Maştağanın Gülçülük massivində yaşayan sakinlərin şikayəti var. Şikayətin məzmunu ondan ibarətdir ki, ötən ilin dekabrında massivdəki smart qaz sayğacları mexaniki sayğaclarla əvəzlənib.
Mexaniki sayğac olanda, adətən, nəzarətçi ayda bir dəfə gəlib qaz sərfiyyatı ilə bağlı abonentə bildiriş verməlidir. Ancaq 3 aydan çoxdur ki, nəzarətçi gəlib maraqlanmır, bildiriş vermir. Sakinlər bundan bərk narahatdırlar. Hesab edirlər ki, bu qədər vaxtın uzadılması hansısa məqsədə hesablanıb. Yəni bunun arxasında abonentlərə daha çox şişirdilmiş borc yazma niyyəti gizlənir. Belə olmasaydı, o zaman nəzarətçi hər ay gəlib abonentlərə bildiriş verərdi. Necə olur ki, elektrik enerjisi və su sərfiyyatı ilə bağlı bildirişlər hər ay bitəndə gəlir, amma qaz sərfiyyatı ilə bağlı bu baş vermir?
Nurxan Kərimov: “3 aydır mexaniki sayğac qoyulub, amma bir dəfə də olsun nəzarətçi gəlib sayğaca baxmayıb”
Məsələ ilə bağlı massivin Südçülük savxozu 0004 küçəsi, mənzil 0127 ünvanında yaşayan Nurxan Kərimov bunları dedi: “Ötən il dekabrın 15-də smart sayğacımız dəyişdirildi. Sayğacda hansısa texniki problem yox idi, sadəcə, məhlədəki əksər smart sayğacı çıxarıb, yerinə mexaniki sayğaclar quraşdırdılar. Sayğac dəyişdirilən zaman kartda 69 manat vəsait var idi. Bunu sayğacı dəyişdirən nəzarətçilərə bildirdim. Onlar dedilər ki, buna görə narahat olmayın. Həmin vəsait sonrakı sərfiyyatdan çıxılacaq. Ancaq məni narahat edən odur ki, 3 aydır mexaniki sayğac qoyulub, amma bir dəfə də olsun nəzarətçi gəlib sayğaca baxmayıb. Qışda yay fəslindən fərqli olaraq qaz çox istehlak edilir. Sakinlərin eləsi var kombi sistemindən, eləsi də var kustar formada hazırlanmış dəmir peçlərdən istifadə edir. Dəmir peçlərdən istifadə edənlər daha çox qaz yandırırlar. Qaz az yansın deyə, odundan da istifadə edənlər olur. Nəzərə almaq lazımdır ki, bu qış əvvəlkilərdən fərqli olaraq sərt keçdiyi üçün qaz çox istehlak olunur. Hər ay gəlib bildiriş versələr biz də işimizi bilərik. Bir neçə dəfə 104 xidmətinə zəng vurub bunu demişəm, amma gələn-gedən olmayıb. Bizi narahat edən odur ki, vaxtın belə uzadılması sərfiyyatla bağlı rəqəmlərin şişirdilməsinə şərait yaradacaq. Bu zaman daha çox ödəniş etmək məcburiyyətində qalarıq”.
Elşən Nəzərov: “Bir də gördün gəlib filan qədər borc yazdılar”
Gülçülüyün 6-cı döngə ünvanında yaşayan Elşən Nəzərov da analoji problemdən şikayətləndi: “On iki ildir Gülçülükdə yaşayıram. Əvvəl bizim qazla bağlı problemimiz var idi. Sonra bu öz həllini tapdı. Qaz sayğacı qoyulanda smart cihaz quraşdırıldı. Bunun üstünlüyü çoxdur. Başlıca üstünlüyü odur ki, nəzarətçi qapını döymür. Karta nə qədər vəsait yükləyirsənsə, o qədər işlədirsən. Bir növ, öz gəlir və xərcini bilirsən. Elə qonşularımız var ki, hətta onların elektrik sayğacları da kartladır. Ancaq ötən ildən başlayaraq, ərazidəki smart qaz sayğacların çoxu mexaniki sayğaclarla əvəzlənib. Belə söhbətlər var ki, smart sayğaclar “Azəriqaz”a baha başa gəldiyi üçün yenidən mexaniki sayğaclara keçir. Bizim bununla işimiz yoxdur. Ancaq problem ondadır ki, mexaniki sayğac qoyulandan nəzarətçi gəlib bildiriş vermir. Qış ayında belə gecikmə xeyrə əlamət deyil. Bir də gördün gəlib filan qədər borc yazdılar. Ona görə bu bizi narahat edir”.
Məsələ ilə əlaqədar Sabunçu rayonu Qaz istismarı sahəsi ilə əlaqə yaratmağa çalışsaq da, zənglərə cavab verən olmadı.
Vidadi ORDAHALLI
