Rusiya Prezidenti Vladimir Putin ölkədə yanacaq təchizatı ilə bağlı problemlərin davam etdiyini rəsmən etiraf etdi. O, yanacaqdoldurma məntəqələrində növbələrin yarandığını və bəzi yanacaq növlərinin mövcud olmadığını bildirib və əlavə edib ki, daxili bazarın təchizatını təmin etmək üçün yeni tədbirlər görülür.
Moskvada enerji şirkətləri rəhbərləri və hökumət rəsmiləri ilə görüşən Putin bildirib ki, sürücülər və müəssisələr üçün yanacaq təchizatı ilə bağlı problemlər hələ də davam edir. O, bildirib ki, bu yaxınlarda hökumət üzvləri ilə daxili yanacaq vəziyyətini ətraflı müzakirə edib və enerji infrastrukturuna hücumların təsirini minimuma endirməyin vacibliyini vurğulayıb.
Vətəndaşlar, müəssisələr və vacib qurumlar üçün fasiləsiz yanacaq təchizatının təmin edilməsinin prioritet olduğunu vurğulayan Putin, bununla bağlı əlavə tədbirlərin nəzərdən keçirildiyini qeyd edib.
Böyük neft emalı zavodlarının tam gücü ilə işlədiyini, orta və kiçik miqyaslı müəssisələrin də istehsala cəlb olunduğunu bildirən Putin, texniki xidmət proseslərinin qısaldıldığını və planlaşdırılan dayandırmaların sonrakı tarixlərə təxirə salındığını deyib.
Yanacaq tədarükünün artırılmasının və qiymətlərin münasib səviyyədə saxlanılmasının vacibliyinə işarə edən Putin, daxili istehlakçıları qorumaq üçün benzin və aviasiya yanacağının ixracının müvəqqəti olaraq dayandırıldığını açıqlayıb. Putin dizel ixracına tamamilə qadağa qoyulmasının da nəzərdən keçirildiyini bildirib: "Əvvəllər yaradılmış yanacaq ehtiyatlarını daxili bazara tədarük etmişik. Lakin sürücülər və müəssisələr üçün problemlər qalmaqdadır. Təəssüf ki, yanacaqdoldurma məntəqələrində növbələr var və tələb olunan benzin növü həmişə mövcud olmur".
Putin həmçinin bildirib ki, ölkədə benzin ehtiyatları 1,7 milyon ton təşkil edir ki, bu da ötən ilin eyni dövrü ilə müqayisədə 4 faiz azdır.
Ukraynanın Rusiya neft emalı zavodlarına dron hücumlarından sonra çox sayda obyektin təmirə dayandığı bildirilir. Yay mövsümündə artan tələbat və kənd təsərrüfatı sektorunda yüksək yanacaq istehlakı da təklifə təzyiqi artırır. Moskva və Sankt-Peterburq da daxil olmaqla təxminən 20 bölgədə yanacaq satışına müxtəlif məhdudiyyətlər tətbiq olunur.
Tahir TAĞIYEV
