Rəşad Həsənov: “Bütün bunlar regionda həm stabilliyə, həm də iqtisadi inkişafa müsbət təsir göstərəcək”
Azərbaycan və Gürcüstanın birgə həyata keçirdiyi layihələr həm ölkələrimiz, həm qitə, həm də dünya üçün önəmlidir. Bunu Prezident İlham Əliyev Bakıda Gürcüstan Prezidenti Salome Zurabişvili ilə geniş tərkibdə görüşü zamanı deyib.
Dövlət başçısının sözlərinə görə, tərəflər regional problemləri, ikitərəfli və çoxtərəfli əməkdaşlıq məsələlərini müzakirə ediblər: “Bir daha gördük ki, bütün məsələlərlə bağlı bizim fikirlərimiz üst-üstə düşür".
İlham Əliyev əmin olduğunu bildirib ki, bu səfər Gürcüstan-Azərbaycan əlaqələrinin inkişafı üçün önəmli addım olacaq: "Bizim birgə həyata keçirdiyimiz layihələr həm ölkələrimiz, həm qitə, həm də dünya üçün önəmlidir. Yəni biz çox uğurlu əməkdaşlıq formatı yarada bildik. Əminəm ki, növbəti illərdə bütün sahələr üzrə əməkdaşlıq daha da dərinləşəcək və genişlənəcək. Bunu bizim siyasi iradəmiz diktə edir. Biz dövlətlərarası əlaqələri bu möhkəm təməl üzərində qururuq. Bu gün Gürcüstan və Azərbaycan bütün sahələrdə çox uğurla əməkdaşlıq edir”.
Gürcüstan Prezidenti xanım Salome Zurabişvili isə bildirib ki, indi Gürcüstan və Azərbaycanın qarşısında duran əsas məqsəd daha böyükmiqyaslı layihələri gündəmə gətirməkdir: “Biz ötən əsrin sonu və bu əsrin əvvəlində birlikdə energetika sahəsində həqiqətən çox irimiqyaslı layihələr həyata keçirdik. Biz bütün dünyaya göstərdik ki, bu region mərkəzi regiondur, bu dəhliz sabit dəhlizdir və bu regiona böyük investisiyalar qoymaq olar. İndi qarşımızda duran əsas məqsəd daha böyükmiqyaslı layihələri gündəmə gətirməkdir”.
S.Zurabişvili hər iki ölkənin ərazi bütövlüyü məsələsinə də toxunub: “Münaqişələr və ərazi bütövlüyünün pozulması hər iki ölkənin faciəsidir. Bu gün biz öz suverenliyimizin və ərazi bütövlüyümüzün tanınması və bərpası üçün BMT-dən UNESCO-ya qədər beynəlxalq təşkilatlarda birlikdə mübarizə aparırıq. Bu faciələrə baxmayaraq, biz müasir dövlətlər qurmağa, iqtisadiyyatı inkişaf etdirməyə və böyük layihələri icra etməyə nail olduq”.
Bütün bu deyilənlərin fonunda, iki ölkə daha hansı böyük layihələr həyata keçirə bilər?
Məsələyə münasibət bildirən iqtisadçı-ekspert Rəşad Həsənovun sözlərinə görə, burada söhbət bir sıra layihələrdən gedir: “Hansı ki, həmin layihələr böyük əhəmyyət kəsb edir. Ümumilikdə, Azərbaycanla Gürcüstan arasında iqtisadi əlaqələrin bundan sonra da inkişaf etməsi müsbət məramdır. Tranzit əlaqələrinin genişləndirilməsi ilə yanaşı, nəzərə almaq lazımdır ki, Gürcüstan üçün Azərbaycan mənşəli investisiya mühüm əhəmiyyətə malikdir. Xüsusən də SOCAR-ın Gürcüstanda həyata keçirdiyi yeni layihələr var. Gürcüstana qoyulan xarici sərmayələrdə Azərbaycanın rolu əhəmiyyətli dərəcədə böyükdür. Bu baxımdan, Gürcüstan istənilən variantda Azərbaycanla həm enerji, həm də nəqliyyat sahəsində əlaqələri genişləndirməkdə maraqlıdır. O cümlədən, digər iqtisadi sahələrdə əməkdaşlığın genişlənməsində maraqlıdır. Gürcüstan Azərbaycanla Ermənistan arasında olan mövcud şərtlərdən məharətlə istifadə edir. O mənada ki, prosesdən yararlanır. Çünki Azərbaycanla Ermənistan arasında məlum səbəblərdən heç bir iqtisadi-ticarət əlaqəsi yoxdur. İndiki vəziyyət iqtisadi baxımdan Gürcüstanın mənafeyinə uyğun gəlir. Hesab edirəm ki, “Transxəzər”lə bağlı Azərbaycanla Gürcüstan arasında yeni böyük layihələr gündəmə gələ bilər. Belə ki, Xəzər dənizinin dibi ilə Türkmənistan qazının, Qazaxıstan neftinin Avropaya ötürülməsi reallaşa bilər. Çünki uzun müddətdir sözügedən məsələ müzakirə olunur. Bununla belə, Azərbaycan Abşeron yatağında yeni qaz yatağını istismara vermək istəyir. Belə olan halda, “Cənub Qaz Dəhlizi”nin ixrac infrastrukturunun təkmilləşdirilməsinə ehtiyac yarana bilər. Nəticədə Gürcüstan vasitəsilə Avropaya iri həcmdə qaz ixrac etmək mümkün olacaq. Digər tərəfdən, bu gün İranda nəqliyyat infrastrukturunun təkmilləşməsində Çin fəal iştirak edir. Mümkündür ki, bunun bir qolu olaraq Azərbaycan və Gürcüstan üzərindən Avropa bazarına yeni dəhlizlər açılsın. Belə olarsa, əlbəttə ki, Gürcüstan mövcud şərtlər daxilində bundan yararlanacaq. Bütün bunlar regionda həm stabilliyə, həm də iqtisadi inkişafa müsbət təsir göstərəcək. O baxımdan, iki ölkənin maraqları üst-üstə düşür”.
Vidadi ORDAHALLI
