Son günlər öz həyatına sui-qəsd edənlər sanki ard-arda düzülüb. Xüsusilə çoxmərtəbəli binalardan özlərini atanların sayı artıb.
Ən dəhşətlisi isə intihar edənlərin əksəriyyətinin gənc yaşda olan qadınlar olmasıdır. Belə hadisələr gündəmdən düşmür. Heç bir səbəb bilinmədən, heç kimə heç nə demədən insanlar intihar edirlər. Səbəbi bilinməsə də, bu məsələ ictimaiyyətdə ciddi narahatlıqlar doğurmağa başlayıb. Əlbəttə ki, səbəbsiz heç kim özünə qəsd etməz. İnsanların canına qıyması üçün mütləq bir ciddi səbəb var ki, həmin səbəblər intihar edən insanı sıxır və onu bezdirir. Təbii ki, bu da həddindən artıq ciddi problemlərdir. Bəs bu hallara səbəb nədir? Niyə insanlar bilə-bilə canlarına qəsd edirlər? Hansı ciddi əsaslar var ki, insanı həyatdan bezdirir, yaşamaq istəmir, həyatına son qoyur?
Qeyd edək ki, intiharların səbəbləri müxtəlif olsa da, son vaxtlar baş verən intiharlarda əsas səbəb sosial sıxıntılar, xəstəliklər və ailə münaqişələridir.
Ekspertlər bildirirlər ki, müharibədən çıxan bir ölkədə bu cür neqativ halların yaşanması gözlənilən idi. İntihar hallarının artmasının əsas səbəbi xəstəliklər və insanların gələcəklə bağlı narahatlıq keçirmələridir. Eyni zamanda, uşaqların təhsillə bağlı geridə qalmaları, bəzi şəxsi münasibətlərin korlanması da intihara səbəb olur.
“Bəzən insanlar kinolarda əks olunan bahalı həyat tərzini özlərində görə bilməyəndə çıxış yolunu intiharda görürlər
Psixoloq Könül İsmayılova bildirdi ki, intihara meyllilik özünü daha çox uşaq yaşlarından büruzə verməyə başlayır: “Yəni uşaq vaxtı şüurda qalan bəzi travmalar insanın həyatına öz təsirini göstərir. Bəzi insanlar elə düşünürlər ki, intihar etsəm, məşhurlaşacam, adım hər yerdə çəkiləcək. Onu da nəzərə almaq lazımdır ki, hazırda pandemiya dövründəyik. Pandemiya şəraitində məhdudiyyətlərin mövcudluğu dost-tanışlarla rahat görüşməyə və vaxt keçirməyə imkan vermir. Bu, insanların psixoloji vəziyyətinə təsirsiz ötüşmür”.
Həmsöhbətimiz onu da vurğuladı ki, hazırda intiharların və intihara cəhdlərin əsas səbəbi anlaşmazlıqlardan doğur: “Pandemiya dövründə insanlar uzun müddət ünsiyyətdən məhrum qaldılar. Özlərinə qapandılar. Bu da vacib məsələlərdən biridir. Bu fonda ailə konfliktlərinin yaranması, maddi sıxıntılar intihara gətirib çıxara bilir. Cəmiyyət bu barədə həm maariflənməli, həm də maarifləndirməlidir. Yəni bu cür hallara görə insan öz həyatına qəsd etməməlidir. Məlumat üçün bildirim ki, intihar edən şəxslərdə təfəkkür və idrak rol oynaya bilmir. Çünki psixoloji pozğunluqlar ön planda olur və insan şüurlu şəkildə hərəkət etmək imkanlarından məhrum olur. Qəzəb və acıq yığılır, nəticədə partlayış baş verir. İntiharların qarşısını almaq üçün ailələr davamlı olaraq maariflənməlidir, psixoloqlara müraciətlər etməlidirlər. Eyni zamanda, media və televiziyaların da burada rolu böyükdür. Onlar da maarifləndirmə işində fəallıq göstərməlidirlər”.
Ekspert hesab edir ki, xanımların intihara əl atmasının səbəblərindən biri də onların xarici kinoların təsirinə düşməsidir: “Bəzən insanlar kinolarda əks olunan bahalı həyat tərzini özlərində görə bilməyəndə çıxış yolunu intiharda görürlər”.
Günel CƏLİLOVA
