Aytac Qəribqızı: “Atam yaşasaydı 70 yaşı olacaqdı, amma nəşi də hələ ki tapılmayıb, məzarı da yoxdur”
Dekabrın 29-u Birinci Qarabağ müharibəsi şəhidi leytenant rütbəli həkim-cərrah Həsənov Qərib Müzəffər oğlunun 70 yaşı tamam oldu.
Nəşi bugünə qədər tapılmayan, itkin düşən, şəhid statusu alan əslən Qubadlı rayonunun Eyvazlı kəndindən olan Qərib Müzəffər oğlu Həsənov 1955-ci il dekabrın 29-da Sumqayıt şəhərində doğulub. Sumqayıt şəhərində yerləşən 18 nömrəli orta məktəbdə təhsil alıb. Rusiyanın Leninqrad (Sankt-Peterburq) şəhərində hərbi həkim vəzifəsinə yiyələnib. Təhsilini başa vurduqdan sonra Azərbaycana qayıdıb və Hacı Zeynalabdin Tağıyev qəsəbəsində yerləşən hərbi hissədə hərbçi həkim vəzifəsində çalışıb. XXI əsrin dəhşətli hadisələrindən olan Xocalı faciəsindən sonra Milli Orduya yazılıb.
1992-ci il iyunun 17-də itkin düşməsi xəbəri gəlib.
Qeyd edək ki, Qərib Həsənov Ağdamın Sırxavənd kəndi uğrunda gedən döyüşlərdə iştirak edib, bu döyüşdə təkbaşına 13 yaralını xilas edib. “Yaralı adam atama deyib ki, mənim üç uşağım var, məni burda qoyub getmə. Atam o adamı meşədə ağaca söykəyib deyib ki, narahat olma, mən gəlib səni aparacağam. Ona verdiyi sözü yerinə yetirmək üçün geri meşəyə qayıdır və onunla da ondan soraq verən olmur. Atam 13 nəfər yaralını təkbaşına xilas edib. 37 yaşı vardı atamın. Siması yadımda qalmayıb. Atam yaşasaydı 70 yaşı olacaqdı, amma nəşi də hələ ki tapılmayıb, məzarı da yoxdur. Heç nə istəmirəm, bircə barmağını da tapıb versələr təsəlli taparam...”-deyə Qərib Həsənovun qızı Aytac baki-xeber.com-a bildirib.
Qeyd edək ki, leytenant rütbəli həkim-cərrah Həsənov Qərib Müzəffər oğlu haqda 33
ildir heç bir xəbər yoxdur. İtkin şəhidin Aytac və Ümidə adlı iki qızı yadigar qalıb.
İradə SARIYEVA
