Məlum olduğu kimi, Azərbaycan-Rusiya-İran dövlət başçılarının görüşü təxirə salınmışdı. Bu, sırf texniki səbəblərə görə baş versə də, Azərbaycanı istəməyən qüvvələr, xüsusilə də Ermənistan mövzudan öz xeyirləri üçün yararlanmağa çalışıb, müxtəlif məzmunlu dezinformasiyalar tirajlayıblar.
Rusiya Prezidentinin köməkçisi Yuri Uşakov verdiyi açıqlama ilə ermənilərin sevincini tamamilə alt-üst etmiş olub. O bildirib ki, təxirə salınmış Rusiya-Azərbaycan-İran sammiti Rusiyada keçiriləcək, amma onun keçiriləcəyi yeni tarix haqqında hələlik məlumat yoxdur: "Biz təcrübi qaydalara görə onu təxirə saldıq və tərəfdaşlarımızla görüşün keçiriləcəyi yeni tarix barədə razılıq əldə etmək barədə vədləşdik, baxmayaraq ki, görüşün bizim ölkədə keçiriləcəyi aydındır".
Qeyd edək ki, avqustun 14-nə Soçidə təyin edilmiş üçtərəfli sammitin təxirə salınması texniki səbəblərdən baş verib. Bu barədə məlumatı Rusiya Prezidentinin mətbuat katibi Peskov bildirmişdi.
Xatırladaq ki, Rusiya-Azərbaycan-İran formatında danışıqlar ilk dəfə 2016-cı ilin avqustunda Bakıda keçirilib. Həmin vaxt əsas müzakirə mövzusu birgə iqtisadi layihələr və regional təhlükəsizlik məsələləri olub. Sammitin yekunlarına görə tərəflər birgə bəyannamə qəbul etmiş, üçtərəfli əməkdaşlığı inkişaf etmək niyyətlərini təsdiq etmişlər.
Rusiya-İran-Azərbaycan formatında yüksək səviyyədə növbəti görüş 1 noyabr 2017-ci il tarixində Tehranda keçirilib. Üç ölkə lideri geniş məsələlər dairəsini, o cümlədən, energetika sahəsində qarşılıqlı fəaliyyət, Suriya nizamlanması və Xəzərdə əməkdaşlıq məsələlərini müzakirə etmişlər. Həmin vaxt Rusiya Prezidenti Vladimir Putin həmkarlarını növbəti üçtərəfli sammit üçün Rusiyaya dəvət etmişdi. Yəni Soçidə keçirilməsi nəzərdə tutulan görüşün tarixi əvvəlcədən planlaşdırılmışdı. Uşakovun görüşün baş tutacağı ilə bağlı verdiyi açıqlama ermənilərin növbəti yalanlarını ifşa etmiş oldumu?
Nəzakət Məmmədova: “Bu, erməni təbliğat maşınının növbəti ifşası sayıla bilər”
Politoloq Nəzakət Məmmədova “Bakı-Xəbər”ə açıqlamasında bildirdi ki, ermənilərin bu yöndə apardıqları təbliğat sırf təxribat xarakterli olmaqla yanaşı, həm də onların tam mahiyyətinə uyğun idi: “Üç ölkə prezidentinin görüşünün təxirə salınması mövcud formatın pozulması deyildi. Sadəcə, rəsmi məlumata görə, texniki səbəbdən, qeyri-rəsmi mülahizələrə görə isə Rusiyada baş verən müəyyən proseslərlə əlaqədar müvəqqəti təxirə salınma idi. Bunun Ermənistan tərəfindən xüsusi ajiotajla qarşılanması da aydındır. Bəllidir ki, onlar bizimlə həm də informasiya müharibəsi aparırlar. Baş verən istənilən hadisədən öz məqsədləri və xeyirləri üçün istifadə etməyə çalışırlar. Bu bir daha ermənilərin reallıq hisslərindən uzaq olduğunu göstərir. Tədbirin təxirə salınmasının Azərbaycanla, ümumiyyətlə, əlaqəsi yoxdur. Rusiya Azərbaycana münasibətini qətiyyən pisləşdirməyib, əksinə, əlaqələr daha da dinamik şəkildə inkişaf edir. Azərbaycanın Birinci vitse-prezidenti Prezident Putin tərəfindən ordenlə təltif olunub. Azərbaycanın müdafiə naziri Rusiyaya səfər etdi. Rusiyanın daha çox maraqlı olduğu Qarabağ məsələsində sabitlik rejiminə Azərbaycan daha çox riayət edir, bununla danışıqlar prosesinin davamlılığı təmin edilmiş olur. Ermənistan isə, əksinə, bu gün regionu alovlandıracaq müharibənin başlanması məqsədilə qızışdırıcı bəyanatlar səsləndirir. Məqsəd Rusiyanı regionda ABŞ-la üz-üzə gətirməkdir. Bu səbəbdən Rusiya ilə Azərbaycanın mövqeləri hazırda daha çox üst-üstə düşür və Rusiya Prezidentinin üçtərəfli formatdan məqsədli şəkildə imtina etməsi inandırıcı deyil və ermənilərin növbəti dezinformasiyalarından biridir. Rusiya rəsmisinin verdiyi açıqlamadan belə aydın oldu ki, yaxın zamanlarda nəzərdə tutulan görüş baş tutacaq. Bu, erməni təbliğat maşınının növbəti ifşası sayıla bilər”.
Məhəmmədəli QƏRİBLİ
