Azərbaycan Qida Təhlküəsizliyi İnstitutu (AQTİ) ümumi maliyyə dəyəri 72 795.66 AZN olan iki müqavilə imzalayıb. Müqavilələrdən biri “Kainat-Print” MMC, digəri isə “Buludmedia” MMC ilə bağlanıb.
“Kainat-Print” MMC AQTİ-ni “kartric dolumu və servisi xidmətləri” ilə təmin etməlidir. Bunun üçün şirkətə 24 097.96 AZN ödəniləcək. “Buludmedia” MMC isə 48 869.7 AZN ödəniləcək. Sözügedən MMC ilə müqavilədə media xidmətlərinin satın alınması nəzərdə tutulur.
İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, “Kaspian-Print” MMC 3 iyul 2009-cu ildə qeydiyyata alınıb. Şirkətin nizamnamə kapitalı 20 AZN-dir. Hüquqi ünvanı Bakı şəhəri Nizami rayonu, Qara Qarayev prospekti, ev 124, mənzil 22-də yerləşən MMC-nin qanuni təmsilçisi Qasımov Xalid Ağamalı oğludur.
Reyestr məlumatlarından görünür ki, şirkət 12 ilə yaxındır fəaliyyət göstərir. Amma maraqlıdır ki, açıq mənbələrdə nə şirkət, nə də qanuni təmsilçisi haqqında məlumat var. Adətən nizamnamə kapitalı 10-20 AZN olan bu tip şirkətlərdən tender maxinasiyalarında istifadə edilir.
AQTİ-nin müqavilə bağladığı “Buludmedia” MMC-yə gəlincə, nizamnamə kapitalı 10 AZN olan şirkət 3 oktyabr 2016-cı ildə qeydiyyata alınıb. Hüquqi ünvani Bakı şəhəri Nərimanov rayonu, Aşıq Molla Cümə küçəsi, ev 6, mənzil 8-də yerləşir. MMC-nin qanuni təmsilçisi isə Cəfərov Emil Kamil oğludur.
Açıq mənbələrdə “Buludmedia” MMC reklam şirkəti kimi təqdim edilir. Şirkət veb-səhifələrinin, təqdimat videolarının hazırlanması, bir sözlə, piar işləri ilə məşğuldur. Şirkətin qanuni təmsilçisi barədə isə hər hansı məlumat yoxdur.
AQTİ Azərbaycan Qida Təhlükəsizliyi Agentliyinin (AQTA) sturkturuna daxildir. Dövlət vəsahiti hesabına şəffaf reputasiyası şübhə doğuran MMC-ləri qalib edib, onlara külli miqdarda vəsait ayırmaq nədən xəbər verir?
Çox təəssüflər olsun ki, gün ərzində Qida Təhlükəsizliyi Agentliyindən bu sualımıza cavab ala bilmədik. Quruma etdiyimiz zənglərə cavab verən bütün şəxslər mətbuat xidmətinin rəhbəri Aysel Fərziyeva ilə əlaqə saxlamağı məsləhət gördülər. Günün müxtəlif saatlarında Aysel xanımın mobil və iş telefonuna etdiyimiz zənglərə isə ümumiyyətlə cavab verilmədi. Görünən budur ki, sözügedən qurumun yalnız tenderləri deyil, həm də mətbuat xidmətinin fəaliyyəti şübhə doğurur.
Ekspert İlqar Hüseynli isə “Bakı-Xəbər”ə açıqlamasında bildirdi ki, cəmiyyətdə əsas narazılıq yaradan məsələlərdən biri də dövlət müəsissələrinin şəffaf olmayan bu cür tenderlər vasitəsilə büdcəni talamaları ilə bağlıdır: “Tender sözünün hərfi mənası müəyyən satış və xidmətlərin təşkili bağlı açıq müsabiqənin keçirilməsidir. Bu proses çox şəffaf şəkildə həyata keçirilməlidir. Təəssüflər olsun ki, bizim bir çox dövlət qurumları həmin prinsipləri qorumurlar. Həmin qurumlara ictimai nəzarət də olduqca zəifdir. Məhz üzərlərində ciddi ictimai nəzarət görmədiklərinə görə, belə sövdələşmələri istədikləri formada edirlər. Bu qurumun nə qədər katric doldurmağına ehtiyac var ki, bu xidmət üçün 24 min manatdan çox vəsait ayrılıb? Özü də bu xidməti nizamnamə kapitalı 10-20 manat olan bir MMC-yə yönəldillər. Nizamnamə kapitalında pul olmayan bir şirkət belə dövlət sifarişlərini necə yerinə yetirə bilər? Burada hər zaman iki variant nəzərdə saxlanılır. Ya bu məqsədlə dövlət qurumları öz ailə üzvlərinə yaxın olan şirkətlər yaradırlar. Ya da ki, həmin quruma yuxarıdan tenderi məhz deyilən şirkətə vermək tapşırılır. İstənilən halda burada ciddi korrupsiya maraqları var. Biz eyni məsələni Nəqliyyatın İtellektual İdarəetmə sisteminin təşkili ilə bağlı qalıb elan olunan şirkətə ayrılan külli miqdar vəsait ətrafındakı ajiotajda gördük. Bütün bu məqamlar araşdırılmalı və ən əsası da ictimailəşməlidir ki, ciddi ölçülər götürülsün”.
Məhəmmədəli QƏRİBLİ
