Məlum olduğu kimi, Prezident İlham Əliyev Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında ölkəmizin sosial-iqtisadi, siyasi inkişafı ilə bağlı bir sıra məsələlərə toxunub.
Prezident İlham Əliyev çıxışında “…Əlbəttə, bütün bu işləri görmək üçün iqtisadi güc olmalıdır və biz bunu yaradırıq. Bu gün Azərbaycan iqtisadi inkişaf baxımından heç kimdən, heç bir beynəlxalq maliyyə qurumundan, heç bir ölkədən asılı deyil. İqtisadi müstəqillik bizə imkan verir ki, müstəqil siyasət aparaq, Azərbaycan xalqının maraqlarını müdafiə edək” - deyə bildirib.
Azərbaycanın iqtisadi müstəqilliyi dövlətin siyasi müstəqilliyində hansı rolu oynayır?
Millət vəkili Aydın Hüseynov “Bakı-Xəbər”ə bildirdi ki, Azərbaycan iqtisadi cəhətdən müstəqil dövlətdir və bu da dövlətin siyasi müstəqilliyində əsaslı yer tutur. “Hələ ulu öndərimiz Heydər Əliyev deyirdi ki, iqtisadiyyatı güclü olan dövlət hər şeyə qadirdir. Həmin bu dövlət idarəetmənin qeyd olunan tezisini cənab Prezident İlham Əliyev çox məharətlə Azərbaycanın müstəqil iqtisadi siyasət yürütməsinə yönəltdi. Əgər hər hansı bir ölkə maliyyə baxımından hansısa bir mərkəzdən, maliyyə institutlarından asılı olarsa, sözsüz ki, o tam müstəqil siyasət yürüdə bilməz. Çünki ölkənin müstəqil siyasət yeritməsi üçün onun iqtisadi siyasəti olmalıdır. Məhz ölkəmizin müstəqil iqtisadi siyasət yürütməsinin bir neçə bariz nümunəsini göstərə bilərik” - deyə bildirən A.Hüseynov qeyd etdi ki, bunlardan birincisi ölkənin ümumdaxili məhsulu ilə nisbətində xarici borcunun 19 faiz təşkil etməsidir. Ekspertin fikrincə, bu çox aşağı səviyyədə olan borcdur ki, onu Azərbaycan dövləti istənilən vaxt 45 milyard dollar həcmində valyuta ehtiyatları ilə ödəyə bilər. “Yəni bizim hazırda valyuta ehtiyatlarımız 45 milyard dollardır, borclarını dərhal ödəmək üçün Azərbaycanın iqtisadi potensialı var. Digər tərəfdən, ordumuzun gücünün, nüfuzunun artması, dünyanın ən güclü orduları sırasında olması məhz Azərbaycan dövlətinin müstəqil siyasətinin, iqtisadi resurslarının və maliyyə mənbələrinin olmasının nəticəsidir. Yəni silah alarkən bu istiqamətə vəsaitimizi xərcləyə bilirik. Ona görə ki, ölkəmizin müdafiəsi, torpaqlarımızın qorunması çox mühümdür. Başqa bir tərəfdən, Azərbaycan böyük qlobal layihələrə imza atdı. Bakı-Tiflis-Qars, TANAP, TAP layihələri və layihələrin demək olar ki, tam əksəriyyəti Azərbaycan dövlətinin vəsaitləri hesabına reallaşdı. Biz maliyyə mənbələrimizlə əlaqədar hər hansı bir xarici dövlətdən asılı olsaydıq, işləri bu sürətlə görə bilməzdik. Müstəqil iqtisadi siyasət, bütövlükdə, bizim dövlətin siyasi nüfuzunu, onun hərbi qüdrətini və regionda böyük iqtisadi güc mərkəzinə çevrilməsini şərtləndirən ən böyük faktdır” -deyə A.Hüseynov bildirdi.
İradə SARIYEVA
