Ramil Hüseynov: “Ona görə ki, Qərb rəsmi olmasa da, qeyri-rəsmi işğalı dəstəkləyirdi”
Ermənistan təkbaşına deyildi. Ermənistan təkbaşına olsaydı, bu məsələ çoxdan həll olunardı. Bu barədə Prezident İlham Əliyev Bakıda beynəlxalq konfransların iştirakçıları ilə görüşündə bildirib.
Ölkə başçısının fikrincə, o vaxt bu işğala, bu vəhşiliyə, bu soyqırımına görə Ermənistana beynəlxalq sanksiyalar tətbiq edilsəydi, məsələ çoxdan həll olunardı: “Eləmədilər, bilərəkdən, qəsdən. İndi yeri gəldi-gəlmədi, hər yerə sanksiyalar qoyulur. Amma yaxşı, Ermənistan burada başqa dövlətin 20 faiz torpağını zəbt edib, 700 min insanı oradan qovub, 250 min insanı - azərbaycanlıları Ermənistandan qovub, dağıdıb hər şeyi, bütün şəhərləri. Sən niyə ona sanksiya tətbiq etmirsən?”.
Sözügedən məsələni baki-xeber.com-a şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Qərb məqsədyönlü şəkildə Ermənistanın işğalına göz yumdu: “Ona görə 30 illik işğal dövründə Ermənistana qarşı sanksiya tətbiq edilmədi. Ermənistana yönəlik elə böyük miqyaslı sanksiyaların tətbiq olunmasına da ehtiyac yox idi. Hansısa kiçik miqyaslı sanksiyalar belə kifayət idi ki, Ermənistan geri addım atsın və işğala son qoysun. Çünki Ermənistan Rusiya, İran kimi böyük dövlət deyildi ki, sanksiya təzyiqlərinə dözsün. Ermənistana ciddi bir təzyiq kifayət idi ki, problem həll edilsin və bu qədər uzanmasın. İşğal dövründə heç olmasa bir dəfə olsun işğalçı ilə işğala məruz qalan tərəfə hansısa formada fərq qoyulmadı. Niyə? Ona görə ki, Qərb rəsmi olmasa da, qeyri-rəsmi işğalı dəstəkləyirdi. Mənasız və nəticəsiz danışıqları təşkil etməklə Azərbaycanı zamanla işğalla barışmağa məcbur etmək istəyirdilər. Strategiya bunun üzərində qurulmuşdu. Ancaq Azərbaycanın təzyiqlərə duruş gətirməsi, zamanla toparlanması, qüvvələrini səfərbər etməsi onların planlarını pozdu. O cümlədən, 2020-ci ildə ərazilərimizi azad etmək üçün yaranan əlverişli geosiyasi vəziyyət də mühüm rol oynadı. Pandemiya, Birləşmiş Ştatlarda seçki kampaniyası və digər amillər müharibədə bizim xeyrimizə işlədi. Təəccüblüsü odur ki, başda Fransa olmaqla Avropanın bir sıra qurumları bizə qarşı ard arda bir sıra qərarlar qəbul etdilər. Halbuki, Azərbaycan beynəlxalq hüquqa dayanaraq ərazi bütövlüyünü, suverenliyini bərpa edirdi. Bütün bunlar əlbəttə ki, Qərbin iç üzünü və əsil simasını ortaya qoydu”.
Vidadi ORDAHALLI
