Əli Orucov: "Onlardan soruşan yoxdur ki, BMT qətnamələrini yerinə yetirməməyiniz azmış kimi, indi də sarsaq açıqlamalarla çıxış edirsiniz?!"
Ermənilərin Azərbaycana yönəlik təxribatları səngimək bilmir. Bu dəfə də qondarma "Dağlıq Qarabağ Respublikası"nın "xarici işlər naziri" Karen Mirzoyan Birləşmiş Millətlər Təşkilatını şantaj etməyə başlayıb.
Belə ki, qondarma "nazir" erməni mətbuatına açıqlamasında BMT-nin İnsan Hüquqları üzrə Ali Komissarlığını ötən 20 ildə "DQR"də monitorinq aparmamaqda ittiham edib. O, qondarma qurumda insan hüquqları ilə bağlı vəziyyəti şəxsən qiymətləndirmək üçün ali komissarı dəvət edib. O bildirib ki, BMT ali komissarının idarəsi tərəfindən hər hansı bir müraciət olmayıb. Bununla, o, həyasızcasına Ali Komissarlığa məktub ünvanlayıb. Məktubunda qeyd edib ki, guya aprel döyüşləri zamanı dinc insanlara qarşı zorakılıq tətbiq olunub və s.
Qondarma qurumu heç bir dövlətin tanımadığını nəzərə alsaq, belə müraciət BMT kimi bir təşkilatı şantaj etməkdən başqa bir şey deyil. Nəzərə alsaq ki, Ermənistan və Dağlıq Qarabağdakı separatçı rejim indiyə qədər BMT Təhlükəsizlik Şurasının qəbul etdiyi məlum 4 qətnaməni yerinə yetirməyib, o zaman ümumiyyətlə onların bu kimi şantaj xarakterli fikirlər səsləndirməyə əsası yoxdur.
Sözügedən məsələ ilə bağlı fikirlərini "Bakı-Xəbər"lə bölüşən AMİP funksioneri Əli Orucovun sözlərinə görə, onların bu hərəkəti separatçıların dünyaya meydan oxuması anlamına gəlir: "Məsələ ondadır ki, işğal olunmuş Dağlıq Qarabağda və ətraf rayonlarda bir nəfər də olsun azərbaycanlı qalmayıb. Dinc insanlar vəhşicəsinə qətlə yetirilib. Minlərlə azərbaycanlı erməni əsirliyində ola-ola, Ermənistan bunu inkar edir. Dağlıq Qarabağda, xüsusən də ətraf 7 rayonda bir çox yaşayış məntəqələri yer üzündən silinib. Dəfələrlə işğalçılar həmin ərazilərdə yanğınlar törədib. Belə olan halda, onlar hələ riyakarcasına insan hüquqlarının vəziyyətindən danışırlar. Onlardan soruşan yoxdur ki, BMT qətnamələrini yerinə yetirməməyiniz azmış kimi, indi də sarsaq açıqlamalarla çıxış edirsiniz?! Bilirsiniz, çox təəssüf ki, dünya gücləri bunları bilə-bilə baş verənlərə öz münasibətini bildirmir. Ortaya konkret iradə qoymurlar. O üzdən, separatçılar bu cür həyasız açıqlamalarla çıxış edir. Hesab edirəm ki, diplomatik müstəvidə müvafiq addımlar atılmalıdır". Vidadi ORDAHALLI