Seyid Camal Əzimbəyli: "Müsəlman ölkələrini təmsil edən media vasitələri arasında əməkdaşlığın dərinləşdirilməsinə ehtiyac var"
Bakıda keçirilən İslam Əməkdaşlıq Təşkilatına Üzv Dövlətlərin Jurnalistləri Assosiasiyasının niyyət konfransında bir sıra məsələlərə toxunulub.
Hazırda dünyada, o cümlədən bir çox müsəlman ölkəsində sabitliyə zərbə vuran müxtəlif mənfi proseslərin getdiyini, islam dini haqqında yanlış rəy formalaşdırmaq cəhdlərinin şahidi olduğumuzu vurğulayan və bu prosesdə transmilli medianın rolundan danışan Prezidentin ictimai-siyasi məsələlər üzrə köməkçisi Əli Həsənov deyib ki, müsəlman dünyasında baş verənlər birtərəfli işıqlandırılır: "Qərbin islamofob dairələri və transmilli mediası müsəlman dünyasında baş verən hadisələri, prosesləri birtərəfli və əsasən qərəzli formada təqdim edirlər. Nəticə etibarilə, maddi və mənəvi zənginliyə malik olan islam ölkələri, tolerant və multikultural xarakteri ilə seçilən müsəlman xalqları, həm də sülh və barışıq dini olan islam haqqında beynəlxalq ictimaiyyətdə qeyri-obyektiv və yanlış təsəvvür yaradılır. İslamı terrorla eyniləşdirmək, hər bir müsəlmanı potensial terrorçu obrazında təqdim etmək, islam dəyərlərini ümumbəşəri dəyərlərdən ayıraraq yad və zərərli element kimi qələmə vermək cəhdləri haqlı olaraq bütün islam aləmində ciddi etirazlar doğurur".
Ə.Həsənovun fikrincə, Ermənistan xristian həmrəyliyi amilindən, Qərbin islamofob dairələrinin, aparıcı media resurslarının imkanlarından yararlanmağa çalışır və bəzi hallarda buna nail olur. Oxşar problemləri olan digər müsəlman ölkələri də mütəmadi olaraq belə hallarla rastlaşır.
Maraqlıdır, İƏT-ə Üzv Dövlətlərin Jurnalistləri Assosiasiyasının yaradılması islam dini barəsində yanlış təsəvvürün yaranmasının qarşısının alınmasında nə kimi rol oynaya bilər?
Məsələyə münasibət bildirən şərqşünas Seyid Camal Əzimbəylinin sözlərinə görə, belə bir təşkilatın yaradılması islam barəsində yanlış fikirlərin yaradılmasının qarşısını müəyyən qədər ala bilər: "Ona görə də İƏT-ə Üzv Dövlətlərin Jurnalistləri Assosiasiyasının yaradılması bütün inanclı insanlar tərəfindən təqdir olunur. Məsələ ondadır ki, dünyada islama qarşı bir səlib yürüşü var. Bu gün radikal düşüncəli insanların islam kimliyi ilə tanıdılması tendensiyası mövcuddur. Müəyyən media quruluşları məqsədyönlü şəkildə müsəlmanlar barəsində vəhşi obrazı yaratmağa çalışır. O baxımdan müsəlman ölkələrini təmsil edən media vasitələri arasında əməkdaşlığın dərinləşdirilməsinə ehtiyac var. Bu, müqəddəs dinimiz barəsində mənfi fikirlərin yaranmasının qarşısını almaqla yanaşı, islamın bütövlüyünə, bu kimliyin dünyada birlik və bərabərliyinə əlavə bir xidmət olacaq. Eyni zamanda, vəhşi müsəlman obrazını yaradanların qarşısında bir sipər rolunu oynayacaq. Ona görə də Azərbaycanın bu məsələnin önündə olması alqışlanasıdır. Bu, Azərbaycanın tolerantlığına güc qatacaq".
Vidadi ORDAHALLI