Sumqayıt Küçə İşıqları Təsərrüfat Hesablı Xidmət Sahəsi “İnterkabel” firması ilə 295 561.63 manatlıq müqavilə imzalayıb. Müqavilədə elektrik mallarının satınalması nəzərdə tutulur. İqtisadiyyat Nazirliyi yanında Dövlət Vergi Xidmətinin reyestr məlumatlarına görə “İnterkabel” 16 sentyabr 1997-ci ildə qeydiyyata alınıb.
Nizamnamə kapitalı 20 manat olan şirkətin hüquqi ünvanı Bakı şəhəri Nərimanov rayonu, Nəcəf Nərimanov küçəsi, ev 5a-da yerləşir. MMC-nin qanuni təmsilçisi Molanov Yasin Xanoğlan oğludur. Açıq mənbələrdə Yasin Molanov haqqında hər hansı məlumat olmasa da, qanuni təmsilçisi olduğu şirkət kifayət qədər populyardır.
“İnterkabel”lə bağlı araşdırma apararkən məlum olur ki, şirkət əsasən iri məbləğli tenderlərin qalibi olur. Özü də firmaya iri dövlət qurumları da sifarişlər verir.
Təkcə ötən il Bakı Metropoliteni QSC “İnterkabel” firması ilə 1.2 milyon , “Azərsu” ASC 2.3 milyon, “Bakı Şəhər İşığı” Elektrik Şəbəkə Müəssisəsi isə 2,99 milyon manatlıq müqavilə imzalayıb. 20 manatlıq şirkətlə belə iri məbləğli müqavilələrin imzalanması bir qədər şübhəli görünür.
“İnterkabel” firması Sumqayıt Küçə İşıqları Təsərrüfat Hesablı Xidmət Sahəsinin də sevimli şirkətidir. Araşdlrmalarımız zamanı bəlli olub ki, qurum 2020-ci ildə toplam maliyyə dəyəri 865 177 manat təşkil edən satınalma müqaviləsi bağlayıb. Ümumiyyətlə isə 2019-cu ilin noyabr ayından 2020-ci ilin noyabr ayına qədər Xidmət Sahəsi ilə “İnterkabel” firması arasında 1 125 979 manat məbləğində satınalma müqaviləsi imzalanıb.
Son tender əməliyyatı ilə bağlı yaranan şübhəli məqamlara aydınlıq gətirmək üçün müqaviləni imzalaayan tərəflərlə əlaqə saxlamaq qərarına gəldik. İnternet üzərindən apardığımız araşdırma zamanı Sumqayıt Küçə İşıqları Təsərrüfat Hesablı Xidmət Sahəsinə aid heç bir əlaqə vasitəsi tapa bilmədik. Tenderin qalibi olan “İnterkabel”in isə hətta sosial şəbəkələrdə hesablarının olduğunu gördük. Həmin hesablarda qeyd edilən nömrə ilə əlaqə saxladıq. Özünü şöbə müdiri kimi təqdim edən Yaşar adlı şəxs bizə şirkətin baş mühasibi Pərvin Rüstəmovla əlaqə saxlamağı məsləhət gördü. İlk zəngdən dəstəyi qaldıran Pərvin bəy bizi maraqlandıran suallara cavab verdi. O, qeyd etdi ki, Sumqayıtdakı tender yeni deyil: “Bir müddət əvvəl həmin tenderin qalibi olmuşuq. Sadəcə şirkətin adını götürüb, hansısa iddianı irəli sürmək doğru deyil. Bunun üçün ortaya konkret rəqmələr və ya iddialar qoymaq lazımdır. Təəssüf ki, məbləğin böyüklüyünə işarə edilir, amma görülən işin həcminə yox. Sumqayıtın işıqlandırılması ilə bağlı ayrılan məbləğ görülən işin həcminə tam adekvatdır. Biz yeni şirkət deyilik. 1997-ci ildən fəaliyyət göstəririk. Nizamnamə kapitalı şirkət yaranada qoyulur və simvolik olaraq 20 manat qeyd edilib. Bu o demək deyil ki, şirkət heç bir iş görməyib və ya əməliyyatlar yerinə yetirməyib. Nizamnamə kapitalının az olması, şirkətin qeyri-funksionallığına dəlalət etmir. Nizamnamə kapitalı ilə bağlı konkret tələb olmadığı üçün, kim hansı məbləği istəyirsə, o qədər də qoyur. Bizm şirkət 23 ildir fəaliyyət göstərirsə, deməli, yerdən çıxma deyil. Biz yalnız bu tenderin deyil, bir çox layihələrin qalibi olmuşuq və hamısını da müvəfəqiyyətlə icra etmişik”.
Baş müasibin sözlərinə görə, onlar sırf elektrik işlərinin görülməsi üzrə ixtisaslaşıb: “Biz Rusiya və Ukraynada olan bir neçə zavodun rəsmi nümayəndəsiyik. Hər halda ciddi olmayan bir şirkətlə belə partnyorluq qurulmaz. Biz gördüyümüz hər bir işlə bağlı hesabat verməyə hazırıq. Çünki fəaliyyətimiz şəffafdır”.
Məhəmmədəli QƏRİBLİ
