“Erməni rəsmiləri yaxşı bilirlər ki, Kazaryanın fərarilik etməsi orduda mövcud olan acınacaqlı vəziyyəti bütün çılpaqlığı ilə ortaya qoyur”
Məlum olduğu kimi, bu günlərdə erməni əsgəri Kazaryan Aro Xaykoviç işğal altındakı Dağlıq Qarabağ bölgəsinə yerləşdirilmiş erməni hərbi birləşmələrindən fərarilik edərək, ağ bayraqla Azərbaycan tərəfinə təslim olub.
Belə ki, Kazaryan avqustun 12-də səhər saatlarında cəbhənin Füzuli istiqamətində işğalçı ordudan qaçaraq, Azərbaycan Ordusuna sığınıb. O, xidmət etdiyi hərbi hissədə mövcud olan özbaşınalıq, qeyri-insani münasibət, komandirlərinin və digər əsgərlərin təzyiqinə məruz qaldığı üçün fərarilik etdiyini deyir. Bu səbəbdən orduda xidmət etmək istəmədiyini bildirib. Bu onu göstərir ki, Kazaryan üzləşdiyi təhqirlərə və alçaldılmasına dözməyərək, şüurlu şəkildə qaçmaq planı qurub. Səhər saatlarında postda olanda tək qalan kimi silahını qoyaraq, qaçıb. Erməni əsgərin üzərindəki zədələr, xüsusilə əlində popiros kötüklərinin söndürülməsi nəticəsində yaranan izlər erməni hərbi birləşmələrində baş verənləri əyani şəkildə göstərir.
Ancaq qəribədir ki, Kazaryanın ordudan dözülməz şərait üzündən qaçmasını etiraf etməsinə və bu səbəbdən xidmət etmək istəmədiyini deməsinə rəğmən, Ermənistan rəsmiləri hər vəchlə buna başqa don geydirirlər. Gah deyirlər ki, erməni əsgəri azaraq Azərbaycan ərazisinə keçib. Eləcə də özlərindən uydururlar ki, sözügedən əsgər oğurlanıb və s.
Maraqlıdır, erməni rəsmiləri Azərbaycana qaçmış fərari əsgər üzərində niyə bu qədər əsirlər?
- Əhməd Şahidov: “Ona görə də bütün vasitələrlə bunu örtməyə və hər vəchlə həqiqətləri xalqdan gizlətməyə çalışırlar”
Məsələyə münasibət bildirən Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov Ermənistan rəsmilərinin bu yöndə narahatlığını bir sıra amillərlə əlaqələndirdi: “Kazaryan amili Ermənistan ordusunda acınacaqlı vəziyyətin keçmiş rejimin dövründəki kimi davam etdiyini əyani şəkildə sübut etdi. İndiyə qədər erməni mediası orduda korrupsiyanın, özbaşınalığın, qeyri-insani münasibətlərin olduğunu yazır, komandirlərin əsgərləri təhqir etdiyini, əsgərin əsgəri pis əməllər üçün istifadə etdiyini qeyd edirdilər. Kazaryanın Azərbaycan tərəfinə keçməsi bunu bir daha təsdiq etdi. Müayinə zamanı onun üzərində işgəncə izlərinin olması bir daha Ermənistan ordusunda fərariliyin, “dedovşina”nın və bu kimi digər problemlərin olduğunu ortaya qoydu. Azərbaycan mətbuatı bu məsələni işıqlandırdıqdan sonra Ermənistan cəmiyyətində xeyli gərginlik yaranır. Bu da təbii ki, Paşinyan hakimiyyətinə inamsızlığı artırır. O üzdən, bütün bunlara görə erməni rəsmiləri bərk narahatdırlar. Hər vasitə ilə əsgərin fərarilik etməsinə başqa don geydirməyə səy göstərirlər. Bu minvalla, sanki daxili auditoriyaya hesablanmış açıqlamalar verirlər. Çünki onlar yaxşı bilirlər ki, Kazaryanın fərarilik etməsi Ermənistan ordusunda mövcud olan acınacaqlı vəziyyəti bütün çılpaqlığı ilə ortaya qoyur. Ona görə də bütün vasitələrlə bunu örtməyə çalışırlar. Hər vəchlə həqiqətləri xalqdan gizlətməyə çalışırlar. Məsələnin kökündə dayanan başlıca məqam bununla bağlıdır. Görünən odur ki, Paşinyanın ötən il inqilab zamanı verdiyi vədlərin heç biri reallaşmır. O cümlədən, orduda da vəziyyət müsbətə doğru dəyişməyib, əksinə, mənfiyə doğru gedir. Bununla yanaşı, Azərbaycan Ordusu təmas xəttini irəli çəkir. Bütün bunlar Ermənistan cəmiyyətində narazılıqları artırır. Onu da qeyd edim ki, yaxın günlərdə Kazaryanın başına gələnlərlə bağlı etiraf dolu müsahibələri, videoaçıqlamaları olacaq. Bu da Ermənistan cəmiyyətini xeyli silkələyəcək”.
Vidadi ORDAHALLI
