Bu il keçirilmiş qəbul imtahanlarının nəticələri bəllidir. Ötən illərdən fərqli olaraq, bu il qəbul imtahanlarında iştirak edən abituriyentlər yüksək bal toplamadı. Eyni hal 2019-cu ildə də yaşanıb.
Ekspertlərin fikrincə, bu, son illər ərzində ən pis nəticələrdir. Bunun səbəbini keçən ilin martından təhsilin distant formada təşkilinin abituriyentlərin hazırlığına, təhsilin keyfiyyətinə xeyli dərəcədə mənfi təsir göstərməsi, sınaq imtahanlarının olmaması ilə izah edirlər. Baxmayaraq ki, Dövlət İmtahan Mərkəzinin imtahan suallarını asanlaşdırdığı deyilir.
Bu il keçirilən qəbul imtahanlarının nəticələrinin aşağı olmasının səbəblərindən biri kimi sınaq imtahanlarının keçirilməməsi göstərilir. Bildirilir ki, sınaq imtahanlarının keçirilməməsi abituriyentlərin nəticələrinə təsir göstərib.
“Həm pandemiya, həm müharibə, həm də sınaq imtahanlarının təşkil edilməməsi ümumi nəticəyə təsir edən əsas amillərdir”
Təhsil eksperti Kamran Əsədov qeyd etdi ki, il yarımdır Azərbaycan təhsil sistemi ənənəvi qaydada deyil, onlayn formada fəaliyyət göstərir: “Bu da nəticə etibarı ilə təhsilin keyfiyyətinə təsir göstərir. Bu cür təhsil forması heç də bütün təhsilalanlar üçün əlçatan deyil. Xüsusən də bəzi fənlərin onlayn qaydada tədrisi düzgün deyil. Eyni zamanda ötən il qələbəmizlə başa çatan Vətən müharibəsi vaxtı döyüşlərin getdiyi ərazilərə yaxın yerlərdə yaşayan şagirdlərimiz bundan əziyyət çəkdilər. İmtahan nəticələrinin aşağı olma səbəblərindən biri də sınaq imtahanlarının keçirilməməsi idi. Bu da şagirdlər üçün gərəkli olan imtahan bacarıqlarının formalaşmasında problem yaradan məqamlardan biridir. Ümumiləşdirsək həm pandemiya, həm müharibə, həm də sınaq imtahanlarının təşkil edilməməsi ümumi nəticəyə təsir edən əsas amillərdir”.
Ekspertin sözlərinə görə, hər il Dövlət İmtahan Mərkəzi abituriyentlərin ali təhsil müəssisələrinə keyfiyyətli hazırlaşması üçün sınaq imtahanları keçirirdi. Sınaq imtahanları nəticəsində şagirdlər bildikləri mövzuları dəqiqləşdirirdilər, bilmədiklərini də müəyyən edib, onun üzərində çalışırdılar. Digər tərəfdən, sual kitabçası və cavab kartı üzərində işləmək vərdişlərinə yiyələnirdilər. Çünki bir çox hallarda şagirdlər mövzuları yaxşı bilsələr belə, doğru cavabları sual kitabçasına köçürməkdə çətinlik çəkirlər.
Günel CƏLİLOVA
