Məlunm olduğu kimi, əvvəlki illərə baxanda Bakıda ənənəvi taksi xidmətinin rolu xeyli azalıb. Artıq bu sahədə müştərilərin sayı əvvəlki kimi deyil. İnsanlar əsasən özəl taksi xidmətlərinə üstünlük verirlər.
Hazırda Bakı şəhərində bir neçə iri taksi xidməti fəaliyyət göstərir. Fəaliyyət ərazisi eyni olsa da, xidmət səviyyəsi, xidmət çeşidi və digər amillərdən asılı olaraq, xidmət haqlarında da fərqlər var.
Əsas sifariş edilən taksi xidmətləri bunlardır: *9933 nömrəli “Salam” taksi, *8555 nömrəli “Ailə” taksi, *2111 nömrəli “Maxim” taksi, *9111 nömrəli “Ekonom” taksi, *8844 nömrəli “City” taksi. Müşahidələr göstərir ki, müştərilər əsasən sözügedən taksi şirkətlərinin xidmətinə üstünlük verirlər. Əsasən qiymət amilinə görə bu taksilər əhalini cəlb edir. Ancaq əvvəlki illərə baxanda taksi xidmətləri arasında qiymət fərqi xeyli azalıb. Bütün bunlarla yanaşı, diqqətçəkən məqam ondan ibarətdir ki, taksi xidməti ilə məşğul olan şirkətlərdə avtomobillərin heç də hamısı yaxşı vəziyyətdə deyil. Məsələn, əhaliyə xdmət edən *8555, *2111 taksi xidmətlərində köhnə avtomobillər çoxluq təşkil edir. Sifariş verəndə əksər halda gələn maşın VAZ 2106 olur, ya da köhnə “Opel” markalı avtomobil. Sözügedən markalı avtomobillər də qəzaya uğradıqda nəticəsi çox ağır olur. Problem ondadır ki, həmin avtomobillər texniki baxımdan istismar müddətini başa vurduğu üçün qəza baş verəndə müştərinin ölüm risqi böyük olur. Bu isə hər gün yüzlərlə sərnişinin böyük risqlə üzləşməsi deməkdir.
Məsələ ilə əlaqədar sözügedən taksi xidmətlərinin mövqeyini öyrənməyə çalışsaq da, bu mümkün olmadı. Bir neçə dəfə zəng vursaq da, buna cavab verən olmadı.
“Bu isə sərnişinlərin həyatının birbaşa təhlükəyə atılması deməkdir”
Məsələyə münasibət bildirən Azad İstehlakçılar Birliyinin rəhbəri Eyyub Hüseynovun sözlərinə görə, təkcə *8555, *2111 taksi xidmətləri deyil, digər taksi xidmətləri də köhnə avtomobillərdən istifadə edirlər: “Bu isə sərnişinlərin həyatını təhlükəyə atır. Sözügedən problemin müxtəlif səbəbləri var. Yəni burada həm obyektiv, həm də subyektiv amillərin rolu var. On il əvvəl parlamentdə sərnişinlərin məcburi sığortalanması haqqında qanun müzakirə edilirdi. Bu o deməkdir ki, nəqliyyatdan istifadə edən adam dayanacaqda qalıb gözləyirsə, o, avtomatik sığortalanmalıdır. Bu şəxs hansısa xəsarət alarsa, ona sığorta şirkəti yardım etməlidir. Çox təəsüflər olsun ki, həmin qanun müzakirə olunsa da, qəbul edilmədi. Qəbul edilsəydi, o zaman taksi xidmətləri bu cür özbaşınalıqlara yol verməyə cəsarət etməzdilər. Hesab edirəm ki, taksi xidmətləri qanunda olan bu kimi boşluqlardan istifadə edərək sərnişinlərin həyatını təhlükəyə atırlar. Bu isə tamamilə yolverilməzdir. Ümumilikdə, taksi xidməti ilə məşğul olan şirkətlərdə ciddi problemlər var. Taksilərin keyfiyyəti, onların təhlükəsizliyi standartlara cavab vermir. Görürsən kimi gəldi taksiyə işləməyə götürürlər. Bircə sürücülük vəsiqəsinə baxıb bununla da kifayətlənirlər. Hansi ki, taksi xidmətində çalışanın sürücülük təcrübəsi olmalıdır. Müştərilərlə davranmaq mədəniyyətinə sahib olmalıdır. Təəssüflər olsun ki, taksi xidmətləri bunların heç birini nəzərə almır. Həm əhaliyə xidmət zamanı köhnə avtomobillərdən istifadə edirlər, həm də təcrübəsiz sürücüləri işə cəlb edirlər. Bu isə sərnişinlərin həyatının birbaşa təhlükəyə atılması deməkdir. Bu günlərdə vətəndaşlardan biri mənə zəng vurub dedi ki, taksi sifariş edib. Taksiçi yolda tıxac olduğunu görüb, zorla sərnişini avtomobildən kənara çıxarıb. Deyib ki, tıxac olduğuna görə vaxtım çox gedir. Nəticədə sərnişin ciddi stres keçirib. Bax, bu cür özbaşınalıqlar və anormal hallar mövcuddur”.
AİB sədri hesab edir ki, bütün bu məsələlər ciddi təhlil olunmalı və müvafiq addımlar atılmalıdır.
Vidadi ORDAHALLI
