18/09/2019 12:05
728 x 90

Buraxılış ərəfəsində olan TANAP “Gəncə 1 il” fonunda fəallaşan radikal islamçı qrupun hədəfində...

“Sözügedən radikal qruplaşmaların yenidən fəallaşmasını TANAP-la əlaqələndirmək olar”

img

Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov ötən il Gəncədə baş vermiş terror aktlarının ildönümü ilə bağlı KİV-ə xüsusi açıqlama verib.

Açıqlamada cənab Əli Həsənov bir sıra məqamlara toxunub: “Azərbaycan dövlətçiliyinə qarşı qəsd aktı kimi dəyərləndirilən Gəncə hadisələrindən bir il ötür. Ötən müddətdə aparılmış istintaq tədbirləri nəticəsində ortaya çıxan faktlar bir daha təsdiqlədi ki, Gəncə hadisələri bəzi dövlətlərin radikal klerikal dairələrinin, separatçıların və ölkə daxilində siyasi fəaliyyət pərdəsi altında şəxsi ambisiyalarını həyata keçirmək istəyən qrupların dövlətə və milli maraqlarımıza qarşı birgə məkrli təxribatı idi. Mediada, xüsusən sosial mediada geniş yayılmış məlumatlardan görünür ki, həmin qüvvələrin ötən il reallaşdırmağa çalışdıqları ssenarinin puç edildiyi, vətəndaşlarımızın dövlətçiliyin keşiyində durduğunu nümayiş etdirdiyi Gəncə hadisələrinin ildönümü ilə əlaqədar üzvlərinin əksəriyyətini Azərbaycanın keçmiş vətəndaşları təşkil edən radikal islamçı qruplaşmalardan biri yenidən fəallaşıb”.

Bununla yanaşı, Əli Həsənov açıqlamasında son dərəcə vacib məqama toxunub: “Bu gün terroru təbliğ edən radikalların və onların havadarlarının yenidən fəallaşması, Azərbaycana təhdidlər ünvanlamaları isə Gəncə hadisələrinin ildönümü ilə yanaşı, TANAP-ın istifadəyə veriləcəyi vaxta təsadüf edir. Qəribə deyil ki, Azərbaycan dövləti və onun müstəqil siyasətinin əleyhinə son dövrlərdə Ermənistan, bəzi dövlətlərdəki klerikal dairələr, ekstremistlər, xarici ölkələrə qaçmış, sadəcə, pula və məişət rahatlığının təminatına can atan bəzi azərbaycanlılar tərəfindən aparılan təmərküzləşmiş, təhlükəli ideoloji təxribat bu günlərdə yenidən canlanıb”.

Bütün bu deyilənlərin fonunda, ehtimal etmək olarmı ki, fəallaşan radikal islamçı qruplar TANAP-ı hədəf götürürlər?

  • Fikrət Sadıqov: “Azərbaycan güclü dövlət olduğuna görə bu kimi cəhdlər heç bir nəticə verməyəcək”

Məsələyə münasibət bildirən keçmiş diplomat, politoloq Fikrət Sadıqov bunu istisna etmədi: “Sözügedən radikal qruplaşmaların yenidən fəallaşmasını TANAP-la əlaqələndirmək olar. Çünki adətən bu kimi fəallaşmalar təsadüfi olmur. Bu minvalla istəyirlər ki, hansısa vacib açılışı, tədbiri əngəlləsinlər. Bu, bir növ, terrorçu fəaliyyətlə məşğul olan qruplaşmaların daxilindən gələn siyasi addımlardır. Onlar böyük hadisələr, açılışlar, sammitlər ərəfəsində xüsusu fəallıq göstərirlər. Ona görə də bu ehtimal kifayət qədər reallığa söykənir. Bununla onlar həm də ona görə fəallaşırlar ki, öz varlıqlarını sübut etsinlər. Belə hadisələrlə özlərini yenidən gündəmə gətirmək istəyirlər. Reallıq ondan ibarətdir ki, zaman-zaman müəyyən dairələr Azərbaycanın əldə etdiyi böyük iqtisadi uğurlardan narahat olublar. Hər vasitə ilə çalışırlar ki, buna mane olsunlar. Çünki bu qüvvələr Azərbaycanın uğurlarını həzm edə bilmirlər. Ancaq Azərbaycan güclü dövlət olduğuna görə bu kimi cəhdlər heç bir nəticə verməyəcək”.

Vidadi ORDAHALLI

Son xəbərlər