İnsan psixikasına, onun normal yaşayışına mənfi təsir göstərən normadan artıq səs-küy son illər Bakı şəhəri üçün də xarakterik hala çevrilib. Paytaxtda səs-küy çirklənməsi yaradan obyektlər sırasına şadlıq evləri və restoranlar da daxildir. Belə obyektlərin bir çoxunun yaşayış binalarına yaxın yerləşməsi sakinlərin normal sakit həyatını pozur.
Araşdırmalar zamanı məlum olub ki, toy və digər şənlik mərasimlərinin keçirildiyi əksər şadlıq evləri və restoranlarda akustika düzgün qurulmayıb. Nəticədə akustikası normalara cavab verməyən şadlıq saraylarında ətrafa yayılan səs çirklənməsi həm toya çağırılan qonaqlara mənfi təsir edir, həm də bu restoranların yaxınlığında yaşayan sakinlərin sakitliyini pozur.
Qeyd edək ki, bir neçə il öncə şadlıq evlərində səs gücü və süfrəyə təqdim edilən təamlarla bağlı standartlar müəyyən olundu. Həmin standartlara əsasən, şadlıq evlərinin akustikası ilə bağlı tələblərdə səs gücü maksimum 85 desibel olmalıdır. Ancaq reallıqda mütəxəssislər şadlıq evlərinin əksəriyyətində 200-300 desibel arasında səs gücündən istifadə olunduğunu bildirirlər.
Onu da bildirək ki, şadlıq evlərinin yaxınlığında yaşayan sakinlər dəfələrlə restoran rəhbərliyinə məlum problemlə bağlı şikayət etsələr də, onlara səsin yüksək olması barədə “yuxarıdan” tapşırıq gəldiyi deyilir. Hökumətin bu məsələdə nə marağı var ki, restoranda musiqi yüksək səslənsin? Ekspertlər bildirir ki, şadlıq evləri səs gücünü 200-300 desibel arasında istifadə etməklə hökumətə qarşı təxribat edirlər.
Eyyub Hüseynov: “Şadlıq saraylarının təsnifatı və Qaydaları"na əsasən, bu qapalı məkanda səs desibeli gözlənilməlidir, ancaq...”
Azad İstehlakçılar Birliyinin (AİB) sədri Eyyub Hüseynov qeyd etdi ki, 2012-ci ildə "Şadlıq saraylarının təsnifatı və Qaydaları"na əsasən bu qapalı məkanda səs desibeli gözlənilməlidir. Qanun-qayda olsa da, təəssüflər olsun ki, işlək deyil.
AİB sədrinin sözlərinə görə, şadlıq saraylarında səs desibeli ilə bağlı normaların gözlənilməməsinin səbəblərindən ən başlıcası hökumətin səhv siyasət yürütməsidir: “Çünki biznes qurumları üçün toxunulmazlıq siyasəti formalaşıb. Heç kəs onları yoxlaya, antireklam edə bilmir. Belə bir şəraitdə də şadlıq sarayları vəziyyətdən sui-istifadə edirlər. Onlar səsi yüksəltməklə çalışırlar ki, qonaqlar ordan tez getsinlər. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti şadlıq saraylarında səs normasının qorunub-qorunmamasına nəzarət etməlidir”.
Aytəkin Kamranqızı: “Bəzi şadlıq evlərinin sahibləri səsin yüksək olmasının yuxarının göstərişi ilə olduğunu iddia edir, ancaq onların bu fikrinə özlərindən başqa heç kim inanmır”
Sosioloq Aytəkin Kamranqızı qeyd etdi ki, restoran və şadlıq evlərində səs desibeli gözlənilməlidir. Ancaq iaşə obyektləri qayda-qanuna məhəl qoymayıb, səsi normadan artıq səsləndirir: “Bəzi şadlıq evlərinin sahibləri səsin yüksək olmasının yuxarının göstərişi olduğunu iddia edir. Ancaq onların bu fikrinə özlərindən başqa heç kim inanmır. Hökumət rəsmilərinin bu məsələdə nə marağı ola bilər ki, şadlıq evləri musiqini yüksək səslə yaysın? Nəzərə almaq lazımdır ki, hökumət bununla bağlı xüsusi qayda müəyyən edib. Yaxşı olar ki, aidiyyəti qurumlar şadlıq evlərində yoxlama aparsın, hansı restoran normadan artıq səsi yayırsa həmin məkanın fəaliyyəti dayandırılsın. Belə olarsa şadlıq evləri insanların rahatlığını pozmaz”.
Günel CƏLİLOVA
