Son günlər yoluxma dinamikasının artması bir sıra ciddi çətinliklər yaradıb. Ən çox əziyyət çəkənlər isə virusa tutulanlar və tutulmaqda şübhəli olanlardır. Ərazilərdə yerləşən poliklinikalar, təcili yardımlar vətəndaşların çağırışlarına operativ cavab vermir. Vətəndaş poliklinikaların, təcili yardımların həkimlərinin gəlib onlardan yaxma götürməsini günlərlə gözlədiyi kimi, koronavirus yaxmalarının, testlərinin cavabını da o qədər gözləyir.
Vətəndaşın koronavirusa tutulub-tutulmadığını bildirən cavab günlərlə gecikir. İnsanlar COVİD olub-olmadıqlarını bilmədikləri üçün özlərini təcrid etmirlər, sərbəst gəzib dolaşırlar, mağazaya gedirlər, ictimai nəqliyyatdan istifadə edirlər. Nəticədə isə məlum olur ki, həmin şəxslərin nəticəsi pozitivdir. Təsəvvür edin ki, aramızda nə qədər koronavirus xəstəsi sərbəst gəzib-dolaşır, ətrafı yoluxdurur. Yoluxmanın sayının sürətlə artmasının bir səbəbi də poliklinikaların, təcili yardım xidmətinin vaxtında çağırışlara reaksiya verməməsi, xəstəyə gec baş çəkməsi, şübhəlidən götürdüyü yaxmanın nəticələrini gec bildirməsidir. Heç şübhəsiz, koronavirus və yaxma çağırışlarına çox gec reaksiya verilməsi ciddi narazılığa səbəb olur və vətəndaşlar bunun mənfi nəticələr verdiyini deyir. Vətəndaşlar deyir ki, poliklinika çağırışa gələnə, yaxma götürüb yaxmanın cavabını göndənə qədər artıq özünü yoluxmaqda şübhəli bilənlər tanış həkimlərə müalicə yazdırır və müalicəyə başlayırlar.
Çağırışlara niyə gec cavab verilir, yaxmanın nəticələri niyə bir neçə gündən sonra vətəndaşlara göndərilir?
Məsələ ilə bağlı TƏBİB-ə müraciət etsək ki, qurumun mətbuat xidməti rəhbərinin telefonu bağlı olduğu üçün sorğumuza cavab ala bilmədik.
“Poliklinikalar da, laboratoriyalar da çox yüklənir, bu da yaxmaların nəticələrinin gecikməsinə gətirib çıxarır”
Azərbaycan Həkimlər Birliyinin İdarə Heyətinin üzvü, professor Ədalət Rüstəm bizimlə söhbətində bildirdi ki, bunun obyektiv və subyektiv səbəbləri var. “Böyük ehtimalla, daha çox özəl laborotoriyalara şərait yaradılıb ki, xəstələri daha çox onlar qəbul etsin. Özəllərdə heç bir problem yoxdur. Poliklinikalara və təcili yardımlara gəlincə, onlara müraciət həddən çoxdur. Yoluxma həddən çox olduğuna və yoluxmaqda şübhəli olanlar artdığına görə, təcili tibbi yardım çatmır. Bəziləri gündüz çayxanada, kafedə oturur, axşam evə gələndə qızdırması qalxır təcili yardım çağırırlar, eyni saatda bu qədər təcili yardım çağırılanda onlar vaxtında gəlib çıxa bilmirlər. Burada süni manelər də istisna deyil. Dövlət poliklinikaları ödənişsiz xidmət göstərdiyi üçün çox yüklənir, ona görə də yaxmaların cavabını vaxtında çatdırıb verə bilmirlər. Amma özəl laboratoriyalarda cavabı 1 günə verirlər.
Əhalinin narazılığı yerindədir, amma poliklinikaların və təcili tibbi yardımın çağırışlara vaxtında reaksiya verməməsinin obyektiv və subyektiv səbəbləri var. Poliklinikalar da, laboratoriyalar da çox yüklənir, bu da yaxmaların nəticələrinin gecikməsinə gətirib çıxarır. Bu xidmət dövlətin bütün xəstəxanalarında, poliklinikalarında ödənişsizdir, dövlət hesabınadır. Amma xidmət ödənişsiz olduğu üçün də müraciət çoxalır, laboratoriyalar yüklənir. Hər poliklinikanın bir laboratoriyası var və bir günə ora 150-dən artıq yaxma daxil olur, hamısını bir günün içində yoxlamaq mümkün deyil”.
Ə.Rüstəm deyir ki, təcili yardımların sayında çatışmazlıq var və bu barədə normativlərə yenidən baxılmalıdır. Azərbaycanda koronavirus dövründə səhiyyə xidmətləri ilə başqa ölkələri müqayisə edən professorun sözlərinə görə, qonşu ölkələrlə və bir çox Avropa dövlətləri ilə müqayisədə bizdə xidmət çox üstündür: “Bu gün elə ölkələr var ki, dövlətə aid olan poliklinikalar, təcili yardımlar iflic olub işləmir, yalnız özəl xəstəxanalar və özəl təcili tibbi yardım maşınları ödənişli xidmət göstərir. Bizdə səhiyyənin vəziyyəti də yaxşıdır, xidmət də. Bir az gecikmə var və bunun da səbəbi müraciətlərin çoxluğudur. Bu sahədə qonşularımızın və dünya ölkələrinin çoxundan bizim vəziyyətimiz çox yaxşıdır”-deyə Ə.Rüstəm qeyd etdi.
İradə SARIYEVA
