“Atamı 15-20 iyun arası, yəni 1 həftə "HB Güvən Klinika"sına yerləşdirdik. İlk və son çıxış vaxtının vəziyyətinə baxın. Onu doktor Vasif İsmayılın tövsiyəsi ilə "HB Güvən Klinika"sına apardıq. Atama səhv diaqnoz qoyaraq həyatını məhv etdilər. 2700 manat pul ödəməyimi istədilər. Ödədim. 15 iyunda "sətəlcəm" deyə guya "müalicə" edib daha da ağırlaşdırdılar. Dedik bəlkə onkomarkerlər də verilsin? Dedilər yox, lazım deyil”.
Bu məlumatı sosial şəbəkə hesabında jurnalist Zamiq Məmmədli paylaşıb. Onun iddiasına görə, Qarabağ əlili olan atasına yanlış verilən dərmanlar mədə qanamasına səbəb olduqdan sonra xəstəxana onu müalicə etmək istəməyib: “HB Güvən"də yazılan ağır dərmanlar (təxmini 200 AZN də HB həkimi Nazxanım Qasımovanın yazdığı dərmanlara ödəmişdik) mədəsindəki yaraları deşib qanaxma vermişdi. Artıq ağzından qan gəlirdi. "HB Güvən Klinika"sının yazdığı müalicəni dayandırdıq. Həkimi dedi ki, mənlik deyil. 20 iyunda atamı "HB Güvən Klinika"sından çıxardıq. Xəstəxanadan çıxanda onun metastaz vermiş onkoloji mədə xəstəsi olduğunu Onkoloji İnstituta apararaq müəyyən etdik”.
Z.Məmmədlinin atası 26 iyulda vəfat edib. Jurnalist bildirir ki, onun atası 1-ci qrup Qarabağ əlili idi: “HB Güvən”dən heç olmasa üzrxahlıq istədim, həkimi Nazxanım Qasımova adlı biri idi, Mansur adlı baş həkimə, Rəşad Zeynalov adlı direktorlarına dəfələrlə yazdım, ya cavab gəlmədi, ya da dedilər ki, get hara istəyirsən şikayət et. Hazırda məhkəməyə iddia ərizəsini hazırlayıram. Ora xəstəxana deyil, qəssəbxanadır!”.
"HB Güvən Klinika”sı: “Şikayətçi faktları olduğu kimi təqdim etməyib, bəzi məqamları təhrif edib, bəzilərini isə gizlədib”
Baş vermis hadisə ilə bağlı "HB Güvən Klinika”sı ilə əlaqə saxladıq. Klinikadan bizə bildirildi ki, iddiaçı Zamiq Məmmədli faktları olduğu kimi təqdim etməyib, bəzi məqamları təhrif edib, bəzilərini isə gizlədib: “Hər şeydən əvvəl Dağbəyi Məmmədovun vəfat etməsi ilə bağlı başsağlığı veririk. Bizə yönəldilən iddialara gəldikdə isə, cavabsız heç bir məqam qalmasın deyə, maddələr halında aşağıda cavablarımızı sıralayacağıq.
Xəstə Məmmədov Dağbəyi Qara oğlu (80 yaş, kişi) klinikaya müraciətinə qədər bədən temperaturunun yüksək olması, tənginəfəslik, ümumi zəiflik, halsızlıq, iştahsızlıq, qeyri-adekvat davranışlar və sair şikayətləri olub, COVID 19 üçün yoxlanıb və neqativ çıxıb, ev şəraitində dəstəkləyici müalicələr alıb.
Xəstəmiz 15 iyun 2020 tarixində klinikamıza müraciət etdi. Xəstənin yatışı həyata keçirildikdən sonra qanın, sidiyin ümumi analizləri, qanın biokimyəvi analizi, qan və sidik kulturası testləri aparıldı. Testlər və yanaşı faktorlar dəyərləndirildi, həkim tərəfindən ağciyər infeksiyası düşünüldü və ətraflı müayinə üçün ağciyər kompyuter tomoqrafiyası (KT) etdirildi. Mövcud ağciyər KT göstəricisinə əsasən xəstədə vaxtilə keçirilmiş olan və hazırda mövcud pnevmonik vəziyyət qeydə alındı. Həkim tərəfindən ağciyər vərəminə şübhə olduğundan xəstəyə Quantiferon testi istənildi. Stasionarda aparılan müalicə nəticəsində 3-cü sutkadan vəziyyəti klinik və laborator olaraq stabilləşməyə başladı və iltihabi göstəriciləri gerilədi, ümumi halı yaxşılaşdı. Xəstənin müalicəsinin davamı üçün evə aparıla biləcəyi və sahə həkiminin nəzarəti altında müalicəsini davam etdirilə biləcəyi bildirildi. Xəstənin yaxını (Zamiq Məmmədli) maddi sıxıntısının olmadığını və müalicənin stasionar şəraitdə davam etməsini xahiş etdi. Xəstə sonrakı müalicəsini evdə davam etdirməsi üçün növbəti həftə (şənbə-bazar sərt karantin günləri sonrası) 22 iyun 2020-ci il tarixində evə yazıldı. Evə yazılarkən xəstəyə kilo, yaş göstəriciləri nəzərə alınaraq, polivitamin, immunmodulyator (5 deyil, 3-lü kombinasiya ilə) minimal doza ilə təyin edildi. Xəstə ev şəraitində müvafiq dərmanları 3-4 gün qəbul etdikdən sonra yaxınları vəziyyətinin yaxşı olduğunu bildirdilər. Ev şəraitində müalicəsinin 7-ci günü (29 iyun 2020-ci il) xəstənin yaxınları onun yenidən halsızlaşdığını bildirdilər. Həkimi infeksionist Nazxanım Qasımova xəstənin bu vəziyyətinin iltihabi proseslə bağlı olmadığını, xəstənin altda yatan onkoloji xəstəliyinin olmasının araşdırılması gərəkliyini bildirdi. Doktor xəstə yaxınlarına hansı onkomarkerləri yoxlamaları gərəkliyini də söylədi və yönləndirdi. Həkimin məsləhəti ilə xəstə yaxınları onun onkomarkerlərini yoxlatdılar və xəstədə onkomarkerlərin (xüsusən CEA) yüksək olması (kolorektal-mədə-bağırsaq xərçəngi) təsdiqləndi”.
Günel CƏLİLOVA
