Rusiya və ABŞ arasında son günlərdə daha açıq xarakter almağa başlayan Suriya məsələsi özünün daha gərgin mərhələsinə daxil olmağa başlayır. Artıq bəllidir ki, ABŞ Rusiya ilə Suriyada atəşkəs rejimi üçün yaradılan ikitərəfli kanalların istifadəsini dayandırıb.
ABŞ Dövlət Departamentinin mətbuat katibi Con Kirbi buna səbəb kimi rəsmi Moskvanın üzərinə götürdüyü öhdəlikləri yerinə yetirməməsini göstərir. Bundan əvvəl ABŞ dövlət katibi Con Kerri bildirmişdi ki, ABŞ Rusiya ilə Suriya böhranının nizamlanması üzrə danışıqları kəsməyin bir addımlığındadır.
Rusiya XİN-in rəsmi nümayəndəsi Mariya Zaxarova Moskvanın Vaşinqtonun qərarından təəssüfləndiyini bildirib: "Vaşinqtonun Jenevrədə mütəxəssis qruplarının fəaliyyətini dayandırması qərarından təəssüflənirik. ABŞ Suriya üzrə əsas razılaşmaları yerinə yetirə bilmədiyindən, məsuliyyəti digər tərəflərin üzərinə qoymağa cəhd edir". Rusiya xarici işlər nazirinin müavini Sergey Ryabkovun sözlərinə görə, ABŞ sülh yerinə Suriyaya yeni müharibə və yeni ağrılar gətirəcək. Hazırda ABŞ həm Suriya, həm də Rusiyaya qarşı yeni addımlar atmağa hazırlaşır. ABŞ prezidentinin mətbuat katibi Coş Ernest bu xüsusda bildirib:"Suriya üzrə ABŞ və Rusiyanın diplomatik dialoqunun dayandırılmasından sonra Ağ Evdə Moskvaya qarşı sanksiyalar və başqa təzyiq imkanları indi daha tez-tez müzakirə ediləcək". ABŞ prezidentinin sözçüsü qeyd edib ki, sanksiyalar da daxil olmaqla, ABŞ-ın özünü daha effektiv və güclü göstərən bir sıra alətləri var. O xatırladıb ki, Ukraynanın cənub-şərqində vəziyyətlə bağlı sanksiyalar Rusiyanın mövqeyinin dəyişməsinə gətirib çıxarmayıb: "Sanksiyalardan istifadə də daxil olmaqla, Birləşmiş Ştatların özünü daha effektiv və güclü vasitə ilə göstərən bir sıra üsulları var. Birləşmiş Ştatlar Ukraynanın ərazi bütövlüyünün pozulmasına görə Rusiyaya qarşı sanksiyaların effektiv tətbiqi üzərində avropalı müttəfiqlərimizlə işləyirdi. Amma biz Ukrayna üzrə görmək istədiyimiz strategiya dəyişikliyini müşahidə etmirik". Coş Ernestin sözlərinə görə, ABŞ prezidenti bir sıra variantlara baxacaq: "Onun milli təhlükəsizlik üzrə komandası təsir variantları üzrə məruzələrini prezidentə daim göndərir. Birləşmiş Ştatların rusiyalılarla danışıqlarda daha iştirak etmədiyini nəzərə alsaq, yəqin ki, qarşıdakı günlərdə onlar bunu daha çox, tez-tez müzakirə etməyə başlayacaqlar".
Amma görünən odur ki, Rusiya bu hədələr qarşısında geri çəkilməyəcək. Əksinə, Böyük Britaniyanın "The Times" nəşrinin yazdığına görə, Suriyaya görə beynəlxalq gərginliyin artması fonunda Rusiyanın dövlət kütləvi informasiya vasitələri və bütün məmurlar ölkəni Qərblə dəhşətli nüvə müharibəsinə hazırlayır. Nəşr nümunə olaraq Rusiya Müdafiə Nazirliyinin "Ulduz" telekanalının saytında ötən həftə dərc edilən məqaləni xatırladır. Orada iddia edilir ki, Birləşmiş Ştatlar Rusiyanı cəzalandırmaq üçün hazırlıq görür. "The Times" proqnozunu Rusiya Fövqəladə Hallar Nazirliyinin açıqlaması ilə qüvvətləndirir. Nazirlik elan edib ki, hakimiyyət yeraltı sığınacaqlar tikib. Burada Moskvanın bütün əhalisi, təxminən 12 milyon insan yerləşə biləcək. O da bildirilir ki, Vladimir Putinin 2012-ci ildə prezident postuna qayıdışından sonra Moskvada nüvə hücumu ssenarisi üzrə ən azı iki dəfə təlim keçirilib.
Qəzet xatırladır ki, Rusiyada 8400 hərbi nüvə yükündən ibarət olan nüvə arsenalı var. ABŞ-ın nüvə arsenalı isə 7500 nüvə yükündən ibarətdir: "Rossiya Seqodnya" agentliyinin baş direktoru, tanınmış teleaparıcı Dmitri Kiselyov dəfələrlə lovğalanıb ki, Rusiya Birləşmiş Ştatları "radioaktiv külə" çevirməyə qadir olan yeganə ölkədir". Eyni zamanda, "The Times" nəşri bildirir ki, Putinin yaxın ətrafına tez-tez Qərblə qarşıdurmaya cəhd edən "davakar qırğılar" daxil olur: "Kreml xəbərdarlıqla çıxış edib ki, Bəşər Əsədin ordusuna qarşı birbaşa hərbi hərəkətlərə təşəbbüs edərsə, Amerika "qorxunc və tektonik tərpənmələrlə" rastlaşacaq. Rusiya Müdafiə Nazirliyinin mətbuat xidmətinin rəhbəri, general-mayor İqor Konaşenkov daha əvvəl bildirib ki, Qərbin dəstəklədiyi Suriya müxalifət gücləri beynəlxalq terrorçulardır və onlara ABŞ tərəfindən nəzarət edilir. Rusiya cəmiyyətində Putinin son prezidentliyi dövründə əhəmiyyətli hərbiləşmə müşahidə olunur. Qızıl Meydanda böyük paradların keçirilməsi təcrübəsi yenilənib və dövlət KİV-i ölkənin silahlı qüvvələrini təbliğ etməyə başlayıb".
Rusiya ilə yanaşı, İran da ABŞ-ı Suriya məsələsinə görə hədələyir. İranın dini lideri Əli Xamneyinin beynəlxalq məsələlər üzrə müşaviri, ölkənin Strateji Araşdırmalar Mərkəzinin rəhbəri Əli Əkbər Vilayəti bildirir ki, Suriyaya hərbi müdaxilə ABŞ üçün özünəqəsd olacaq:"Suriyaya birbaşa hərbi müdaxilə ABŞ üçün özünəqəsd və Əfqanıstanla İraqın ardından regionda üçüncü məğlubiyyət olacaq. Həm də məğlubiyyət əvvəlkilərdən daha ciddi olacaq".
Nahid SALAYEV