Musa Quliyev: “Görüş zamanı müzakirə edilən təkliflər, layihələr həm Dünya Bankı, həm də ölkəmiz üçün böyük səmərə verəcək”
Məlum olduğu kimi, İsveçrənin Davos şəhərində Ümumdünya İqtisadi Forumu keçirilir. 110 ölkədən 3000-dən artıq iştirakçının qatıldığı bildirilən foruma Azərbaycan Respublikasının Prezidenti İlham Əliyev də dəvət edilib. O, Davos İqtisadi Forumu çərçivəsində bir sıra rəsmi və qeyri-rəsmi görüşlər keçirib. Dövlət başçısı Davosda görüşlərdən birini Dünya Bankının baş icraçı direktoru xanım Kristalina Georgiyeva ilə keçirib.
Bir sıra məsələlərin müzakirə edildiyi görüşdə K.Georgiyeva Prezident İlham Əliyevi ölkədə aparılan uğurlu islahatlar və Azərbaycanın Dünya Bankının “Doing Business-2019” hesabatında 25-ci yerə yüksəlməsi münasibətilə təbrik edib. O, bildirib ki, bu, Dünya Bankının “Doing Business” reytinqinin tarixində ən uğurlu və böyük nailiyyətlərdən biridir. Bu uğurlu islahatların bundan sonra da davam etdirilməsi çox vacibdir. Xanım K.Georgiyeva qeyd edib ki, Prezident İlham Əliyevin həyata keçirdiyi struktur islahatlarının və iqtisadi islahatların əhəmiyyəti son illər dünyada iqtisadi artım sürətinin azalması fonunda daha da artmaqdadır. O, həmçinin, bildirib ki, Dünya Bankı Azərbaycanda reallaşdırılan iqtisadi siyasəti və islahatları dəstəkləyir. Bu islahatlar Azərbaycanda iqtisadiyyatın davamlı inkişafına, yeni iş yerlərinin yaranmasına mühüm dəstək verəcək.
Xanım Georgiyeva onu da vurğulayıb ki, bu, Azərbaycanın gələcək iqtisadi inkişafına Dünya Bankı tərəfindən əlavə dəstək göstərilməsinə kömək edə bilər.
Beynəlxalq İnkişaf Assosiasiyası tərəfindən yoxsul ölkələrə dəstək proqramına Azərbaycanın donor ölkə kimi qoşulmasını təklif edən Dünya Bankının baş icraçı direktoru qeyd edib ki, ölkəmizin iqtisadi transformasiyası dünyada Çin, Hindistan kimi ölkələrlə yanaşı, ən uğurlu təcrübələrdən biridir. Qeyd edib ki, Azərbaycan vaxtilə Dünya Bankından yardım alan ölkədən qısa müddətdə donor ölkəyə çevrilib. Bu da son iyirmi ildə Azərbaycanda bütün sahələrdə həyata keçirilən islahatlar nəticəsində mümkün olub.
Prezident İlham Əliyev isə Dünya Bankı ilə əməkdaşlıqdan razı qaldığını və bankın daim Azərbaycana lazımi dəstək göstərdiyini qeyd edib. Dövlət başçısı bundan sonra da Azərbaycanla Dünya Bankı arasında əməkdaşlığın davam etdiriləcəyini deyib və ölkəmizin əldə etdiyi uğurların “Doing Business-2019” hesabatında əks olunmasından məmnunluğunu bildirib. Prezident İlham Əliyev bu göstəricilərin daha da yaxşılaşdırılması ilə bağlı xüsusi komissiyanın yaradıldığını qeyd edib. Bildirib ki, “Doing Business-2019” hesabatında Azərbaycanın 32 pillə irəliləyərək 25-ci yerdə qərarlaşması həyata keçirilən çox vacib islahatlar nəticəsində mümkün olub. O bunu böyük uğur kimi dəyərləndirib.
Görüşdə Dünya Bankı tərəfindən Azərbaycanda yeni proqramların həyata keçirilməsi məsələsi müzakirə olunub.
Prezident İlham Əliyev xüsusilə məhkəmə sahəsində Dünya Bankı ilə birgə həyata keçirilən islahatları yüksək dəyərləndirib, məhkəmə sistemində innovativ yeniliklərin tətbiqində və bu sistemin avtomatlaşdırılmasında bankın iştirakını və Ədliyyə Nazirliyi tərəfindən bu layihənin reallaşdırılmasındakı uğurları qeyd edib. O bu uğurlu əməkdaşlığın digər sahələrdə də həyata keçirilməsinin vacibliyini vurğulayıb. Prezident qeyd edib ki, vergi, gömrük, icbari tibbi sığorta sahələrində Dünya Bankı ilə əməkdaşlıq layihələri hazırlanıb. Bu layihələrin uğurla həyata keçirilməsi üçün imkanlar var və hər iki tərəf bu imkanlardan yararlanmalıdır.
Görüşdə qeyd olunub ki, Dünya Bankının bu sahədəki fəaliyyəti Azərbaycandakı özünüməşğulluq layihələrinin genişlənməsində, xüsusilə məcburi köçkünlərin özünüməşğulluğunun artırılmasına dair proqramlarda faydalı ola bilər. Buna görə də hər iki tərəfin aidiyyəti qurumları bu sahədə yeni proqramlar hazırlayıb uğurla həyata keçirə bilər.
Prezident İlham Əliyevlə Dünya Bankının baş icraçı direktoru xanım K.Georgiyeva arasında keçirilən görüşün ölkəmizlə Dünya Bankı arasında yeni əməkdaşlıq üçün yollar açdığını qeyd edən millət vəkili Musa Quliyev “Bakı-Xəbər”ə bildirdi ki, bunun əhəmiyyəti olduqca böyükdür. “Ümumiyyətlə, Davos İqtisadi Forumunda Azərbaycan Prezidenti İlham Əliyevin iştirakı artıq bir xoş ənənəyə çevrilib. Davosda cənab Prezident müxtəlif görüşlər keçirib. Onlardan biri də Dünya Bankının baş icraçı direktoru ilə keçirilən görüşdür. Bu görüşdə Azərbaycanın ən böyük uğurlarından biri - Dünya Bankının “Doing Business-2019” indeksinə görə 1 il ərzində 32 pillə irəliləməsi vurğulanıb. Xanım K.Georgiyeva bu münasibətlə cənab Prezidenti təbrik edib və Azərbaycanı başqa ölkələrə nümunə göstərib. Bu görüşdə diqqətçəkən məqamlardan biri odur ki, əgər 20 il əvvəl Azərbaycan Dünya Bankından yoxsul ölkə kimi yardım alırdısa, bu gün isə artıq Dünya Bankı Azərbaycana müraciət edir ki, yoxsul ölkələrə donor olsun. Gerçəklik budur ki, Azərbaycan iqtisadi cəhətdən güclüdür və artıq o, donor ölkə olaraq qəbul edilir. Bu, Azərbaycanın dünya səviyyəsində çox böyük uğurudur. Azərbaycanda bir sıra sosial layihələrin, o cümlədən də icbari tibbi sığortanın tətbiqinin genişləndirilməsi, eləcə də özünüməşğulluq proqramları ilə bağlı Dünya Bankının Azərbaycana verəcəyi dəstək çox əhəmiyyətlidir. Eyni zamanda, Azərbaycanın ədliyyə sistemində idarəetmənin yenidən qurulmasına, xüsusən də avtomatlaşdırılmasına Dünya Bankının göstərdiyi dəstək müsbət reaksiya doğurur. Dünya Bankının arzusudur ki, gələcəkdə müxtəlif layihələrin həyata keçirilməsi ilə bağlı Azərbaycanla əlaqələrini daha da genişləndirsin. Bu həm ölkəmizin beynəlxalq aləmdəki nüfuzunu, digər tərəfdən də Azərbaycanın Dünya Bankı və dünyanın inkişaf etmiş dövlətləri üçün gərəkli bir donor kimi çıxış etməsini göstərir. Bütövlükdə, bu görüşlərin əhəmiyyəti böyükdür və görüş zamanı müzakirə edilən təkliflər, layihələr həm Dünya Bankı, həm də ölkəmiz üçün böyük səmərə verəcək”.
M.Quliyev hesab edir ki, Dünya Bankı ilə yeni əməkdaşlıq layihələrinin həyata keçirilməsi Azərbaycanda sosial-humanitar sahənin inkişafına da müsbət təsirini göstərəcək. Vergi, gömrük, icbari tibbi sığorta sahələrində Dünya Bankı ilə yeni əməkdaşlıq layihələrinin hazırlanmasının da Azərbaycan üçün faydalı olacağını qeyd edən M.Quliyevin fikrincə, bu layihələr sözügedən sahələrin inkişafına müsbət təsir göstərəcək.
İradə SARIYEVA
