Fikrət Yusifov: “Bu da, öz növbəsində, ölkəyə yeni kapital axınlarını stimullaşdıracaq”
Məlum olduğu kimi, Prezident İlham Əliyev Dünya İqtisadi Forumunun illik toplantısında iştirak etmək üçün İsveçrə Konfederasiyasında işgüzar səfərdədir. Bu arada, dövlət başçısı Davosda Dünya İqtisadi Forumunun prezidenti Borge Brende ilə görüşüb. Görüşdə Azərbaycan Hökuməti və Dünya İqtisadi Forumunun Dördüncü Sənaye İnqilabı Mərkəzi arasında ilk dəfə olaraq əməkdaşlığın təməli qoyulub. Bu məqsədlə Prezident İlham Əliyev və Dünya İqtisadi Forumunun prezidenti Borge Brende arasında əməkdaşlıq sazişinin təntənəli mübadiləsi həyata keçirilib.
Söhbət zamanı Dünya İqtisadi Forumunun prezidenti Borge Brende Prezident İlham Əliyevi yenidən Davosda görməkdən məmnunluğunu bildirib və dövlət başçısının rəhbərliyi ilə Azərbaycanın dördüncü sənaye inqilabına doğru qətiyyətli addımlar atdığını qeyd edib. Borge Brende son iyirmi ildə Bakının sürətlə tanınmaz dərəcədə dəyişdiyini vurğulayıb.
Prezident İlham Əliyev Azərbaycan Hökuməti və Dünya İqtisadi Forumunun Dördüncü Sənaye İnqilabı Mərkəzi arasında əməkdaşlıq sazişinin vacibliyini qeyd edərək bildirib ki, bu sənəd bizim tərəfdaşlıq ruhumuzu və qarşılıqlı səylərimizi davam etdirməkdə istəkli olduğumuzu nümayiş etdirir. Ölkə başçısı qeyd edib ki, Azərbaycan dördüncü sənaye inqilabının hədəflərinin həyata keçirilməsində çox fəal iştirak edəcək. Keçən il Azərbaycanda qeyri-neft sektorunda sənaye istehsalının 9,1 faiz artdığını vurğulayan Prezident İlham Əliyev əminliklə bildirib ki, biz bu vacib layihədə yaxşı tərəfdaşlar olacağıq.
Bütün bu deyilənlərin fonunda sözügedən sazişin Azərbaycan üçün mümkün nəticələrini ekspertlər necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifov buna bir neçə aspektdən yanaşdı: “Məsələ ondadır ki, artıq Azərbaycan öz sənayesini yeni innovasiyalara söykənərək, dördüncü sənaye inqilabının şərtləri, tələbləri çərçivəsində yenidən qurmaq hüququndadır. Bu ərəfədə, təbii ki, belə bir sazişin imzalanması bir daha bizim bu bu istiqamətdə məramımızın nə qədər gerçək və ciddi olduğunu göstərir. Hesab edirəm ki, tərəflər arasında imzalanan saziş həm də xarici investorların Azərbaycan iqtisadiyyatına sərmayə qoymasını təşviq edəcək. Xarici investorlar görəcəklər ki, Azərbaycan öz iqtisadiyyatını mütərəqqi yolla inkişaf etdirməkdə maraqlıdır. Yəni görəcəklər ki, Azərbaycan sözügedən məsələyə son dərəcə ciddi yanaşır və bunda qərarlıdır. Bu da, öz növbəsində, ölkəyə yeni kapital axınlarını stimullaşdıracaq. Təbii ki, belə bir müstəvidə Azərbaycan iqtisadiyyatının bundan sonra inkişafı bizə biznes sektorundan gözlədiyimiz nəticələri əldə etməyə imkan verəcək. Belə ki, bütün bunların sayəsində ölkədə innovativ əsaslara söykənən daha modern iqtisadiyyat qurulacaq. Ona görə də hesab edirəm ki, imzalanan saziş ölkənin inkişafı üçün bir sıra perspektivlər vəd edir. Bu imkan verəcək ki, Azərbaycan müasir dövrün tələblərinə uyğun iqtisadiyyat qursun. Bu baxımdan imzalanan sazişin perspektivinə nikbin yanaşıram”.
Vidadi ORDAHALLI
