“Numbeo” portalında “Çirklənmə indeksi – 2022” (“Pollution Index 2022”) adlı hesabat yayılıb. Hesabatda dünyanın çirkli şəhərlərinin adı yer alıb. Burada qeyd olunur ki, 353 şəhərin yer aldığı siyahıda çirklənmənin ən az səviyyədə olduğu şəhər Norveçin Stavanger şəhəridir. Siyahıda ilk sırada olan Tetova şəhərində çirklənmə səviyyəsi 100 üzərindən 95,56 olaraq qeyd olunub. Stavanger şəhərində isə çirklənmə səviyyəsi 12,29 olaraq göstərilir.
Hesabatda Azərbaycanın paytaxtı Bakı da yer alıb. Bakı çirklənmə səviyyəsinə görə 353 şəhər arasında 74-cü sırada qərarlaşıb. Paytaxtımızın çirklənmə indeksi 75,61 olub.
Maraqlıdır, paytaxt Bakının çirklənməsində vətəndaşların rolu var, yoxsa tikinti şirkətlərinin?
“Paytaxtda kortəbii tikinti işləri aparılır, avtomobillərin sayı artır və şəhərin təsərrüfat işlərinə cavabdeh olan şəxslər öz vəzifələrinə məsuliyyətsiz yanaşır”
Ekoloq Flora Hacıyeva qeyd etdi ki, Bakının çirkli şəhər siyasında yer almasına səbəb şəhərdə kütləvi şəkildə söküntü və tikinti işlərinin aparılmasıdır. Eyni zamanda Bakıda köhnə avtomobillərin həddən artıq olması da şəhərin çirklənməsinə gətirib çıxarıb: “Beynəlxalq ekoloji təşkilatlar indiyədək bir neçə dəfə öz hesabatlarında Azərbaycan paytaxtını “Dünyanın çirkli şəhərləri” siyahısına daxil edib. Doğrudan da, məişət tullantılarının yığılıb qalması, aşıb-daşan zibil qutularının vaxtlı-vaxtında təmizlənməməsi paytaxtın görkəminə ciddi xələl gətirir. Belə xoşagəlməz vəziyyətlə Bakının, demək olar, əksər küçələrində rastlaşmaq olur. Bakı dünyada bəlkə də yeganə şəhərdir ki, bircə metrliyində yekə bir zibillik var. Həmin zibillikdən hər gün paytaxtın müxtəlif ərazilərinə xoşagəlməz üfunət yayılmaqdadır. Halbuki, hər il dövlət büdcəsindən Bakının təmizliyi ilə əlaqədar mənzil-istismar sahələrinə milyonlarla manat pul ayrılır”.
Bakının çirkli şəhər kimi beynəlxalq hesabatda yer almasının əsas səbəbinə gəlincə, ekspert dedi ki, paytaxtda aparılan kortəbii tikinti işləri, avtomobillərin sayının artması və şəhərin təsərrüfat işlərinə cavabdeh olan şəxslərin öz vəzifələrinə məsuliyyətsiz yanaşmaları deyilən nəticəni şərtləndirib. Həqiqətən son illər Bakı zibil içində batıb gedir. Heç kəs məsələ ilə maraqlanmır.
Ekoloqun sözlərinə görə, təkcə Bakıda yox, Azərbaycanın bütün ərazisində yaşıllıq sahələri əhali sayı ilə müqayisədə azdır. Vaxtilə Azərbaycanda adambaşına düşən yaşıllıq sahəsi 7 kv.m idisə, indi bu göstərici aşağı düşüb: “Doğrudur, yaşıllaşdırma ilə bağlı yeni layihələr həyata keçirilir, parklar salınır, ağaclar əkilir, amma bütün bunlar yetərli deyil. Çünki bir tərəfdən qururuqsa, digər tərəfdən çoxillik ağacları kəsirik və yaşıllqıları məhv edirik. O qədər ağaclar qırılıb ki, Bakı boz şəhər olub. Avropa ölkələrində yaşıllıqların sahəsi ona görə çoxdur ki, bir bina tikilirsə, onun ətrafında az qala meşəlik salınır. Ağacların kəsilməsinə hər kəs etiraz etməlidir, insanlar özləri könüllü kütləvi ağacəkmə kampaniyalarına qoşulmalıdırlar”.
Günel CƏLİLOVA
