İllər öncə tikilən və tikintisinə dövlət büdcəsindən milyonlar ayrılan Bakı-Quba-Rusiya dövlət sərhədi avtomobil yolunun dağıdılması ilə bağlı yeni görüntülər yayılıb.
Görüntülər ətrafında gedən müzakirələrdən görünür ki, dövlət büdcəsindən zamanında 641 milyon manata yaxın vəsait xərclənmiş yol çox bərbad vəziyyətdədir.
Məlum olur ki, Bakı-Quba-Rusiya dövlət sərhədi avtomobil yolunun yenidənqurulması layihəsində Azərbaycan tərəfinin payının (182 km hissə) maliyyələşdirilməsinə 2005-2010-cu illərdə 625,7 milyon manat xərclənib. Bundan başqa, 15 milyon manatdan çox vəsait isə həmin yolla bağlı digər xərclərə (yol qovşaqlarının, körpülərin tikintisi) yönəldilib. Ümumilikdə 641 milyon manata yaxın vəsait edir. Bunlar hələ Azərbaycanın ödədiyi puldur. Layihə Dünya Bankının Azərbaycan hökuməti ilə birgə layihəsidir. İndi bu yol dağıdılıb. Belə çıxır ki, milyonların xərcləndiyi yol heç nə olmamış kimi dağıdılır və növbəti milyonlar hesabına yenidən qurulur. Yolun bu vəziyyətə düşməsinə görə iş icraçıları niyə məsuliyyətdən kənarda qalır?
Hüquqşunas Mehman Muradlı “Bakı-Xəbər”ə açıqlamasında bildirdi ki, beton yol elə günə düşüb, sürücülər hər addımbaşı çuxurları, dağılmış yerləri ziqzaq edib keçməyə çalışır: “Nəticədə qəza yaranır. Qubadan Bakıya qayıdan istiqamət tamamilə dağılıb. Hər kilometrinə milyonlarla pul xərclənən və 35 il zəmanət verilmiş Bakı-Quba yolu istifadəyə veriləndən 3-4 il sonra dağılmağa başladı. Bakı-Quba yolunda ötən müddətdə dəfələrlə təmir-bərpa işləri aparılıb. İndi yol tamamilə yararsız hala düşdüyü üçün sökülür və yenidən qurulur. Hazırda vətəndaşların Bakı-Quba istiqamətində hərəkət etməsi çətinləşib. Yolun bir tərəfi tamamilə bağlanıb, digər zolaqda ikitərəfli hərəkət səbəbindən sürücülər qəza risqi altında hərəkət edir. Həmin yolla bağlı göstərdikləri zəmanət müddəti də özünü doğrultmadı. Bu məsələlərlə bağlı Baş Prokurorluq cinayət işi başlaya və müvafiq araşdırma apara bilər. Əmin edirəm ki, cinayət işi başlansa, həmin yolun çəkilişində iştirak etmiş məsul şəxslər cinayət məsuliyyətinə cəlb oluna bilər. Cinayət işinin başlanması ilə bağlı yolu çəkən dövlət qurumunun tabe olduğu daha yuxarı instansiya məsələ qaldırmalıdır. Ya da Hesablama Palatası həmin dövlət orqanının fəaliyyətini yoxlamalı, faktları Baş Prokurorluğa göndərməlidir. Sadəcə, Azərbaycanda belə bir ənənə var ki, eyni yollar hər il təmir olunur. Həmin dövlət qurumları da bir-birinin işinə irad bildirmirlər. Əgər cinayət işi başlansa, faktlar sübut olunsa, vəzifədən sui-istifadə və dövlət vəsaitini mənimsəmə tərkibi ilə həmin şəxslər cinayət məsuliyyətinə cəlb oluna bilər”.
Məhəmmədəli QƏRİBLİ
