Aydın Hüseynov: “Bütün bunların da müsbət nəticələrini ölkəmizin iqtisadiyyatında müşahidə olunan nailiyyətlərdə görürük”
Azərbaycan Prezidenti İlham Əliyev Davosda Dünya İqtisadi Forumunun prezidenti Borge Brende ilə görüşü zamanı bildirib ki, Azərbaycan öz inkişaf strategiyasını yenilənən beynəlxalq və regional təmayüllər nəzərə alınmaqla qurur.
Görüşdə Azərbaycan Hökuməti və Dünya İqtisadi Forumunun Dördüncü Sənaye İnqilabı Mərkəzi arasında ilk dəfə olaraq əməkdaşlığın təməli qoyulub. Bu məqsədlə Azərbaycan Prezidenti İlham Əliyev və Dünya İqtisadi Forumunun prezidenti Borge Brende arasında əməkdaşlıq sazişinin təntənəli mübadiləsi həyata keçirilib.
Prezident İlham Əliyev Azərbaycan Hökuməti və Dünya İqtisadi Forumunun Dördüncü Sənaye İnqilabı Mərkəzi arasında əməkdaşlıq sazişinin vacibliyini qeyd edərək deyib ki, bu sənəd bizim tərəfdaşlıq ruhumuzu və qarşılıqlı səylərimizi davam etdirməkdə istəkli olduğumuzu nümayiş etdirir. Prezident İlham Əliyev növbəti dəfə Dünya İqtisadi Forumunda iştirakından və Forumla Azərbaycan arasında əməkdaşlıq əlaqələrinin yüksək səviyyədə olmasından məmnunluğunu ifadə edib. Forumun dünyada gedən transformasiya prosesinin yeni təmayüllərinin və çağırışların müzakirəsi baxımından əhəmiyyətini vurğulayan Prezident Azərbaycanın öz inkişaf strategiyasını yenilənən beynəlxalq və regional təmayüllər nəzərə alınmaqla qurduğunu bildirib.
Prezident İlham Əliyev ölkəmizdə aparılan islahatlar, inkişaf prosesləri barədə məlumat verib, böyük nəqliyyat və infrastruktur layihələrinin, o cümlədən “Şərq-Qərb”, “Şimal-Cənub” nəqliyyat dəhlizləri ilə bağlı layihələrin, enerji layihələrinin reallaşdırılmasının həm ölkəmiz, həm də region üçün əhəmiyyətini qeyd edib.
Göründüyü kimi, ölkə başçısı bildirib ki, Azərbaycan öz inkişaf strategiyasını yenilənən beynəlxalq və regional təmayüllər nəzərə alınmaqla qurur. Ölkə başçısının bu yanaşmasını necə izah etmək olar?
Millət vəkili Aydın Hüseynov qəzetimizə açıqlamasında bildirdi ki, Azərbaycan artıq dünya iqtisadiyyatında mühüm çəkiyə malik olan dövlətə çevrilib: “Artıq Azərbaycan iqtisadiyyatı özünün keyfiyyət və mahiyyətcə yeni mərhələsinə qədəm qoyur. Bu isə ölkənin ixrac potensialının artırılmasını, valyuta gətirən bütün mənbələrdən çox səmərəli istifadəsini şərtləndirir. Valyuta ehtiyatlarımızın artırılması üçün təkcə xammal deyil, həm də ixrac məhsullarından da istifadə etməyimiz kimi reallıq ortaya çıxır. Artıq Azərbaycan Avropanın enerji təminatında da mühüm rol oynayır. Digər tərəfdən, Azərbaycan mühüm nəqliyyat qovşaqlarının kəsişməsində yerləşir. Bu da Azərbaycanın mühüm logistik mərkəzə çevrilməsini şərtləndirir. Biz dünyanın azsaylı ölkələrindənik ki, orbitdə 3 kosmik peykimiz var. Bütün bunlar onu deməyə əsas verir ki, Azərbaycan dünya iqtisadiyyatının bütün çağırışlarına tam uyğun şəkildə cavab verir. TANAP və TAP layihələri, Bakı-Tiflis-Qars dəmir yolu, Bakı-Tiflis-Ceyhan nef kəməri kimi qlobal layihələrin reallaşmasını da həmin təşəbbüslər sırasından saymaq olar. Ələt qəsəbəsində yaranacaq azad iqtisadi zona da yenilənən təmayüllərin nəzərə alınmasında mühüm əhəmiyyətə malik olacaq. Biz artıq dünya iqtisadiyyatında söz sahibi olan ölkəyə çevrilmişik. Buna görə də qlobal iqtisadiyyatda baş verən hadisələr, onun təsirləri düzgün şəkildə təhlil edilir və doğru qərarlar çıxarılır. Bura regionda baş verən iqtisadi prosesləri də aid edə bilərik. Bütün bunların da müsbət nəticələrini ölkəmizin iqtisadiyyatında müşahidə olunan nailiyyətlərdə görürük”.
Məhəmmədəli QƏRİBLİ
