Elşən Mustafayev: “Deyilən format baş tutsa, yaxşı perspektivi ola bilər”
Xarici işlər naziri Elmar Məmmədyarov Azərbaycanda rəsmi səfərdə olan Rusiya Federasiyasının xarici işlər naziri Sergey Lavrovla görüşdükdən sonra tərəflər mətbuat konfransı keçirib. Mətbuat konfransında bir çox suallara əhatəli cavablar verilib.
Azərbaycanın xarici işlər naziri E.Məmmədyarov rusiyalı həmkarı Sergey Lavrovla birgə mətbuat konfransında Azərbaycan-Rusiya-Qazaxıstan formatının üçtərəfli əməkdaşlıq üçün optimal variant olmasından da danışıb: “Mənim qazaxıstanlı həmkarım bu cür formatın yaradılmasında marağını ifadə edib. Fikrimcə, bu format regional proseslərin inkişafı üçün optimal variantdır”.
S.Lavrov, öz növbəsində, qeyd edib ki, bu cür formatın yaradılması qarşılıqlı maraqlara əsaslanmalıdır: “Məsələn, Rusiya-Azərbaycan-İran formatı “Şimal-Cənub” nəqliyyat dəhlizinin inkişaf etdirilməsində birgə marağın olması nəticəsində yaranıb”.
“Rusiya yüklərini Bakı-Tiflis-Qars (BTQ) dəmir yolu ilə ilə nəql edə bilər”- deyə Azərbaycanın xarici işlər naziri E.Məmmədyarov rusiyalı həmkarı Sergey Lavrovla birgə mətbuat konfransında bildirib.
“Diplomatiya Ermənistan-Azərbaycan Dağlıq Qarabağ münaqişəsinin həlli prosesini ölü nöqtədən tərpətmək iqtidarındadır”- deyən Rusiyanın xarici işlər naziri S.Lavrov daha sonra bildirib: “Biz Ermənistan-Azərbaycan Dağlıq Qarabağ münaqişəsinin nizamlanması məsələsinə toxunduq. Müqayişə heç kimə sərf etmir. Həll yolunu tapmaq lazımdır. Biz ATƏT-in Minsk Qrupunun həmsədri kimi qarşlıqlı qəbul edilən sülh yollarını axtarmaqda davam edəcəyik”.
E.Məmmədyarovun təklif etdiyi üçtərəfli formatın perspektivini necə dəyərləndirmək olar?
Milli İstiqlal Partiyasının funksioneri Elşən Mustafayev qəzetimizə bildirdi ki, əvvəla bu formatın nəyi və hansı sahələri əhatə edəcəyini bilməliyik: “Biz hər iki ölkə ilə qonşuyuq. Rusiya ilə quru sərhədimiz var, ancaq Qazaxıstanla Xəzər dənizi vasitəsilə sərhədik. Biz bir ölkə kimi yaxın qonşularımızla normal münasibətlərin qurulmasında maraqlı olmalıyıq. Bu əlaqələr tərəflərin maraqları çərçivəsində hamıya xeyir gətirəcək səviyyədə olmalıdır. Azərbaycan Rusiya ilə Qazaxıstanın təmsil olunduğu Avrasiya İttifaqının üzvü deyil. Həmin çərçivədə olan əməkdaşlıqdan kənarıq. Amma bizim payımıza regionun və dünyanın nəhəng ölkələri sayılan bu iki ölkə ilə qonşuluq düşübsə, niyə də başqa formatda onlarla əməkdaşlığı genişləndirməyək? Bu elə bir layihə olmalıdır ki, tərəflərin digər sahələrdəki maraqlarına toxunmasın. Rusiya xarici işlər nazirinin həmin təklifə bir qədər tərəddüdlü yanaşmasını gördüm. Bu heç də o anlama gəlmir ki, Lavrov bunu istəmir. Rusiya bütün yaxın qonşularını əməkdaşlıq və digər vasitələrlə əldə saxlamaq istəyir. Mən güman edirəm ki, Rusiya bu üç ölkə arasındakı əməkdaşlığın genişlənməsini müəllifi olduğu Avrasiya İttifaqı çərçivəsində davam etdirmək istəyir. Ancaq Azərbaycan bərabər və paritet əsaslarla belə əməkdaşlığın qurulmasında maraqlıdır. Artıq ölkəmizin bu sahədə ciddi təcrübəsi var. Bilirsiniz ki, bizim təşəbbüsümüzlə bir çox iki və üçtərəfli əməkdaşlıq formatları uğurla həyata keçirilir. Deyilən format baş tutsa, yaxşı perspektivi ola bilər”.
Məhəmmədəli QƏRİBLİ
