İlqar Hüseynli: “Azərbaycan bir sıra regional və dünya əhəmiyyətli enerji, nəqliyyat layihələrinin reallaşmasında mühüm rol oynayır” “Ölkə meqalayihələr həyata keçirir”
Prezident İlham Əliyev Davosda Çinin CGTN (China Global Television Network) televiziya kanalına verdiyi müsahibədə ölkəmizin siyasi kursu ilə bağlı bir sıra vacib məqamlara toxunub: “Düşünürəm ki, biz milli maraqlarımızın, milli kimliyimizin, müstəqilliyimizin çox güclü müdafiəsi və eyni zamanda, qeyd etdiyim ölkələrlə yaxşı iş münasibətləri arasında balansı tapa bilmişik. Qonşularımızla münasibətlər prioritetdir, çünki biz regionda yaşayırıq. Lakin, eyni zamanda, bizə daha böyük gündəlik lazımdır. Çünki Azərbaycan coğrafi nöqteyi-nəzərdən böyük ölkə deyil. Lakin regionda edə bildiklərimiz, hansı töhfələri verə biləcəyimiz nöqteyi-nəzərindən biz coğrafiyamızdan daha böyüyük”.
Dövlət başçısının fikrincə, Azərbaycanda nəqliyyat qovşağının yaradılması bizə Şərqdən Qərbə və Şimaldan Cənuba vacib tranzit ölkə olmaq imkanını verəcək: “Bu investisiyalar gələcək üçün yatırılıb”.
Həqiqətən də Azərbaycan coğrafi baxımdan kiçik ölkə olsa da, gördüyü işlər böyük və çoxşaxəlidir. Bunu şərtləndirən müəyyən faktorlar var. Azərbaycan bir sıra regional layihələrin fəal iştirakçısıdır. Eyni zamanda, bu layihələrin həyata keçirilməsində donor rolunu oynayır. Bundan başqa, bəzi beynəlxalq tədbirlərə evsahibliyi edib.
Maraqlıdır, bəs ekspertlər bunu necə şərh edirlər? Sözügedən yanaşma nə deməkdir?
Məsələyə münasibət bildirən ekspert İlqar Hüseynlinin fikrincə, Azərbaycanın enerji və nəqliyyat sektorunda həyata keçirdiyi layihələrin miqyası kifayət qədər böyükdür: “Ona görə də bu barədə səslənən fikirlər reallığı əks etdirir. Məsələ ondadır ki, 1994-cü ildə “Əsrin kontraktı” imzalanandan sonra bir sıra işlər görüldü. Bakı-Tiflis-Ceyhan neft, Bakı-Tiflis-Ərzurum qaz kəmərləri işə düşdü. Ötən il TANAP kəməri fəaliyyətə başladı. Onun davamı olan TAP kəməri üzrə işlərin böyük bir qismi başa çatıb. Bu il Azərbaycan qazının Avropa bazarına çıxarılacağı gözlənir. Hesab edirəm ki, həyata keçirilən layihələr yetərincə böyük əhəmiyyət kəsb edir. Eyni zamanda, sözügedən layihələr Avropanın enerji təchizatında mühüm rol oynayacaq. Bundan başqa, Azərbaycan bir sıra regional və dünya əhəmiyyətli nəqliyyat layihələrinin reallaşmasında mühüm rol oynayır. Məsələn, Bakı-Tiflis-Qars dəmir yolunun ərsəyə gəlməsində Azərbaycanın rolu böyükdür. Nəzərə almaq lazımdır ki, Azərbaycan dəmir yolunun çəkilməsi üçün Gürcüstana aşağı faizlə 200 milyon dollar kredit verdi. Məhz bundan sonra BTQ-nin reallaşması sürətləndi. Bundan başqa, Azərbaycan “Şimal-Cənub” nəqliyyat dəhlizinin tikintisində fəal rol oynayır. Bununla əlaqədar İrana 500 milyon dollar kredit verilib. Azərbaycan Böyük İpək Yolu üzərində yerləşdiyi üçün tranzit ölkə olaraq rolu artır. Tikilən Ələt Ticarət Limanı 15 milyon tondan 25 milyon tona qədər yük daşımaq gücünə malik olacaq. Necə deyərlər, bu bizə imkan verəcək ki, Orta Asiya və Çindən gələn yüklərin Avropaya çatdırılmasında iştirak edək. Bütün bunlardan çıxış edərək hesab edirəm ki, Azərbaycan meqalayihələr həyata keçirir”.
Vidadi ORDAHALLI
