“Təəssüf ki, Ermənistanın bundan nəticə çıxarıb danışıqlarda konstruktiv mövqe tutmaq ehtimalı olduqca zəifdir”
Məlum olduğu kimi, Azərbaycan Dövlət Sərhəd Xidməti Ermənistanla sərhədin Qazax rayonundan keçən hissəsində sərhədçilərimizin yeni taktiki və strateji mövqelər tutduğunu, düşmənin aramsız atəşlərinə baxmayaraq, bu mövqelərdə möhkəmləndiyini açıqlayıb.
Bu haqda iki gün əvvəl KİV-də yayılmış xəbərləri DSX-nin Aparat rəhbəri, general Elçin İbrahimov da təsdiqləyib. Generalın sözlərinə görə, bu mövqelər Ermənistan ordusunun həmin istiqamətdəki döyüş postlarına və postlara gedən yollarına daha yaxşı nəzarət etməyə imkan yaradıb.
E.İbrahimov detalları açıqlamasa da, xəbərlərə görə, DSX-nin “Qazax” diviziyasının bölmələri Babakər dağı istiqamətində irəliləyiblər və habelə Ermənistan ərazisində həmin istiqamətdən keçən əsas nəqliyyat arteriyalarına da nəzarət imkanı qazanıblar.
E.İbrahimov onu da bildirib ki, ötən ilin payızında Qazax və Ağstafa rayonları ərazisində sərhəd hissəsinin DSX-nin nəzarəti altına verilməsi hərbi hissələrin və Azərbaycan Müdafiə Nazirliyinin birləşmələrinin döyüş qabiliyyətinin daha da artırılmasına, yeni ehtiyat qüvvələrin yaradılmasına və şəxsi heyətin döyüş qabiliyyətinin gücləndirilməsinə yönəlmişdi. Ermənistanla sərhədin bu hissələrinin DSX-nin nəzarəti altına verildiyi andan etibarən 9 ay ərzində Qazax sərhəd diviziyası yaradılıb, onunla sərhədin bu hissəsində mövqelər möhkəmləndirilib.
O da məlumdur ki, Ermənistan Dağlıq Qarabağ münaqişəsinin nizamlanması ilə bağlı danışıqlarda pozucu mövqe sərgiləməkdə davam edir. Ötən il Ermənistanda hakimiyyətin dəyişməsi də bu yöndə vəziyyəti müsbətə doğru dəyişməyib. Əksinə, Paşinyan hakimiyyəti danışıqlarda daha destruktiv mövqe tutmaqdadır.
Bütün bu deyilənlərin fonunda maraqlıdır, Azərbaycan sərhədçilərinin Qazax istiqamətində irəliləməsi Ermənistanın Qarabağa dair real danışıqlara getməsində nə dərəcədə rol oynaya bilər?
- Nəzakət Məmmədova: “DSX-nin son tədbirləri istənilən halda Azərbaycanın Ermənistana uğurlu demarşı sayıla bilər”
Sözügedən məsələni baki-xeber.com-a şərh edən politoloq Nəzakət Məmmədova buna bir neçə aspektdən yanaşdı: “Sərhəd xətlərinin irəli çəkilməsi və yeni sərhəd məntəqələrinin yaradılması Azərbaycanın döyüş əzmini bir daha nümayiş etdirdi. Son günlərdə bildiyimiz kimi Paşinyanın Xankəndidəki məlum bəyanatından sonra sülh danışıqlarının davam etməsi təhdid altına düşüb və bu, iki ölkə arasında müharibə ehtimalını gücləndirib. Azərbaycanın müvafiq dövlət orqanları işğalçı qoşunlarla təmas xəttində və Ermənistanla dövlət sərhədində fəaliyyətlərini genişləndiriblər. Müdafiə naziri general-polkovnik Zakir Həsənovun cəbhəboyu zonada tikilən hərbi hospitalın açılışını etməsi, Dövlət Sərhəd Xidmətinin Qazax rayonunda yeni məntəqələr yaratması və düşmənin strateji obyektlərini nəzarət altına alması bunu sübut edir. Təəssüf ki, Ermənistanın bundan nəticə çıxarıb danışıqlarda konstruktiv mövqe tutmaq ehtimalı olduqca zəifdir. Çünki Ermənistan rəhbərliyi əslində qızışdırıcı bəyanatlar verib Azərbaycanı müharibəyə təhrik etmək üçün addımlar atır. Bununla da müharibəyə səbəb amilini ölkəmizin üzərinə atmaq istəyirlər. Lakin Paşinyanın Qarabağı Ermənistan ərazisi elan etməsi sülh danışıqlarının davam etdirilməsi imkanlarını tükəndirir. Azərbaycana münaqişəni hərbi vasitələrlə həll etməkdən başqa alternativ qoymur. DSX-nin son tədbirləri istənilən halda Azərbaycanın Ermənistana uğurlu demarşı sayıla bilər”.
Vidadi ORDAHALLI
.jpg)
.jpg)
