Ötən il olduğu kimi, bu il də Azərbaycan əhalisinin sayı azalır. Bu ilin 6 ayında Azərbaycanda əhalinin sayı 20 min 63 nəfər və ya 0,2 faiz artaraq 10 milyon 139 min 196 nəfərə çatıb. Ötən ilin 6 ayında isə artım 28 min 786 nəfər olub.
Bu barədə Dövlət Statistika Komitəsi məlumat yayıb. Komitə habelə bildirib ki, bu ilin yanvar-iyun aylarında Ədliyyə Nazirliyinin rayon (şəhər) qeydiyyat şöbələri ölkədə 56063 doğulan körpəni qeydə alıb.
Müqayisə üçün qeyd edək ki, 2020-ci ilin 6 ayında bu rəqəm 59356 olub. Bununla da ötən ilin 6 ayı ilə müqayisədə bu ilin ilk yarısında ölümün artdığı aydın olur. Əvəzində nikaha girənlər artıb. Amma boşanmada da artım var. İlin birinci yarısında qeydiyyat şöbələri 23231 nikaha daxilolma və 8168 boşanma halları qeydə alıb. Ötən ilin birinci yarsında isə 17841 nikaha daxilolma və 7107 boşanma halları rəsmiləşib.
Beləliklə aydın olur ki, bu ilin 6 ayında ötən ilin 6 ayı ilə müqayisədə dogulan uşaqlar azalıb, ölüm artıb, boşanma da artıb. Müsbət hal yalnız nikaha girənlərin sayının artmasında özünü göstərib.
Bütün bu deyilənlərin fonunda maraqlıdır, ekspertlər əhalinin sayının azalmasını nə ilə əlaqələndirir?
“İnsanların dünyagörüşünün dəyişməsi, boşanmaların artması da buna öz təsirini göstərir”
Sözügedən məsələyə aydınlıq gətirən sosioloq Əhməd Qəşəmoğlu Azərbaycanda əhalinin azalmasını əsasən pandemiyanın yaratdığı vəziyyətlə əlaqələndirdi: “Əvvəla, dünyada aparılan siyasət odur ki, ölkələrdə əhali artımı azalsın. Bununla bağlı hardasa 50 ildir müəyyən işlər gedir. BMT-nin, ondan sonra ABŞ-ın bir futurologiya institutunun 1969-cu ildə bir proqnozu oldu. Bütün bunlarda məqsəd odur ki, əhalinin sayı azalsın. Çünki əhali sürətlə artır. İddialara görə, Yer üzünün imkanları artan əhalinin ehtiyaclarını qarşılaya bilmir. Azərbaycanda əhalinin azalması əsasən koronavirusla bağlıdır. Çünki insanların bir çoxu indiki şəraitdə uşaqların olmasını istəmir. Nəyə görə? Ona görə ki, ana hamilə olanda tez-tez xəstəxanaya, poliklinikaya getməli və həkim nəzarətində olmalıdır. Problem ondadır ki, insanlar indi müainəyə də getməyə qorxurlar. O mənada ki, virusa yoluxmaqdan ehtiyat edirlər. Üstəlik, uşaq dünyaya gələndən sonra xəstəxanaya getmək lazımdır. Həkim nəzarətinə ehtiyac var və s. Bütün bunlar, istər-istəməz, təmasları artırır. Təmasların artması isə virusa yoluxma risqini yüksəldir. Başqa bir tərəfdən, iqtisadi çətinliklər əhalinin artmasına mənfi təsir edir. İnsanların dünyagörüşünün dəyişməsi, boşanmaların artması da buna öz təsirini göstərir. Hər 100 nikahdan 35-i boşanır. Bu çox ciddi rəqəmdir. Boşanmalar çoxdursa, bu o deməkdir ki, ailələrdə gərginliklər çoxdur. Gərgin olan ailələr də uşaq dünyaya gətirmək istəmirlər”.
Bir sözlə, sosioloq hesab edir ki, kompleks səbəblər əhalinin azalmasına öz təsirini göstərir.
Vidadi ORDAHALLI
