Təhsil şirkəti kimi fəaliyyət göstərən “EDU Gallery”dən son zamanlar çoxlu sayda şikayət səslənir. Qeyd etdiyimiz kimi, təhsil şirkəti kimi fəaliyyət göstərən “EDU Gallery” vətəndaşlardan müəyyən məbləğdə vəsait alaraq onların Türkiyə və digər ölkələrin məşhur ali təhsil ocaqlarında təhsil alacaqlarını vəd edir. Ancaq ortada heç nə yoxdur.
Bu günlərdə Türkiyə və Qazaxıstan vətəndaşı Şamil Həmzəyevə qarşı dələduzluq edilib. Şirkətin rəhbəri Firudin Cavadov Şamil Həmzəyevdən xidmət və konsultasiya adı altında 5000 dollar alaraq onu Türkiyədə fəaliyyət göstərən Uludağ Universitetinin Stomatologiya fakültəsinə qəbul etdirəcəyinə dair qanuni təmsilçi kimi öhdəlik götürüb. Bununla bağlı Şamil Həmzəyevlə şirkət arasında qüvvəyə minmiş müqavilə də imzalanıb.
İmzalanan sənədə baxmayaraq, “EDU Galerry” üzərinə düşən öhdəliyi yerinə yetirmir. Ş.Həmzəyev isə Türkiyənin Bursa şəhərində kirayə qalaraq hələ də universitetə qəbul olunacağını gözləyir.
Şikayətçi - Şamil Həmzəyev: “EDU Galerry” üzərinə düşən öhdəliyi yerinə yetirmir”
Şikayətçi qeyd edir ki, dəfələrlə F.Cavadova müraciət etsə də, nəticə olmayıb. O, uzun aylar boyu müxtəlif bəhanələrlə prosesi mümkün olduğu qədər uzadıb: “Əvvəlcə bildirdi ki, pandemiya ilə bağlı olaraq payız ayında qəbul olmayacaq. Daha sonra isə o, Qarabağ müharibəsini bəhanə edərək döyüşdə olduğunu dedi. Ancaq həmin şəxs müharibədəyəm deməsinə baxmayaraq, onu şəhərdə görənlər olub. Hətta dəfələrlə telefon zənglərinə cavab verərək şikayətçinin səsini tanıyandan sonra “mən əkiz qardaşıyam, üzümüz də, səsimiz də oxşayır” deyib. Vəziyyətin daha da uzanacağını görüb, pulumuzu geri almaq istəyəndə isə F.Cavadov dedi ki, “siz qəbul imtahanına girməkdən imtina etməklə müqavilənin şərtini pozursunuz. Belə olan təqdirdə sizə geri pul qayıtmayacaq”. Bizim artıq nə şirkətə, nə də onun rəhbərinə inanırdıq. Məsələnin ciddiliyini nəzərə alıb, Uludağ Universiteti ilə əlaqə saxlayıb müəyyən etdik ki, nə siyahıda ad var, nə də qarşıda qəbul imtahanı”.
Firudin Cavadov: “...şikayətçi tərəf müqavilə şərtini pozaraq imtahanda iştirak etməkdən imtina edib”
Məsələ ilə bağlı F.Cavadov bildirdi ki, iddiaçı ilə arasında həqiqətən də müqavilə imzalanıb: “Pandemiya və Qarabağ savaşında iştirak səbəbindən proses uzansa da, son anda şikayətçi tərəf müqavilə şərtini pozaraq imtahanda iştirak etməkdən imtina edib”.
Günel CƏLİLOVA
