Mübariz Əhmədoğlu: “Avropa dövlətləri Azərbaycanda mövcud olan etnik müxtəlifliyin mədəniyyətlərarası dialoqa töhfə verdiyini bir daha gördülər”
“Azərbaycanda bu gün mədəniyyətlərarası dialoq və etnik müxtəliflik cəmiyyətin sabit və dayanıqlı inkişafını təmin edən mühüm şərtlərdən biri kimi qiymətləndirilir”. Bunu Prezidentin ictimai-siyasi məsələlər üzrə köməkçisi-şöbə müdiri Əli Həsənov Belçikanın paytaxtı Brüsseldə Azərbaycanın Diasporla İş üzrə Dövlət Komitəsinin və Avropa Azərbaycanlıları Konqresinin təşkilati dəstəyi ilə “Separatizmin beynəlxalq sülhə və təhlükəsizliyə yaratdığı təhdidlər” mövzusunda keçirilən beynəlxalq forumda deyib.
Prezidentin köməkçisi bildirib ki, millətçilik və etnomədəni terrorizmlə bağlı məsələlər dini inancların, milli mədəniyyətlərin yanaşı yaşaması və etnik müxtəlifliyin təmin olunmasının perspektivləri haqqında daha ətraflı fikirləşməyi tələb edir: “Təəssüf ki, bu məsələyə münasibətdə bəzən xoşagəlməz yanaşmalar da özünü göstərir. Hesab olunur ki, guya mədəniyyətlərarası dialoq və yaxud etnik müxtəliflik milli kimliyə xələl gətirən dağıdıcı proseslərə səbəb ola bilər, etnik qruplar və miqrantlar isə məskunlaşdıqları ölkələrdə ictimai-siyasi və kulturoloji xarakterli problemlər yaradar. Təbii ki, bu cür mövqe ilə razılaşmaq mümkün deyil. Çünki bəşəriyyətin mütərəqqi inkişafını sivilizasiyalararası dialoqsuz və etnik müxtəliflik olmadan təsəvvür etmək çox çətindir. Ona görə də həm sivil dünyada, həm də onun bir parçası olan Azərbaycanda bu gün mədəniyyətlərarası dialoq və etnik müxtəliflik cəmiyyətin sabit və dayanıqlı inkişafını təmin edən mühüm şərtlərdən biri kimi qiymətləndirilir”.
Həqiqətən də bu sahədə Azərbaycan çox böyük nailiyyətlər əldə edib. Sözügedən faktor ölkədə dayanıqlı sabitliyin və inkişafın təmin olunmasında mühüm rol oynayır.
Sözügedən məsələni “Baki-Xəbər”ə şərh edən Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğlunun sözlərinə görə, Əli müəllimin Brüsseldə keçirdiyi tədbir həm mövzu, həm də zaman baxımından hədsiz dərəcədə yerindədir: “Məsələ ondadır ki, bu gün dünyanın bir sıra ölkələrində separatizmə qarşı güclü mübarizə gedir. O cümlədən, Avropada yerləşən İspaniyada da bu istiqamətdə ciddi tədbirlər görülür. Separatçıların lideri həbs olunur və s. Əli müəllim Avropanın siyasi paytaxtında bu tədbiri keçirməklə, həm Avropada güclənən separatizmə nifrətə dəstək verir, həm də Azərbaycanın özünün də separatizmdən əziyyət çəkdiyini dünyaya göstərir. Eyni zamanda, Avropanın diqqətinə çatdırılır ki, hansı metodlarla separatizmə qarşı mübarizə aparırsınızsa, eynən həmin metodla da Qafqazda separatizmə qarşı mübarizə aparılmalıdır. Nəzərə almaq lazımdır ki, Azərbaycanda mədəniyyətlərarası dialoq yüksək səviyyədədir. Etnik müxtəliflik cəmiyyətdə hansısa problem yaratmır. Əksinə, ölkənin inkişafında rol oynayır. Hesab edirəm ki, sözügedən məsələ ilə bağlı Əli müəllimin toxunduğu məqamlar Dağlıq Qarabağ məsələsi üzrə daha vacib addımların ilkin preambulasıdır. Fikrimcə, Brüsseldəki tədbirdən sonra bizim dövlət rəsmilərimizin də əlində əsas olacaq ki, Dağlıq Qarabağda qondarma qurumu ləğv etsinlər. Necə ki, İspaniyanın Kataloniya əyalətində bununla bağlı məlum addımlar atıldı. O üzdən, Bako Saakyanın həbsi ilə bağlı qərarın verilməsinin şahidi ola bilərik. Digər erməni separatçıları ilə də bağlı bu addımlar atıla bilər. O baxımdan keçirilən tədbir və orada səslənən fikirlər çox yerindədir. Onu də nəzərə almaq lazımdır ki, sözügedən tədbir Brüssel sammiti ərəfəsində keçirilir. Forumda səslənən fikirlər sammitin gündəliyinə təsir edə bilər. Nəzərə almaq lazımdır ki, hazırda Avropa İttifaqı ilə Azərbaycan arasında danışıqlar gedir. Ona görə də keçirilən tədbirin əhəmiyyətini yüksək qiymətləndirirəm. Bütün bunlarla yanaşı, hesab edirəm ki, Avropa dövlətləri Azərbaycanda mövcud olan etnik müxtəlifliyin mədəniyyətlərarası dialoqa töhfə verdiyini bir daha gördülər”.
Vidadi ORDAHALLI
