Qərbi Afrika ölkəsi Burkina Fasoda 2022-ci il çevrilişindən bəri hakimiyyətdə olan hərbi hökumət Fransa ilə diplomatik münasibətləri kəsib. Hökumətin açıqlamasında qeyd edilir ki, Fransa ardıcıl olaraq Burkina Fasonun maraqlarına zidd hərəkət edib.
Fransa ilə əlaqələri kəsmək qərarının "yalnız iki dövlət arasında diplomatik münasibətlərə aid olduğu" və bunun Burkina-Faso xalqı ilə Fransa arasındakı tarixi, humanitar, mədəni və sosial əlaqələrə təsir etmədiyi bildirilib. Həmçinin, Burkina-Fasodakı Fransa vətəndaşlarının təhlükəsizliyinin qanuna uyğun şəkildə təmin ediləcəyi bildirilib.
Rabitə naziri Gilbert Uedraoqo bildirib ki, hazırda qarşılıqlı hörmət, qarşılıqlı etimad, daxili işlərə qarışmamaq prinsipi və milli suverenliyə hörmət əsasında münasibətlərin inkişaf etdirilməsi üçün zəruri şərtlər mövcud deyil.
Uedraoqo bu qərarın Fransa ilə münasibətləri nəzərdən keçirdikdən sonra verildiyini bildirib. O, əlavə edib ki, Fransa "ölkəni və Sahel bölgəsini dağıdan dağıdıcı qanunsuz qrupları və terrorçuları fəal şəkildə dəstəkləməklə neokolonial ambisiyalarını açıq şəkildə ortaya qoyur.
Fransa Xarici İşlər Nazirliyi isə Burkina Fasonun diplomatik əlaqələri kəsmək qərarını "düşməncə və əsassız" adlandırıb. Eyni zamanda Burkina Fasodakı Fransa vətəndaşları mövcud şəraitdə daha ehtiyatlı olmağa çağırılıb.
2022-ci ilin sentyabr ayında baş verən çevrilişdən bəri hakimiyyətdə olan kapitan İbrahim Traorenin rəhbərlik etdiyi hərbi hökumət Qərb əleyhinə, xüsusən də Fransa əleyhinə siyasət yürüdür. Bir vaxtlar Şimali, Mərkəzi və Qərbi Afrikada böyük bir güc olan Fransa, son illərdə, xüsusən də Sahel bölgəsindəki keçmiş Afrika koloniyalarının bir çoxunun ondan uzaqlaşaraq Rusiya və Çinlə daha sıx əlaqələr qurması ilə nüfuzunu itirir.
Tahir TAĞIYEV
