Üzeyir Cəfərov: "Dəmir günbəz" kompleksləri də lazım olan parametrlərə cavab verir"
İsrail yaxın vaxtlarda Azərbaycana "Dəmir günbəz" raketdən müdafiə sistemini verəcək. Bu sensasion məlumatı Milli Məclisin deputatı Yevda Abramov news.az saytına verib.
Deputatın sözlərinə görə, həmin silah sistemi Azərbaycana yola salınmaq üçün artıq hazırdır. "Bu raketdən müdafiə sistemi "İsgəndər" raketlərinin yerə düşməsinə imkan verməyəcək" - Yevda Abramov bildirib. Deputat Azərbaycanın İsraildən "Dəmir günbəz" raketdən müdafiə sistemini almaq barədə müqaviləni nə zaman bağladığını açıqlamayıb.
Ancaq bəzi ekspertlər hesab edir ki, "Dəmir günbəz" sistemi 4 kilometrdən 70 kilometrə qədər mənzilli idarə olunmayan raketləri ("Qrad", "Kəssam" və ya "Katyuşa" tipli) neytrallaşdırmaq üçündür, bu sistem "İsgəndər"lərə qarşı tətbiq oluna bilməz.
İddia olunur ki, bundan əvvəl Azərbaycan İsraildən "Barak-8" raket əleyhinə komplekslərinin alınmasına dair müqavilə bağlamışdı və istisna deyil ki, Bakıya yola salınmaq üçün hazırlanan sistemlər məhz odur. "İsgəndər"lərdən yaranan təhdidi xeyli ölçüdə neytrallaşdırmağı bacaran komplekslər hansı ola bilər?
Hərbi ekspert Üzeyir Cəfərov qəzetimizə açıqlamasında bildirdi ki, Yevda Abramov peşəkar hərbçi olmadığı üçün onun silahların adı və xarakteristikasını təqdim etməsində səhvi ola bilər: "Bununla Azərbaycan demək istəyir ki, ölkəmiz öz təhlükəsizliyini tam təmin etmək üçün ən müasir silahları alıb və bundan sonra da alacaq. Azərbaycanla İsrail arasında bu sahədə ciddi əməkdaşlığın olması heç kim üçün sirr deyil. Ermənistanda nümayiş olunan "İsgəndər" raketləri elə də böyük texniki göstəricilərə malik deyil. "İsgəndər" raketlərinin də müxtəlif növləri var. Ermənistanda paradda nümayiş olunan "İsgəndər-E" raketləridir. Onlar 280 km-dəki hədəfi vurmaq qabiliyyətindədir. Həmin silahların ən güclü növü "İsgəndər-M" sayılır ki, o da ermənilərdə yoxdur. Bizim elə silahlarımız var ki, onlar barədə nə danışırıq, nə də paradda nümayiş etdiririk. Bir faktı deyim ki, Azərbaycan "İsgəndər" tipli raketlərdən tam mühafizə olunmaq üçün lazım olan silahlara malikdir. Y.Abramovun dediyi adların üstündə xüsusi olaraq dayanmaq istəmirəm. Bizim hərbi sahədə əməkdaşlığımız yalnız İsraillə deyil. Bir sıra dost ölkələrlə aparılan uğurlu danışıqlar nəticəsində biz təhlükəsizliyimiz üçün lazım olan bütün sursatları əldə etmişik. Hətta bizdə elə qurğular var ki, Ermənistan Bakının mərkəzinə zərbə endirəcək silaha malik olsa belə, onu Xəzər dənizinə istiqamətləndirəcək. Narahatlıq üçün əsas görmürəm. "Dəmir günbəz" kompleksləri də lazım olan parametrlərə cavab verir. Ancaq bununla kifayətlənmək olmaz".
Məhəmmədəli QƏRİBLİ