Seyid Camal Əzimbəyli: “İlahiyyat İnstitutu Azərbaycanın mənəvi mühitinə yeni bir nəfəs gətirəcək”
Məlum olduğu kimi, Bakıda Azərbaycan İlahiyyat İnstitutunun (Aİİ) açılış mərasimi keçirilib. Qeyd edək ki, 2018-2019-cu tədris ilində dövlət sifarişi əsasında qəbul üzrə Aİİ-nin islamşünaslıq ixtisasına 35, dinşünaslığa isə 25 plan yeri təsdiq edilib. Bu plan yerləri 100 faiz dolub.
Aİİ-nin rektoru, ilahiyyat üzrə fəlsəfə doktoru Ceyhun Məmmədov açılış mərasimində çıxış edərək bildirib ki, institutun dinşünaslıq və islamşünaslıq ixtisasları üzrə təhsil standartları Təhsil Nazirliyinə təqdim edilib və nazirliyin müvafiq şöbəsindən müsbət rəy alınıb. Hazırda institutda bir fakültə, üç kafedra mövcuddur: “İnstitutda tədris Azərbaycan dilində həyata keçirilir. Gələcəkdə rus, ingilis və ərəbdilli bölmələrin açılması və dünyanın müxtəlif ölkələrindən tələbələrin institutda təhsilə cəlb olunması nəzərdə tutulur”.
Açılış mərasimində iştirak edən Azərbaycan din xadimləri Prezidentə müraciət ünvanlayıblar. Müraciətdə qeyd olunur: “Azərbaycan İlahiyyat İnstitutunun istər islam dini, istərsə də digər dünya dinlərini dərindən bilən, dövlətçiliyin keşiyində duran yüksək ixtisaslı dinşünas və islamşünas kadrlar hazırlayaraq, təkcə Azərbaycan deyil, bütün dünyada tanınan ali təhsil müəssisələrindən birinə çevriləcəyinə inamlarını ifadə edən müraciət müəllifləri Azərbaycanda milli-mənəvi dəyərlərin qorunmasına, multikulturalizm və tolerantlıq ənənələrinin möhkəmləndirilməsinə göstərilən qayğının əyani göstəricisi olan Azərbaycan İlahiyyat İnstitutunun yaranması haqqında imzaladığı sərəncama görə Prezident İlham Əliyevə dərin təşəkkür və minnətdarlıqlarını bildirirlər”.
İlahiyyat İnstitutunda tək islam dininin deyil, digər dinlərin də tədris olunması Azərbaycanın tolerant ölkəsi olmasını bir daha nümayiş etdirir.
Şərqşünas-alim Seyid Camal Əzimbəyli “Bakı-Xəbər”ə açıqlamasında qeyd etdi ki, yeni yaradılan İlahiyyat İnstitutunda islam dinindən əlavə, digər dinlərin də tədris olunması təqdirəlayiqdir: “Ali təhsil müəssisəsində digər dinlərin də tədris olunması Azərbaycanın multikultural dəyərlərə, tolerantlığa sahib olmasının əyani sübutudur. Uzun illərdir Azərbaycanın dini mühitində boşluq var idi. Hətta islamın təməl prinsipinə aid olmayan insanlar boşluqdan istifadə edərək xurafatın və cəhalətin artmasına səbəb olurdular. Hesab edirəm ki, İlahiyyat İnstitutunda yetişəcək yerli kadrlar Azərbaycanın dini mühitindəki boşluqların doldurulmasına zəmin yaradacaq”.
Həmsöhbətimiz onu da vurğuladı ki, İlahiyyat İnstitutunda digər dinlərin də tədris olunması və ya təmsilçilərinin ölkəmizdə təhsil alması Azərbaycanda dinlərarası, millətlərarası, təriqətlərarası tolerantlığa dövlətin göstərdiyi münasibətdir.
S.C.Əzimbəyli ümid edir ki, İlahiyyat İnstitutu Azərbaycanın mənəvi mühitinə yeni bir nəfəs gətirəcək.
Günel CƏLİLOVA
