İrəvanda ürəyindən ağır əməliyyat keçirən yezidilərin başçısı Əziz Tonoyan erməni hakimiyyətindən də şikayətlənib, amma sonra yaltaqlanmağa başlayıb.
O, müxtəlif uydurma fikirlər səsləndirib: “Qoy bugünkü erməni hakimiyyəti yezidilərə fərq qoymasın və bizə qarşı görməməzlik etməsin. Bizə çoxları kürd deyirlər. Bununla da bizi kürdləşdirmək istəyirlər. Biz kürd deyilik, biz yezidiyik. Kürdlər müsəlmandırlar. Bizim onlarla heç bir əlaqəmiz yoxdur. Mən yezidi xalqının tarixini yazan bir aliməm. Bu gün 60 kənddə yezidi dilində dərs keçilir. Təəssüf ki, onlardan 5 kənddə yezidilərə kürd dilində dərs keçirlər, buna son qoymalıyıq”.
Daha sonra kökü bilinməyən bu şəxs bunları deyib: “Biz Qarabağ müharibəsində 500 nəfər yezidi əsgər yollamışıq döyüşə, 42 leş vermişik. Qarabağ hərəkatı başlayanda mən də onların yanında olmuşam. Azərbaycan nə istəyir Qarabağdan? Mənim valideynlərim də deyirdilər ki, Qarabağ ermənilərindir. Biz Azərbaycana bir qarış da torpaq verməyəcəyik. Onlar çox qorxaq millətdir. Bizim uşaqlar bir güllə atan kimi hamısı qalxıb qaçırdılar”.
Aydın məsələdir ki, bütün bunlar Ermənistan hakimiyyətinin apardığı uğursuz təbliğatın bir hissəsidir. Bununla belə bir rəy yaratmağa çalışırlar ki, guya Ermənistan çoxmillətli ölkədir. Burada təkcə ermənilər deyil, digər millətlərin də nümayəndələri yaşayırlar. Ancaq reallıq ondan ibarətdir ki, Ermənistan monoetnik dövlətdir. Əhalinin, demək olar ki, hamısı ermənilərdən ibarətdir. Otuz il əvvəl Ermənistanda azərbaycanlılar, ruslar, yezidi kürdlər yaşayırdılarsa, indi bir nəfər də olsun azərbaycanlı yaşamır. O cümlədən, ruslar bu ölkəni tərk ediblər. Həmçinin, 30 il əvəl Ermənistanda 70 min nəfərədək yezidi kürd yaşayırdısa, indi onların sayı 6 min nəfərə düşüb.
Əli Orucov: “İndi də belə bir rəy yaratmaq istəyirlər ki, guya bu ölkədə başqa millətlərin də nümayəndələri var”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, Ermənistanın bu kimi addımları sırf təbliğat xarakterlidir: “Dünyaya göstərmək istəyirlər ki, guya Qarabağ məsələsində təkcə ermənilər deyil, digər millətlərin də nümayəndələri onların mövqeyindən çıxış edirlər. Beləcə, yezidi kürdlər üzərində oyun oynayırlar. Ancaq Ermənistanın bu yöndə səylərinə rəğmən, bu kimi cəhdlər uğursuzluğa məhkumdur. Ona görə ki, artıq bütün dünya bunun fərqindədir. O mənada ki, Ermənistanda ermənidən başqa millət yaşamır. Çox az sayda yezidi kürd yaşayır ki, onlar da uzun illərdir diskriminasiyaya məruz qalırlar. İndi də belə bir rəy yaratmaq istəyirlər ki, guya bu ölkədə başqa millətlərin də nümayəndələri var. Otuz il əvvəl məlum hadisələr başlayanda azərbaycanlılarla yanaşı, ölkədə yaşayan müsəlman kürdlər də qovuldu. Ümumiyyətlə, digər etniklərin Ermənistanda varlığından söhbət gedə bilməz. Bu baxımdan bu məsələdə Ermənistanın danışmağa əsası yoxdur”.
Vidadi ORDAHALLI
