Müəllimlərin İşə Qəbulu (MİQ) imtahanları ilə bağlı günlərdir ki, şikayətlər səngimək bilmir. İmtahanda iştirak edən namizədlər sualların çətin olması ilə bağlı narazılıq edir. Onlar sosial şəbəkədə narazılıq edərək bildirir ki, suallar məzmuna uyğun verilmir. İmtahan verib çıxmış müəllimlərin hamısı imtahanlarda nöqsanların olduğunu qeyd edirlər.
Onu da qeyd edək ki, hər il müəllimlərin işə qəbul imtahanında təxminən 50-60 min namizəd iştirak edir. Vakant yer sayı 7-8 mindir. Iddia olunur ki, vakant yerlərin sayı süni şəkildə gizlədilir. Ekspertlər hesab edir ki, vakant yerlərin sayının gizlədilməsinə səbəb bu sahədə güclü rəqabətin yaranmasıdır.
Ekspertlər bildirir ki, hər il müəllimlərin işə qəbul imtahanında müəyyən problemlər yaranır. Bunlardan ən başlıcası isə vakansiya yerlərinin gizlədilməsidir. İmtahanda təxminən 50-60 min müəllim iştirak edir. Vakant yerlər isə 8-9 min olur. Təəssüf ki, vakant yerlər direktorlar, yaxud da aidiyyəti şəxslər tərəfindən gizlədilir. Həmçinin direktorlar vakant yerləri rüşvət müqabilində kiməsə satırlar.
Ümumiyyətlə, son zamanlar müəllimlərin işə qəbulu ilə bağlı səslənən narazılıqların sayı-hesabı yoxdur. Əsas şikayət isə imtahana düşən sualların olduqca çətin olması və ixtisas üzrə məzmuna aid olmamasıdır.
Elşən Qafarov: “Müəllimlərin işə qəbul imtahanı sualları bilərəkdən çətinləşdirilir, məzmuna uyğun verilmir”
Təhsil eksperti Elşən Qafarov bildirdi ki, müəllimlərin işə qəbul imtahanı sualları bilərəkdən çətinləşdirilir, məzmuna uyğun verilmir: “Bütün bunlar kommersiya məqsədi daşıyır. Təəssüf ki, bunu edənlər məhz nazirliyin struktur bölmələrində çalışan, vəsait hazırlayan şəxslərdir. Maddi maraq güdürlər ki, müəllimlər gedib onların hazırladığı həmin kitabı alsınlar”.
Kamran Əsədov: “Müəllimlərin bilik və bacarıqlarının diaqnostik qiymətləndirilməsi zamanı müxtəlif vaxtlarda imtahanlarda istifadə edilən suallar arasında kəskin çətinlik fərqi sonda…”
Təhsil eksperti Kamran Əsədov isə qeyd etdi ki, uzun illər mərkəzləşmiş müsabiqələrin test imtahanı mərhələsinin suallarındakı səhvlər, imtahan seanslarındakı sualların çətinlik səviyyələrinin fərqliliyi və imtahan suallarının əvvəlcədən müdavimlərə dolayısı yolla ötürülməsi halları mövcud olub. Müəllimlərin bilik və bacarıqlarının diaqnostik qiymətləndirilməsi zamanı müxtəlif vaxtlarda imtahanlarda istifadə edilən suallar arasında kəskin çətinlik fərqi sonda onun əsasında ədalətsiz dərs bölgüsü formasında özünü göstərdi: “Təhsil Nazirliyi 2020-ci ildə MİQ imtahanları üçün tədris metodikasına və təlim strategiyalarına aid proqram tərtib edib ictimailəşdirdi. Bu proqram əvvəllər nəşr edilən vəsaitlərin mövzusundan tamam uzaq olduğu və bu mövzuların bəzisinə aid ümumiyyətlə material tapmaq mümkün olmadığı üçün müəllim olmaq istəyənlər çətinlik qarşısında qaldılar. Lakin qısa müddət sonra "Təhsildə Araşdırma və İnkişaf Mərkəzi” adlanan özəl kursun rəhbəri olan təlimçi İlkin Həsənov və “Maksimum Tədris Mərkəzi” adlanan digər kursun təlimçisi Aynur Rüstəmovanın həmmüəllifliyi ilə müəllimlərin işə qəbulu və sertifikasiyası ilə bağlı yeni proqramı tam əhatə edən bir vəsait işıq üzü gördü. Müəllimlərin İşə Qəbul müsabiqəsinə az vaxt qaldığı üçün bu kitab sürətlə yayıldı və baha qiymətə də satıldı. Bu vəsaitin elmi redaktoru Təhsil İnstitutunun o vaxt Təhsil İşçilərinin Peşəkar İnkişafı Mərkəzi adlanan qurumunun direktoru Nəzakət Mehdiyeva və o vaxtlar Təhsil İnstitutunun Metodik Dəstək Mərkəzinin Əlaqələndirmə şöbəsinin müdiri olan Elxan Nəcəfov idi. İndi siz təsəvvür edin, Təhsil nazirinin əmri ilə MİQ müsabiqəsinin test imtahanı mərhələsinin imtahan suallarını hazırlamalı olan nazirlik strukturunun rəhbər şəxsləri həm də imtahana hazırlaşmaq üçün hansısa özəl kursa aid vəsaitin elmi redkatorlarıdır. Məhz bu amil MİQ müsabiqəsinə hazırlaşan müdavimlərdə sualların həmin vəsaitdən düşməsi ehtimalına görə onu almağa meyl yaratdı. Bu kitabın qısa müddətə nəşri sübut etdi ki, müəlliflər əvvəlcədən vəsaiti hazırlamışlar və MDPİM rəhbərliyi də MİQ müsabiqəsi proqramını məhz o vəsaitin əlyazması üzərindən hazırlamışdır. Məhz ona görə MİQ imtahanları üçün tədris metodikasına və təlim strategiyalarına aid proqram rəsmən ictimailəşdiriləndən qısa müddət sonra güya bunun əsasında sözügedən vəsait hazırlanıb nəşr edildi. Maraqlı cəhət həm də odur ki, Təhsil Nazirliyinin karantin dövründəki onlayn resurslarından məhz bu kitabın həmmüəllifləri müəllimlərə pulsuz təlim keçmək adı altında öz kommersiya maraqlarına xidmət etmiş oldular”.
Günel CƏLİLOVA
