Samir Əliyev: "Hesab edirəm ki, məsələnin kökündə sözügedən amillər dayanır"
Ermənistanın bütün səylərinə baxmayaraq, ABŞ-la ikiqat vergitutmanın aradan qaldırılmasına dair müqavilə imzalaya bilmir. Məsələ ondadır ki, Ermənistanın bu dəfə də sözügedən məsələ ilə bağlı cəhdi uğursuz olub. Halbuki, ABŞ-ın bir sıra ölkələrlə, o cümlədən Azərbaycanla belə bir müqaviləsi var.
Bu arada mətbuata açıqlama verən Ermənistanın maliyyə naziri Vardan Aramyan ikiqat vergitutmanın aradan qaldırılması haqqında ABŞ-la saziş imzalanması ehtimalının hələ olduğunu bildirib. O bunu müxtəlif arqumentlərlə əsaslandırmağa çalışıb. Onun sözlərinə görə, ABŞ-la belə bir razılığın olmaması guya onların şirkətləri üçün heç bir çətinlik yaratmır. Ancaq erməni nazir hesab edir ki, müqavilənin olmaması potensial investorları qorxuda bilər. Yəni ABŞ şirkətləri Ermənistanda işləməkdən imtina edə bilər. Aramyanın fikrincə, eyni vergi obyekti (əməliyyat, mənfəət, gəlir) yalnız bir dəfə vergiyə cəlb olunur.
O da məlum olub ki, Ermənistan 47 ölkə ilə bununla bağlı müqavilə imzalayıb. Sonuncu dəfə İsraillə analoji müqavilə bağlanıb. Aramyan onu da deyib ki, ikiqat verginin ləğvi ilə bağlı oktyabrda yenidən ABŞ-la danışıqlar aparılacaq. Maraqlıdır, görəsən niyə ABŞ Ermənistanla ikiqat verginin ləğvi ilə bağlı müqavilənin bağlanmasında maraqlı deyil?
Məsələyə münasibət bildirən iqtisadçı-ekspert Samir Əliyevin sözlərinə görə, ABŞ Ermənistanla belə bir müqavilənin imzalanmasında maraqlı deyil: "Elə ölkələr var ki, zəngin olduqları üçün vergi məsələlərinə elə də diqqət yetirmirlər. Ancaq Ermənistan kasıb ölkə olduğu üçün, investisiya mühitini yaxşılaşdırmaq istəyir. Ölkəyə gələn idxal mallarının ucuz olmasını istəyir. Ancaq, görünür, Ermənistan iqtisadi baxımdan Birləşmiş Ştatlar üçün cəlbedici olmadığından, onlar bunda maraqlı deyil. Ona görə də ermənilərin səylərinə rəğmən, ABŞ buna bir o qədər önəm vermir. Mən bunu əsasən bu faktorla əlaqələndirirəm. Hesab edirəm ki, məsələnin kökündə sözügedən amillər dayanır". Vidadi ORDAHALLI
