Son illər rayonlardan paytaxt Bakıya insanların iş dalınca miqrasiya etməsi əhalinin sayını ciddi şəkildə artırıb. Bakıətrafı qəsəbələrdə əhalinin sıxlıq səviyyəsi yüksəlib. Necə gəldi evlər tikilib. Plansız məskunlaşma paralel olaraq bir sıra problemlərə yol açıb. Bunlardan biri də məktəb problemidir. Məktəblərdə sıxlıq böyükdür. Üstəlik, bir sıra məktəblər uzaqda yerləşir.
Belə problemlərdən biri də Balaxanı qəsəbəsinin “Fazenda” adlanan yaşayış massivində mövcuddur. Məsələ ondadır ki, 2000-ci illərdə bu massivdə yaşayanların sayı artmağa başlayıb. Hardasa 10 minə yaxın əhalisi olan “Fazenda”da məktəb yoxdur. Sakinlər uşaqlarını əsasən 4 və 259 saylı orta məktəblərə aparırlar ki, məsafə baxımdan həmin məktəblər çox uzaqdır. O üzdən, valideynlər maşın tutmalı olurlar. Bu da valideynlər üçün indiki dövrdə ciddi çətinlik yaradır. Problem ondadır ki, yaşayış massivində yaşayan ailələrin böyük hissəsi günəmuzd işləyir. Dəfələrlə şikayət etsələr də, yeni məktəbdən səs-soraq yoxdur.
Sözügedən problemlə bağlı “Fazenda”da yaşayan bir neçə valideynin fikirlərini öyrəndik.
Təvəkkül Mirzəyev: “Üç uşağın məktəbə servis maşınla aparılmasına görə 90 manat ödəniş edirəm”
Valideynlərdən biri Təvəkkül Mirzəyevdir. O, qəzetimizə açıqlamasında bildirdi ki, 2004-cü ildən “Fazenda”da yaşayır: “O vaxt bələdiyyədən torpaq aldıq. Min bir çətinliklə ev tikdim. İlk dövrlərdə burada əhalinin sayı elə də çox deyildi. Sonra sürətlə artmağa başladı. Bakının digər yerlərinə baxanda burada torpaq nisbətən ucuz olduğu üçün “Fazenda”da məskunlaşmalı olduq. Burada yaşayanların böyük hissəsi günəmuzd fəhlə işləyir və əsasən də rayonlardan gəliblər. Bir müddət yaşayış massivinin qaz-su problemi var idi. Şükürlər olsun ki, bir neçə il əvvəl sözügedən problemlər həllini tapdı. Yeni qaz və su xətləri çəkildi. Artıq bundan bir şikayətimiz yoxdur. Bizim başlıca problemimiz məktəb yoxluğu ilə bağlıdır. “Fazenda”da əhalinin sayı sürətlə artsa da, burada məktəb tikmək heç kəsin yadına düşmür. Uşaqları Balaxanıdakı 4 və 259 saylı məktəblərə aparırıq”.
T.Mirzəyev deyir ki, hər uşağın məktəbə aparılıb-gətirilməsinə 30 manat veririk: “Mən özüm burada yaşayan bir çoxu kimi fəhləyəm. İş olanda işləyirəm, olmayanda yox. Üç uşağım var və onların 3-ü də məktəblidir. Üç uşağın məktəbə servis maşınla aparılmasına görə 90 manat ödəniş edirəm. Servis deyəndə ki, “Qazel” markalı maşın tutmuşuq, hər uşağa görə 30 manatdan ödəniş edirik. Pandemiya ilə əlaqədar dərslər həftədə üç dəfə keçirilsə də, qiymət dəyişməyib. Əvvəl də 30 manat ödəniş edirdik, indi də. Uşaqların digər xərcləri də var axı. İndi gəl bu çətin vaxtda bunları ödə görüm necə ödəyirsən. Məktəb olsaydı, bu çətinliklər də olmazdı. Dəfələrlə Sabunçu Rayon İcra Hakimiyyətinə, Təhsil Nazirliyinə yeni məktəb tikintisi ilə bağlı müraciət etsək də, bir faydası olmadı. Bir ara söz verdilər ki, Zabrat qəsəbəsi ilə “Fazenda” arasında yeni məktəb tikiləcək, amma üstündən 1 il keçsə də, bir nəticə yoxdur ”.
İldırım Zamanov: “Məktəbin olmaması həm maddi çətinliklər yaradır, həm də uşaqları fiziki baxımdan yorur”
“Fazenda”nın digər sakini İldırım Zamanov da analoji problemləri dilə gətirdi: “Bir tərəfdən qış mövsümüdür, digər tərəfdən pandemiya. Aləm qarışıb bir-birinə. Çünki əvvəlki kimi də iş yoxdur. Qışda, ümumiyyətlə, iş sarıdan zəifçilik olur. Bu da bizim üçün bir sıra çətinliklər yaradır. Uşaqların məktəb xərclərini qarşılamaq çətindir. Bizə isə beşqat çətindir. Ona görə ki, “Fazenda”da məktəb yoxdur. Baxmayaraq ki, burada minlərlə ailə yaşayır. Mənim də 3 uşağım var. Məktəbin olmaması həm maddi çətinliklər yaradır, həm də uşaqları fiziki baxımdan yorur. Nəzərə almaq lazımdır ki, 259 saylı məktəbdə şagird sıxlığı olduğuna görə bu, tədrisin keyfiyyətinə də öz təsirini göstərir. Çox çətindir bizim üçün. Aidiyyəti qurumlardan xahiş edirəm ki, “Fazenda”da məktəb tikintisinə diqqət ayırsınlar”.
Hafiz Vəliyev: “Azyaşlı məktəblilər üçün daha çox çətin olur”
“Fazenda” sakini Hafiz Vəliyev də qeyd etdi ki, məktəbin olmaması get-gedə daha çox çətinliklər yaradır: “Açığı, bu məsələ bizi çox narahat edir. Yaşayış massivində bir belə əhali yaşayır. Nə vaxta qədər yollarda qalacağıq? Məktəb olsa, valideynlər öz işini bilər. Bilmirsən ailənin dolanışıq dərdini çəkəsən, yoxsa uşaqların məktəb dərdini. Azyaşlı məktəblilər üçün daha çox çətin olur”.
Ümid edirik ki, müvafiq qurumlar “Fazenda”nın məktəb probleminə çarə tapacaq.
Vidadi ORDAHALLI
