Dövlətimizi hədəfə alan qara qüvvələrin niyyətləri dövlətçiliyimizə qəsd etmək, onun müstəqilliyini boğmaqdır. İndiyə qədər Azərbaycan dövləti və xalqı çox ağır imtahanlardan keçib. Keçən ilin yayında Gəncədə baş verən qanlı olay da bu hadisələrdən biridir. Azərbaycan dövlətçiliyinə qarşı qəsd aktı kimi dəyərləndirilən Gəncə hadisələrindən bir il ötür.
Məlum olduğu kimi, Gəncədə baş verən hadisələr dövlətə və dövlətçiliyə qarşı atılan addım idi və bu addımı atanlar layiqli cəzalarını aldılar. Gəncə hadisələrinin Azərbaycan dövlətini istəməyən qara qüvvələr tərəfindən törədildiyi sirr deyil. Qeyd edək ki, hadisə baş verən zaman yerli politoloqlar olayla bağlı diqqətçəkən açıqlamalar verirdilər. Azərbaycanın ikinci böyük şəhərində yaşanan bu acı olayın dini ekstremist qüvvələr tərəfindən törədildiyi də istisna edilmirdi. Burada xarici dövlətlərin xüsusi xidmət orqanları və düşmən şəxslərin də rolunun az olmadığı məlumdur.
Qeyd edək ki, keçən ilin iyul ayında 150-200 nəfərdən ibarət radikal dini yönümlü bir qrup şəxs Gəncə Şəhər İcra Hakimiyyətinin inzibati binasının önündəki meydana toplaşaraq asayişi kobud şəkildə pozmağa cəhd göstərmişdi. Qanunsuz hərəkətlərin qarşısı alınarkən xidməti vəzifələrini yerinə yetirən iki polis zabiti – Gəncə Şəhər Baş Polis İdarəsinin rəis müavini, polis polkovniki İlqar Balakişiyev və Nizami Rayon Polis İdarəsinin rəis müavini, polis polkovnik-leytenantı Səməd Abbasov radikal ünsürlərin kəsici-deşici alətlərlə yetirdikləri zərbələr nəticəsində şəhid oldular.
Bildiyimiz kimi, hadisənin baş verdiyi bir il müddətində olayı törədən şəxslər həbs edilib, istintaqı başa çatanlarla bağlı həbs-qətimkan tədbirləri seçilib.
Azərbaycan Prezidentinin ictimai-siyasi məsələlər üzrə köməkçisi Əli Həsənov ötən il Gəncədə baş vermiş terror aktlarının ildönümü ilə bağlı KİV-ə xüsusi açıqlama verib. Açıqlamada Gəncə hadisələrinin baş verməsinin əsl səbəbləri göstərilib.
Ə.Həsənov qeyd edir ki, ötən il iyul ayının 3-də axşam Gəncə Şəhər İcra Hakimiyyətinin başçısına qarşı sui-qəsd törədən birinin cinayətinin terror xarakteri, cinayəti törədənin xarici vətəndaş olduğu, Azərbaycan dövləti tərəfindən sanksiyalaşdırılmayan döyüş əməliyyatlarında iştirak etdiyi məlumdur. “Yerli və xarici mediada dərc olunmuş materiallarda Y.Səfərovun həyat yoldaşının bir neçə dəfə yayımlanmış videomüraciətlərində onun bu əməli şəxsi motivlərlə, qisas naminə və ya bəzilərinin iddia etdiyi kimi, "sosial zülmə" qarşı etiraz olaraq deyil, məhz xaricdə qanunsuz silahlı birləşmələrin tərkibində döyüşdüyü "ideallar" naminə, yəni Azərbaycanda "şəriət dövləti yaratmaq" üçün törətdiyi də bəlli olub.
Gəncədə terakt baş verəndən dərhal sonra radikal dini fundamentalizmi təbliğ edən “Facebook” səhifələri və saytlar, habelə Vətənə xəyanət ittihamı ilə mühakimə edilmiş separatçılarla bağlı kütləvi informasiya vasitələri Yunis Səfərovu yeni "Gəncəbasar qisasçısı", "qəhrəman" elan etməyə tələsdilər. Bu dəfə də onlara Avropadakı anti-Azərbaycan müxalifəti və onların rəhbərlik etdiyi internet kanallarından, orada yaşayan antimilli ünsürlərdən kömək gəldi. Rusiya və digər xarici ölkələrdə separatçı kimi “ad-san qazanmış" çevrələr də cinayətkarın müdafiə komitəsini yaradıb xarici dövlət rəsmilərinə müraciət etdilər” - deyə Ə.Həsənov qeyd edir.
Qabil Hüseynli: “Hüquq-mühafizə orqanları tərəfindən bu qara qüvvələrin əməlləri vaxtında ifşa edilərək onların fəaliyyəti yerindəcə lokallaşdırıldı”
Gəncə hadisələrindən ötən bir il ərzində baş verənləri şərh edən politoloq Qabil Hüseynli “Bakı-Xəbər”ə bildirdi ki, hadisəni törədənlər layiqli cəzalarını aldılar. “Əlbəttə, Gəncə hadisəsi göstərdi ki, ölkəmizə, dövlət müstəqilliyimizə qarşı kənardan yönləndirilən sui-qəsdlər hələ dayanmayıb, bəzi vətəndaşlarımız isə həmin qüvvələrin əlində alət olmaqda davam edirlər. Gəncə hadisləri də Azərbaycanı içərisindən silkələmək məqsədilə törədilən bir sui-qəsd hadisəsi idi. Şükürlər olsun ki, bu sui-qəsd hadisəsi də Azərbaycanın hüquq-mühafizə orqanları tərəfindən cəsarətlə və vaxtında zərərsizləşdirildi. Bir çox şəxslər hüquqi məsuliyyət daşıdıqları üçün həbs edildilər, onların əməlləri ilə bağlı istintaq aparıldı. Bu cinayətkar şəxslərin bir çoxunun istintaqı yekunlaşaraq böyük əksəriyyətinə həbs cəzası kəsildi. Bütün bunlar onu göstərir ki, prosesin baş verməsində dini yönümlü, bizimlə qonşu olan ölkədə təlim keçmiş, hətta Suriya ərazisinə qədər gedib çıxmış insanların rolu var. Bu insanlar bizimlə qonşu olan dini dövlətdən aldıqları təlimat əsasında hərəkət edərək Azərbaycan dövlətçiliyinə qarşı bu cür xəyanətkar addım atdılar. Hüquq-mühafizə orqanları tərəfindən bu qara qüvvələrin əməlləri vaxtında ifşa edilərək onların fəaliyyəti yerindəcə lokallaşdırıldı və qarşısı alındı” - deyə Q.Hüseynli vurğuladı.
İradə SARIYEVA
