Son dövrlərdə Rusiya və Türkiyə arasında münasibtələrin getdikcə daha da dərinləşməsi, tərəflərin təmaslarının intensivləşməsi Ermənistanda böyük narahatlıq yaratmaqdadır. Burada hesab olunur ki, baş verənlər mütləq mənada Dağlıq Qarabağ münaqişəsinin həllinə təsir göstərəcək.
Türkiyə-Rusiya parlamentlərarası Dostluq Qrupunun rəhbəri Rəcəb Bərbər belə bir vaxtda çox maraqlı açıqlama verib. O qeyd edib ki, Türkiyənin baş naziri Binəli Yıldırımın Rusiya səfəri zamanı iki ölkə Dağlıq Qarabağ münaqişəsinin həlli üzrə səylərin artırılması barədə razılığa gəlib.
Onun sözlərinə görə, Dağlıq Qarabağ münaqişəsi əvvəldən təkcə Azərbaycanın deyil, həm də Türkiyənin problemidir: "Əslində, Ermənistan da bu problemin həllini istəyir, çünki Dağlıq Qarabağ münaqişəsi Ermənistanı xarici dünyadan təcrid edir və bu da Ermənistanın iqtisadiyyatına güclü təsir göstərir. Bu problemin həlli, şübhəsiz, regionda sabitliyə və vətəndaşlarının rifahının yüksəlməsinə gətirib çıxaracaq". Onun sözlərinə görə, Türkiyə, məsələn Gürcüstanla olduğu kimi, Ermənistanla da yaxşı münasibətlər qurmaq niyyətindədir, amma Ankara ilə İrəvan arasında yaxşı münasibətlər yalnız ermənilərin işğal etdiyi Azərbaycan ərazilərinin azad olunmasında sonra mümkündür. Maraqlıdır ki, belə bir vaxtda Rusiya tərəfi Qarabağ üzrə razılaşmaların yerinə yetirilməsi istiqamətində indi daha konkret mövqe nümayiş etdirir. Bu barədə Rusiya xarici işlər naziri Sergey Lavrov bildirir ki, Dağlıq Qarabağ münaqişəsi ilə bağlı Vyana və Sankt-Peterburq görüşlərində əldə olunan razılıqlar həyata keçirilməlidir: "Biz Qarabağ münaqişəsinin nizama salınmasındakı vəziyyəti uzun müddətdir şərh edirik. Razılaşmaya görə, hər şeydən əvvəl atəşkəs rejiminə əməl edilməlidir. Amma təəssüf ki, pozuntular davam edir. Biz ATƏT-in təmas xəttində vəziyyətin monitorinqini yüksək qiymətləndiririk".
Ermənistanın "lragir" saytı yazır ki, Moskvanın bu mövqeyi İrəvana yaxşı heç nə vəd etmir: "Rusiya xarici işlər naziri Sergey Lavrov Hamburqda bildirdi ki, Dağlıq Qarabağ münaqişəsində əvvəldən əldə olunmuş razılıqlara əməl olunmalıdır. Bu, Rusiyanın əvvəlki razılaşmaları qaytarmaq istəyindən xəbər verir. Lavrovun bu sözləri ABŞ və Fransaya, o cümlədən Ermənistana ünvanlanıb. İstisna deyil ki, Lavrov Ermənistana "nail olunmuş razılıqları" xatırladır. Bu, aprel müharibəsindən sonra Serj Sarkisyanın danışdığı razılaşmadır. Sarkisyan "Bloomberg"ə və Dmitri Kiselyova müsahibəsində "Kazan formulu"ndan danışdı. O təsdiqlədi ki, söhbət Qarabağın statusu müəyyən olunmadan ərazilərin qaytarılmasından gedir və Ermənistan bununla razılaşıb. İndi razılaşmalardan geri çəkilir və Qarabağın statusunun tanınmasında təkid edir".
Sayt yazır ki, aprel müharibəsindən sonra Bakı və Ankara ərazilərin qaytarılması ilə bağlı Moskvaya təzyiq edir: "Rusiya apreldən sonra Ermənistanın təhlükəsizliyini əvvəlki kimi dəstəkləyə bilmir, həmçinin, İrəvanı əvvəlki razılaşmalara qayıtmağa məcbur edir". Bütün bunlar fonunda istisna olunmur ki, Qarabağ münaqişəsinin həlli istiqamətində əməli addımlar atılsın. Əks halda Azərbaycan ərazilərini güc yolu ilə işğaldan azad edəcəyini artıq həmsədrlərin də diqqətinə dəfələrlə çatdırıb. Bununla bağlı prezidentin ictimai-siyasi məsələlər üzrə köməkçisi Əli Həsənov "Əl-Cəzirə" telekanalına müsahibəsində bildirib: "Həqiqət budur ki, münaqişənin həlli ilə bağlı yaradılmış, Rusiya, ABŞ və Fransanın həmsədrlik etdiyi ATƏT-in Minsk Qrupu Ermənistanın işğal olunmuş Azərbaycan torpaqlarından çıxarılmasını istəsə, buna qısa zamanda nail ola bilər. Həmsədrlər düzgün və qəti qərar qəbul etsələr, heç olmasa bu günə kimi qəbul olunmuş çoxsaylı qərarların icrası istiqamətində real addımlar atsalar, problem aradan qaldırılar. Nəzərə alınmalıdır ki, bu problem bütün region, hətta Avropanın təhlükəsizliyinə təhdiddir. Azərbaycan Dağlıq Qarabağda yaşayan ermənilərə azad, öz mədəniyyət və adət-ənənələrini qoruyaraq yaşamaq imkanı verdiyini dəfələrlə bəyan edib. Azərbaycan öz ərazilərinin Ermənistan tərəfindən işğal altında saxlanmasına sonsuza qədər səbr göstərməyəcək. Əksinə, vaxt gələcək ki, Azərbaycan təkbaşına, öz gücü ilə ərazilərini işğaldan tamamilə azad edəcək. Bizim dövlətimiz buna hazırdır".
Tahir TAĞIYEV