Qulu İsmayılov: "Bu ölkə təhlükəsizliyini təmin etmək baxımından Rusiyaya doğru meylində korrektə etməyəcək"
Ermənistan "Şərq tərəfdaşlığı" proqramı çərçivəsində aprel ayında Avropa İttifaqı ilə saziş imzalamağa hazırlaşır. Assosiasiya müqaviləsi üzrə ilkin razılıq əlaməti olaraq müxtəsər imza qoyan ölkələrdən ilk növbədə dövlət və məhkəmə sistemi idarəçiliyində demokratik və hüquq prinsiplərinin tətbiq edilməsi və bir sıra gömrük islahatlarının aparılması tələb olunur.
Maraqlıdır ki, Ermənistan eyni zamanda həm də Avrasiya İqtisadi Əməkdaşlıq Təşkilatı ilə iqtisadi xarakterli saziş imzalamağı planlayır. Bir-birilə daban-daban zidd olan iki qurumla eyni anda əməkdaşlıq etmək Ermənistana nə verə bilər?
İqtisadçı Qulu İsmayılov qəzetimizə bildirdi ki,
Gömrük Birliyi və Aİ ilə müqavilələr müqayisəedilməzdir, onlar bir-birinə ziddir: "Hakimiyyət bir vaxtda hər iki formatda əlaqələr yaratmağa imkan verən qaneedici həll tapılacağını bildirir. Söhbət ölkənin hər iki formata tam və ya qismən cəlb ediləcəyindən gedirsə, bunun mənasını anlamaq çətindir. Görünən budur ki, Ermənistan öz gələcək kursunu dəqiq təyin edə bilmir.
Maraqlıdır ki, hələlik Ermənistanın seçimi kimi nəzərdən keçirilən Aİ ölkələri, Moskvanın təhrik etdiyi ehtimal olunan Avrasiya və Gömrük birlikləri ölkələri ilə də sərhədləri yoxdur. Ermənistan Avropa Birliyi ilə assosiativ üzvlük haqqında müqaviləni imzalamağa hazır olduğunu deyirdi. Lakin gözlənilmədən ölkə Avrasiya İttifaqına üzv oldu. Hesab edirəm ki, Ermənistanın bir əlində iki qarpız tutmaq cəhdi heç bir səmərə verən deyil. Bu ölkə təhlükəsizliyini təmin etmək baxımından Rusiyaya doğru meylində korrektə etməyəcək".
Məhəmmədəli QƏRİBLİ