Azərbaycan xalqı 44 günə düşməni məğlub edərək şanlı qələbə qazandı. Bu müqəddəs, şərəfli yolda minlərlə qeyrətli Vətən övladı öz canında keçdi. Onların adları qəhrəmanlıq dastanına dönərək böyük iftixarla, qürurla çəkilir. Belə ölümsüzlüyə qovuşan oğullardan biri də 2001-ci il oktyabrın 15-də Cəlilabad rayonunun Alar kəndində anadan olan Əkbər Azər oğlu Hüseynlidir.
Uşaqlıqdan Vətənə, torpağa, bayrağa bağlı boy atan Əkbər doğma kəndində H. Əliyev adına 1 saylı orta məktəbi bitirib təhsilini Bakı Dövlət Sosial-İqtisadi Kollecində davam etdirib. Lakin cənnət-məkan Qarabağımızın düşmən işğalında qalması ilə barışmayan Əkbər 2019-ci ildə təhsilini yarımçıq qoyaraq könüllü hərbi xidmətə yollanıb. Əsgərliyə cəbhə bölgəsindən başlayıb. Adına can dediyi Azərbaycanın hər guşəsini özünə əziz bilən əsgərin ən böyük arzusu düşmənə əsir düşən Qarabağımızın azad edilməsi və lazım gələrsə, bu müqəddəs yolda canında belə keçmək olub.
Əsgər Əkbər komandirlərin verdiyi tapşırıqlara ürəklə yanaşıb, onları vaxtında və düzgün yerinə yetirib. Qatıldığı vacib təlimlərdə də bir qayda olaraq fərqlənib və əla döyüşçü keyfiyyətləri göstərib. Bunları ona görə edib ki, məqamı gələndə müharibə meydanında erməni dığalarına yerini göstərə bilsin. Həmçinin əsgərlər arasında keçirilən müxtəlif idman yarışların dəfələrlə qalibi olub.
Əkbər illərlə ürəyində bəslədiyi arzusuna 2020-ci il sentyabrın 27-də yetib. Belə ki, Ali Baş Komandan döyüş əmrini verib. Yağıdan Qarabağımızın azad edəcəyi məqam gəlib. İgid Vətən oğlu İkinci Qarabağ müharibəsinin ilk gün savaş meydanına atılıb. Onun qələbə sorağı ən qaynar yerlərdən gəlib. Cəbrayılda, Füzulidə gedən döyüşlərdə əsl qəhrəmanlıq nümayiş edib. Murov uğrunda haqq savaşımızda göstərdiyi hünərlə döyüş yoldaşlarını heyrətə salıb. Həmçinin ağır keçən vuruşmada qolundan yaralanıb, əsgər yoldaşların təkidinə baxmayaraq, o, müharibə meydanından geri çəkilməyib. Komandası ilə bərabər xeyli irəliləyərək düşmənin çox sayda hərbi qulluqçusunu məhv edib, texnikasını sıradan çıxarıb. Son damla qanına qədər vuruşub və qeyrətli, Vətənə bağlı oğul kimi oktyabrın 3-də Azərbaycanın müqəddəs bir parçası olan Qarabağımızın azadlığı yolunda şəhadətə ucalıb. Bu şərəfli ölümü ilə milyonların ürəyində özünə əzəmətli abidə ucaldan Murov qartalı həm də dövlət tərəfindən “Vətən uğrunda”, “Cəsur döyüşçü” və digər medallarla təltif olunub.
Bəli, öz qanları bahasına Azərbaycanın yeni, şanlı tarixini yazan Əkbər kimi qəhrəman oğullar qısa ömür yaşasalar da, qərinələr ötsə, nəsillər bir-birini əvəz etsə belə heç vaxt unudulmur...
Zəfər ORUCOĞLU Azərbaycan Jurnalistlər Birliyinin üzvü
