar qiymətlərinə nisbətən ucuz məhsullar təqdim etməkdir.
Bayram çadırlarında alış-veriş hər gün səhər saatlarından başlayır. Çadırlarda satılan bayran aksesuarlarının qiyməti və oradakı vəziyyətlə tanış olmaq üçün şəhərin bəzi ərazilərində quraşdırılmış yarmarkalara baş çəkdik.
"28 May" metrostansiyasının qarşısında açılan yarmarkaya baş çəkib, qiymətlərlə maraqlandıq. Qeyd edək ki, bayram çadırlarında yeni il ab-havası hiss olunur. Birinci diqqətimizi bayram atributu olan süni küknar ağaclarının (“Yolka”) qiymətləri cəlb etdi. Məlumat üçün bildirək ki, çadırlarda satılan “yolka”ların qiyməti ölçüsünə, rənginə və bəzəyinə görə fərqlənir. “Yolka”ların qiyməti 5 manatdan 120 manata qədər dəyişir. Müşahidələrimiz zamanı məlum oldu ki, alıcılar daha çox orta ölçülü süni küknar ağacına üstünlük verirlər. Onların isə qiyməti 35-50 manat arasında dəyişir.
“Yolka” ağacının bəzədilməsində istifadə olunan rəngarəng oyuncaqların qiyməti 5 manatdan başlayır. Bəzəkli oyuncaqların qiyməti 5-15 manat arasındadır. “Yolka” ağacında istifadə olunan zərlər isə 2-3 manat dəyərindədir.
Şaxta baba geyimlərinin qiyməti ölçüyə görə dəyişir. Balaca uşaqlar üçün sözügedən geyimin qiyməti 10 manatdır. Yaş artdıqca, qiymət də yüksəlir. 18 yaşdan yuxarı olanlar üçün isə şaxta baba geyimi 45-60 manatdır. Oyuncaq şaxta babaların qiymətidə ölçüsünə görə dəyişir. Belə ki, bu aksesuarın qiyməti 8-25 manat arasında dəyişir.
Bayram suvenirləri fərqli qiymətədir. Məlumat üçün bildirək ki, ən ucuz suvenir 1, ən bahalısı isə 15-25-30 manata alıcılara təklif edilir.
Açıqlanan məlumatlara görə, 2019-cu ilin simvolu torpaq sarısı rəngdə donuz (qaban) olacaq. Adıçəkilən heyvanın üzərində il təslim olduğu üçün, ona bənzər müxtəlif formada oyuncaqlara rast gəlmək olar. Həmin oyuncaqların qiyməti isə müxtəlifdir. Təbii ki, ölçü, rəng, keyfiyyət və həmin oyuncağın səsli olub-olmamasına görə qiymətlər dəyişir. Qiymətlər əsasən 1manatdan 30 manata kimi dəyişir.
Satıcılar belə bir bayram yarmarkasının keçirilməsindən razı qaldıqlarını bildirirlər. Alıcı sayının bol olduğunu satıcılar dilə gətirir. Satıcıların sözlərinə görə, dekabrın 4-dən qurulan çadırlarda satış yüksək səviyyədədir. Onlar qeyd edirlər ki, bayrama 1 həftə qalmış alıcı sayı daha çox olacaq: “Hazırda sakinlər daha çox qiymətlərlə maraqlanmaq üçün yarmarkalara baş çəkirlər. Real alıcılar isə qiyməti ucuz olan məhsullara üstünlük verirlər”.
Alıcılarla söhbət zamanı məlum oldu ki, onlar şəhərdə mövcud olan mağazalardan deyil, bayram çadırlarından yeni il aksesuarlarını almağa üstünlük verirlər. Alıcılar qeyd edirlər ki, mağazalarda yeni il aksesuarlarının qiyməti bayram çadırlarından bir neçə dəfə bahadır: “Çadırlarda 100 manata satılan süni küknar ağacı mağazalarda 300 manatadır. Bu səbəbdən də hər kəs çadırlardan bayram bazarlığını etməyə üstünlük verir. Qiymətlər münasibdir və çeşid çoxdur”.
Məlumat üçün bildirək ki, bayram yarmarkaları 2019-cu il yanvarın 3-nə qədər davam edəcək.
Günel CƏLİLOVA
