Rəsul Cahangirli: "Kəmər tam gücü ilə işə düşdükdən sonra ixrac ediləcək qazın həcmini 31 milyard kubmetrə çatdırmaq mümkün olacaq"
Avropa Yenidənqurma və İnkişaf Bankı (AYİB) Azərbaycanın böyük qaz-kondensat yatağı - "Şahdəniz"in işlənməsinin ikinci mərhələsinə 100 milyon dollar əlavə vəsait ayırıb. Vəsaitin ayrılmasında məqsəd "LUKoyl"un "Şahdəniz" layihəsində payını genişləndirməkdir.
Məlumata görə, bankın idarə heyəti kreditin ayrılmasını təsdiq edib. Həmin vəsait 26 sualtı quyunun qazılmasına, iki qaz platformasının tikilməsinə və eyni zamanda digər işlərin görülməsinə sərf olunacaq.
Qeyd edək ki, "Şahdəniz" yatağının işlənməsi layihəsində "LUKoyl" 10 faiz paya malikdir. Müqavilə 1996-cı ildə imzalanıb. Sözügedən yataqda 1,2 trilyon kubmetr qaz ehtiyatı var. Müqaviləyə görə, tərəflər arasında pay bölgüsü aşağıdakı kimidir: BP - operator (yüzdə 28,8), ARDNŞ (10 faiz), "SGC Upstream" (6,7 faiz), "Petronas" (15,5 faiz), "LUKoyl" (10 faiz), NICO (10 faiz) və TPOC (19 faiz).
"Şahdəniz-2" layihəsi çərçivəsində ilkin mərhələdə 16 milyard kubmetr qaz ixrac olunacaq. Yatağın işlənməsinin ikinci mərhələsinin ümumi dəyəri 25 milyad dollar qiymətləndirilir. Qaz 2018-ci ildə Türkiyə, daha sonra isə Avropa bazarına çıxarılacaq. Bu qaz ehtiyatları "Cənub Qaz Dəhlizi" üçün əsas mənbə olacaq.
Sözügedən məsələ ilə bağlı fikirlərini "Bakı-Xəbər"lə bölüşən Rəsul Cahangirlinin sözlərinə görə, AYİB-in ayırdığı əlavə vəsait "Cənub Qaz Dəhlizi" ilə bağlı işləri sürətləndirəcək: "Bir müddət əvvəl belə fikirlər səslənirdi ki, kreditin ayrılmaması layihənin reallaşmasını gecikdirəcək. Ancaq AYİB-in məlum qərarı bu istiqamətdə işlərin gecikmə risqini aşağı saldı. Zatən, Azərbaycan da dəfələrlə bəyan edib ki, layihədə iştirak edən tərəflər üzərinə düşən işi yerinə yetirsə, "Cənub Qaz Dəhlizi" vaxtında ərsəyə gələcək. AYİB-in məlum qərarı göstərdi ki, Avropa bunda maraqlıdır. Yəni onlar istəyirlər ki, Avropanın Rusiyadan qaz asılılığı azalsın. Düzdür, ilkin mərhələdə 16 milyard kubmetr qaz kəmərlə ixrac olunacaq və bu elə də böyük deyil. Ancaq kəmər tam gücü ilə işə düşdükdən sonra isə ixrac ediləcək qazın həcmini 31 milyard kubmetrə çatdırmaq mümkün olacaq. Əsas məsələ odur ki, "Cənub Qaz Dəhlizi" vaxtında fəaliyyətə başlasın və layihə yubanmasın. Azərbaycan bu istiqamətdə üzərinə düşən işi maksimum yerinə yetirir. Ancaq yaxşı olardı ki, layihədə iştirak edən digər dövlətlər də eyni prinsipiallığı göstərsin".
Vidadi ORDAHALLI
