20/09/2019 23:06
728 x 90

Paşinyan ilyarımlıq uğursuzluğunun məsuliyyətini baş müşavirlərinin üstünə atır...

“İstənilən halda, bütün bunlar Paşinyanın uğursuz idarəçiliyinin göstəricisidir”

img

Avqustun 15-də Ermənistanın Baş naziri Nikol Paşinyan komandasının 3 üzvünü - iki müşavirini və köməkçisini vəzifədən azad edib. Bunun səbəbi açıqlanmır. Ermənistan KİV-inin məlumatına görə, sözügedən şəxslər iqtisadi bloka görə məsul idilər.

Belə ki, cümə axşamı Baş nazirin baş müşavirləri Arsen Qasparyan, Aram Qaribyan, habelə Baş nazirin köməkçisi Mqer Saakyan vəzifədən azad ediliblər. Hökumətdən bu istefaları şərh etməyiblər. Qeyd edək ki, Qasparyan bundan öncə dəfələrlə Rusiya mətbuatının təzyiqlərinə məruz qalıb. Mətbuat Qasparyanı Mərkəzi Kəşfiyyat İdarəsi ilə əlaqədə ittiham edib. Qasparyan bundan əvvəl 7 il müddətində Serj Sarkisyanın baş müşaviri kimi çalışıb.

Digər tərəfdən, Ermənistanda bir sıra müşahidəçilər baş verənləri Paşinyan komandasında dərinləşmə təmayülü olan böhran və fikir ayrılıqlarının göstəricisi kimi qiymətləndirirlər. Başqa bir tərəfdən, bu həm də onun göstəricisidir ki, Paşinyanın ilyarımlıq hakimiyyəti bir sıra uğursuzluqlarla müşahidə olunur. Faktiki olaraq, ötən müddət ərzində Ermənistan Baş naziri hansısa sahədə dönüş yarada bilməyib. Ona görə də Paşinyan uğursuzluğun məsuliyyətini müşavirlərin üstünə atır. Bu minvalla, özünü sığortalamaqla bağlı uğursuz gediş edir.

Maraqlıdır, ekspertlər Paşinyanın son addımını bu baxımdan necə dəyərləndirirlər?

  • Məhəmməd Əsədullazadə: “Rusiya Təhlükəsizlik Şurasının katibi Patruşevin İrəvana səfəri fonunda iki müşavirin işdən çıxarılması təsadüfi deyil”

Məsələyə münasibət bildirən politoloq Məhəmməd Əsədullazadə buna bir neçə prizmadan yanaşdı: “Ermənistan Baş naziri Nikol Paşinyanın öz iki müşavirini işdən çıxarması, hesab edirəm, Moskvanın diqtəsi ilə baş tutub. Rusiya Təhlükəsizlik Şurasının katibi Patruşevin İrəvana səfəri fonunda iki müşavirin işdən çıxarılması təsadüfi deyil. Çünki həmin müşavirləri Rusiya Mərkəzi Kəşfiyyat İdarəsinin agenti hesab edirdi. Rusiya mətbuatı yazırdı ki, həmin şəxslər anti-Rusiya fəaliyyəti ilə məşğuldurlar. Ona görə də bu kimi dəyişikliklər siyasi proseslərdən irəli gəlir. Bundan əlavə, məlum qərar onu göstərir ki, Paşinyanın idarəetmə sistemi populizmə əsaslanır. Onun adamları hələ də inqilabın eyforiyası ilə yaşayırlar və hesab edirlər ki, ölkəni “Qarabağ klanı”ndan azad etdikləri üçün xalq bunlara minnətdar olmalıdır. Ona görə də ölkə idarəetmə sistemində boşluqlar baş verir. Hesab edirəm ki, Paşinyanın komandası getdikcə Rusiyapərəstlərdən ibarət olacaq. Moskva çalışır ki, Vaşinqtonyönümlü şəxslər sistemdən uzaqlaşsın və bununla Paşinyan ətrafına öz adamlarını gətirməklə onu neytrallaşdırsın. Məhz Paşinyanın idarəetmədə təcrübəsi olmadığı üçün, Moskva onu öz təsirinə bununla salacaq. Hakimiyyətdə ciddi fikir ayrılığının da olması şübhəsizdir. Bəzi vəzifəlilər inqilabda verilən vədlərin yerinə yetirilmədiyini qeyd edərək sistemdən uzaqlaşır və görürlər ki, bu idarəetmə ilə uzağa getmək olmaz. İstənilən halda, bütün bunlar Paşinyanın uğursuz idarəçiliyinin göstəricisidir. Paşinyan nə qədər çalışsa da, məsuliyyətdən kənarda qala bilməyəcək”.

Vidadi ORDAHALLI

Son xəbərlər