Yeganə Hacıyeva: “Artıq bilirlər ki, Paşinyan hökuməti idarə etmək gücündə olan adam deyil”
Məlum olduğu kimi, Ermənistan parlamentinin yeni baş nazirin seçilməsi ilə bağlı xüsusi iclası nəticəsiz qalıb. Baş nazir vəzifəsinə yeganə namizəd, "Yelk" (Çıxış) fraksiyasının lideri Nikol Paşinyanın lehinə 45, əleyhinə 56 deputat səs verib. Bununla Ermənistan parlamenti N.Paşinyanın baş nazir vəzifəsinə namizədliyini qəbul etməyib.
Qanuna əsasən, 7 gün ərzində parlament yeni baş naziri seçmək üçün ikinci cəhd göstərməlidir. Bu cəhd də alınmasa, prezident parlamenti buraxmalı və növbədənkənar seçki təyin etməlidir. Növbəti seçki ayın 8-də baş tutacaq.
Hakim Respublika Partiyasının maraqlarına cavan verən bu gedişat Ermənistanda etiraz aksiyalarının növbəti dalğasının baş verməsinə səbəb olub. Paşinyan tərəfdarları bu dəfə İrəvanda nəqliyyatı tamamilə iflic etməyi qərarı alıblar. Nəticədə metro, hava limanı, avtomobil və dəmir yolları bağlanıb, məktəblər fəaliyyətini müvəqqəti dayandırıb, fəhlələr isə tətilə çıxıblar. Paşinyanın baş nazir seçilməsi üçün Respublika Partiyasından ən azı 8 səs lazım idi. Bu isə avtomatik iki nəticəyə gətirib çıxaracaqdı. Birincisi, 8 "xəyanətkar səs" faktiki hakim Respublika Partiyasının parçalanmasına yol açacaqdı. İkincisi, Respublika Partiyası rəsmən müxalifətə keçməli olacaqdı, bu isə korrupsiyalaşan hakim partiyanın gələcəkdə siyasi arenadan tədricən silinməsinə gətirib çıxaracaqdı. Onlarsa buna hazır deyillər. Ona görə də hakim partiya müqavimət göstərmədən təslim olmaq istəmir.
Ermənistanda hakim Respublika Partiyasının parlament fraksiyasının rəhbəri Vahram Bağdasaryan deyib ki, onun partiyası parlamentdə mayın 8-də keçiriləcək təkrar səsvermədə baş nazirliyə öz namizədini irəli sürməyəcək və kimliyindən asılı olmayaraq, millət vəkillərinin üçdə birinin dəstəyini qazanmış namizədə səs verəcək. Bağdasaryan deyib ki, Respublika Partiyası bu qərarı ölkədə Nikol Paşinyanın çağırdığı tətillə əlaqədar yaranmış böhranın aradan qaldırılması naminə qəbul edib. Hakim partiyanın parlamentdəki fraksiyası bu qərarı mayın 2-də qəbul edib. Bundan bir gün əvvəl fraksiya Paşinyanın əleyhinə səs verərək onun baş nazir seçilməsini bloklamışdı. Bağdasaryanın bəyanatından bir neçə dəqiqə əvvəl parlamentdəki müxalifət bütün fraksiyaların Paşinyanı dəstəklədiyini və ona mayın 8-də minimum 35 səs veriləcəyini elan etmişdi. Paşinyan və müxalif Tsarukyan alyansının mayın 2-də İrəvanda birgə keçirdiyi mətbuat konfransında alyansın lideri Qagik Tsarukyan baş nazirliyə Paşinyanın namizədliyini dəstəkləyəcəyini bildirib. Paşinyanın “Yelk” fraksiyasının parlamentdə 9, Tsarukyanın isə 31 mandatı var. Ehtimal olunur ki, may ayının 8-də, yəni ikinci cəhddən sonra Paşinyan lazım olan səsləri əldə edə biləcək. Təbii ki, bu da hakim partiyadan ona veriləcək səslərin hesabına mümkündür. Mayın 8-nə kimi Ermənistandakı hakim partiyada parçalanma yarana bilərmi və bu hansı plan əsasında baş tuta bilər?
Politoloq Yeganə Hacıyeva qəzetimizə açıqlamasında bildirdi ki, Ermənistanda yaşanan böhran bütün dünyanın diqqət mərkəzindədir: “Mövzu bizim üçün böyük əhəmiyyət kəsb etdiyindən, biz onu daha dərindən izləyirik. Eyni zamanda, dünyanın böyük gücləri də bu prosesi ciddi şəkildə təhlil edir və hadisələrin gedişini öz maraqlarına uyğunlaşdırmağa çalışırlar. Ermənistanda proseslərə təsir etmək gücünə malik olan bir nömrəli ölkə Rusiyadır. Hazırda orada cərəyan edən proseslərdən də görünür ki, hadisələr Moskvanın diqtəsi ilə baş verir. Moskvanın bu səyləri başadüşüləndir. Çünki onun üçün böyük maraq kəsb edən strateji bir nöqtədə yerləşən Ermənistanı əldən vermək istəmir. Bu məsələdə Qərblə ABŞ-ın maraqları uzlaşır, ona görə də eyni mövqedən çıxış edirlər. Ermənistanda baş verən real hadisələr və bir də onları beynəlxalq təşkilatlara fərqli formatda təqdim edən məlumatlar mövcuddur. Seçkinin birinci turunda nəticənin əldə olunmamsı hakim partiyanın dirənişinə görə oldu. Demək olar ki, hakim partiya Ermənistandakı bütün sahələrə nəzarəti əlində saxlayır. Yalnız küçələrdəki etirazçılara təsir etmək imkanı yoxdur. Serj Sarkisyan klanı hazırda Rusiya ilə gözləmə mövqeyindədir. Ona görə də hadisələrin yubadılması bu tandemin xeyrinədir. Qaynayan qazanda qapağı açmağa bənzəyir. Sular durulandan sonra isə ortaya başqa mənzərə çıxacaq. Paşinyanın hansı tərəfə daha yaxın olması onda məlum olacaq. Hazırda hakim partiyanın namizəd irəli sürməyəcəyi məqamı yaranıb. Buna rəsmən söz verilib. Burdan o nəticəni çıxarmaq olar ki, hakim partiya ilə Paşınyan arasında hansısa razılaşma var. Sual yarana bilər ki, Paşinyana belə razılaşmaya getmək niyə lazımdır? Artıq bir aydır baş verən proseslərdə kütləni saxlamaq çətinləşir. Onlar lider kimi irəli çıxardıqları adamdan konkret nəticə tələb edirlər. Ola bilsin ki, ikinci mərhələdə Paşinyanın seçilmə ehtimalı olsun. Bəlkə də hakim partiya özü bunu təşkil edib, kimlərinsə öz sıralarından Paşinyana səs verməsini təmin edəcək. Artıq bilirlər ki, Paşinyan hökuməti idarə etmək gücündə olan adam deyil. Belə təsadüfi adamlar yalnız kütlə qarşısında populyar olurlar. Mən də onun çıxışlarını yaxından izləmişəm. Bu qənaətdəyəm ki, heç bir dövlətçilik təcrübəsi olmayan, harizması zəif bir lider kimi onun ölkəni idarə etməsi çətin olacaq. Tez bir zamanda nüfuzdan düşəcək və hakimiyyəti yenidən Rusiyaya yaxın olan klan əlinə keçirəcək”.
Məhəmmədəli QƏRİBLİ
